ਪੰਜਾਬ ਸਰਕਾਰ ਵੱਲੋਂ ਨਿਵੇਸ਼ਕਾਂ ਨੂੰ ਸੱਦੇ ਦਰਮਿਆਨ, ਪਹਿਲੇ ਸਨਅਤਕਾਰ ਬਾਹਰ ਜਾਣ ਦੀ ਤਿਆਰੀ ਵਿੱਚ

 

ਪੰਜਾਬ ਸਰਕਾਰ ਵੱਲੋਂ ਨਿਵੇਸ਼ਕਾਂ ਨੂੰ ਸੱਦੇ ਦਰਮਿਆਨ, ਪਹਿਲੇ ਸਨਅਤਕਾਰ ਬਾਹਰ ਜਾਣ ਦੀ ਤਿਆਰੀ ਵਿੱਚ

ਇੱਕ ਪਾਸੇ ਜਦੋਂ ਪੰਜਾਬ ਸਰਕਾਰ 23-24 ਫਰਵਰੀ ਨੂੰ ਮੁਹਾਲੀ ਵਿਖੇ ਪੰਜਾਬ ਨਿਵੇਸ਼ਕ ਸਮੇਲਨ ਰਚਾ ਕੇ ਨਵੇਂ ਨਿਵੇਸ਼ਕਾਂ ਨੂੰ ਭਰਮਾਉਣ ਦੇ ਯਤਨ ਕਰ ਰਹੀ ਹੈ, ਤਾਂ ਅਨੇਕਾਂ ਮੌਜੂਦਾ ਸਨਅਤਕਾਰਾਂ ਨੇ ਉਹਨਾਂ ਦੇ ਮਸਲੇ ਹੱਲ ਨਾ ਕੀਤੇ ਜਾਣ ਦੀ ਸੂਰਤ ਵਿੱਚ ਪੰਜਾਬ ਤੋਂ ਬਾਹਰ ਚਲੇ ਜਾਣ ਦਾ ਐਲਾਨ ਕੀਤਾ ਹੈ।

                ਫਾਸਨਰ ਮੈਨੂਫੈਕਚਰਜ਼ ਐਸੋਸੀਏਸ਼ਨ ਇੰਡੀਆ, ਫੈਡਰੇਸ਼ਨ ਆਫ ਪੰਜਾਬ ਸਮਾਲ ਇੰਡਸਟਰੀਜ਼ ਐਸੋਸੀਏਸ਼ਨ (64PS91) ਆਲ ਇੰਡੀਸਟਰੀਜ਼ ਐਂਡ ਟਰੇਡ ਫਾਰਮ ਅਤੇ ਫਾਸਨਰ ਸਪਲਾਇਰਜ਼ ਐਸੋਸੀਏਸ਼ਨ ਆਫ ਇੰਡੀਆ ਸਮੇਤ ਸਨਅਤੀ ਜਥੇਬੰਦੀਆਂ ਦੇ ਮੈਂਬਰਾਂ ਅਤੇ ਹੋਰਨਾਂ ਨੇ ਰਾਜ ਸਰਕਾਰ ਵੱਲੋਂ ਹੁਣੇ ਜਾਰੀ ਕੀਤੀ ਨਵੀਂ ਸਨਅਤੀ ਅਤੇ ਕਾਰੋਬਾਰ ਨੀਤੀ ਨੂੰ ਰਾਜ ਵਿੱਚ ਪਹਿਲਾਂ ਤੋਂ ਮੌਜੂਦ ਸਨਅਤਾਂ ਪ੍ਰਤੀ ਵਿਤਕਰੇਪੂਰਨ ਕਿਹਾ ਹੈ ਅਤੇ ਖਦਸ਼ਾ ਜਾਹਰ ਕੀਤਾ ਹੈ ਕਿ ਇਹ ਉਹਨਾਂ ’ਤੇ ਮਾਰੂ ਅਸਰ ਪਾਵੇਗੀ।

ਨਵੀਂ ਪਾਲਸੀ ਸਾਨੂੰ ਖਤਮ ਕਰ ਦੇਵੇਗੀ

‘ਫਾਸਨਰ ਮੈਨੂਫੈਕਚਰ ਐਸੋ’. ਦੇ ਪ੍ਰਧਾਨ ਨਰਿੰਦਰ ਭਾਮਰਾ ਨੇ ਬੁੱਧਵਾਰ ਨੂੰ ਕਿਹਾ ਕਿ, ‘‘ਸਰਕਾਰ ਨੇ ਹੁਣੇ ਹੁਣੇ ਨਵੀਂ ਸਨਅਤੀ ਤੇ ਕਾਰੋਬਾਰੀ ਨੀਤੀ ਪਾਸ ਕੀਤੀ ਹੈ ਜਿਹੜੀ ਮੌਜੂਦਾ ਸਨਅਤਾਂ ਨੂੰ ਤਬਾਹ ਕਰ ਦੇਵੇਗੀ। ਨਵੀਂ ਨੀਤੀ ਤਹਿਤ ਸਰਕਾਰ ਨਿਵੇਸ਼ਕਾਰਾਂ ਨੂੰ ਨਿਵੇਸ਼ ਉਤੇ 200 ਫੀਸਦੀ ਰੀਫੰਡ, ਉਹਨਾਂ ਦੇ ਕਾਮਿਆਂ ਲਈ 4000 ਰੁਪਏ ਪ੍ਰਤੀ ਮਹੀਨਾ, 5 ਰੁਪਏ ਕੀਮਤ ’ਤੇ ਬਿਜਲੀ ਰਜਿਸਟ੍ਰੇਸ਼ਨ ਤੇ ਹੋਰ ਖਰਚਿਆਂ ਤੋਂ ਛੋਟ ਆਦਿ ਦੀਆਂ ਯਕੀਨਦਹਾਨੀਆਂ ਕਰ ਰਹੀ ਹੈ। ਜੇ ਇਹ ਲਾਗੂ ਹੁੰਦੀਆਂ ਹਨ ਤਾਂ ਨਵੀਂ ਸਨਅਤ ਮੌਜੂਦਾ ਸਨਅਤ ਦੇ ਬੰਦ ਹੋਣ ਦਾ ਕਾਰਨ ਬਣ ਜਾਵੇਗੀ। ਕਿਉਂਕਿ ਸਸਤੀ ਬਿਜਲੀ, ਮਜ਼ਦੂਰੀ ਲਾਭ ਅਤੇ ਨਿਵੇਸ਼ ਰੀਫੰਡ ਸਦਕਾ ਨਵੀਆਂ ਸਨਅਤਾਂ ਦੇ ਉਤਪਾਦਾਂ ਦੀ ਕੀਮਤ ਮੌਜੂਦਾ ਸਨਅਤਾਂ ਦੇ ਮਕਾਬਲੇ ਬਹੁਤ ਸਸਤੀ ਹੋਵੇਗੀ ਤੇ ਇਸ ਕਰਕੇ ਹੌਲੀ ਹੌਲੀ ਮੌਜੂਦਾ ਸਨਅਤਾਂ ਬੰਦ ਹੋ ਜਾਣਗੀਆਂ’’

                ਉਸਨੇ ਕਿਹਾ ਕਿ ‘‘ਜੇ ਸਰਕਾਰ ਸਾਡੇ ਮਸਲਿਆਂ ਵੱਲ ਧਿਆਨ ਨਹੀਂ ਦਿੰਦੀ ਤਾਂ ਸਾਡੇ ਕੋਲ ਪੰਜਾਬ ਛੱਡਕੇ ਉੱਤਰ ਪ੍ਰਦੇਸ਼ ਵਰਗੇ ਰਾਜਾਂ ਵਿੱਚ ਜਾਣ ਤੋਂ ਬਿਨਾਂ ਕੋਈ ਰਾਹ ਨਹੀਂ ਬਚਦਾ।’’

                ਆਲ ਇੰਡੀਆ ਇੰਡਸਟਰੀਜ਼ ਐਂਡ ਟਰੇਡ ਫਾਰਮਾਂ ਦੇ ਪ੍ਰਧਾਨ ਬਦੀਸ਼ ਜਿੰਦਲ ਨੇ ਕਿਹਾ ਕਿ ਨਵੀਂ ਸਨਅਤੀ ਨੀਤੀ ਤਹਿਤ ਮੌਜੂਦਾ ਸਨਅਤਾਂ ਨੂੰ ਛੋਟੇ ਮੋਟੇ ਲਾਭ ਹੀ ਮਿਲਣਗੇ।

                ‘‘ਜੇ ਸਰਕਾਰ ਨਵੀਆਂ ਸਨਅਤਾਂ ਨੂੰ ਸਸਤੀ ਬਿਜਲੀ, ਪੂੰਜੀ ਨਿਵੇਸ਼ ਤੇ ਜੀ ਐਸ ਟੀ ਲਾਭ ਤੇ ਹੋਰ ਆਰਥਕ ਫਾਇਦੇ ਦਿੰਦੀ ਹੈ ਤਾਂ ਪੁਰਾਣੀਆਂ ਸਨਅਤਾਂ ਕਦੇ ਵੀ ਨਵੀਆਂ ਸਨਅਤਾਂ ਦਾ ਮੁਕਾਬਲਾ ਨਹੀਂ ਕਰ ਸਕਦੀਆਂ। 2023 ਦਾ ਸਾਲ ਪੰਜਾਬ ਦੀਆਂ ਹਜ਼ਾਰਾਂ ਚੱਲ ਰਹੀਆਂ ਸਨਅਤਾਂ ਦੀ ਬੰਦੀ ਵੇਖੇਗਾ ਜਿਹੜੀਆਂ ਪਹਿਲਾਂ ਹੀ ਕੋਵਿਡ ਅਤੇ ਅੰਤਰ ਰਾਸ਼ਟਰੀ ਮੰਦੀ ਦੀ ਮਾਰ ਝੱਲ ਰਹੀਆਂ ਹਨ। ਅਸੀਂ ਸਰਕਾਰ ਨੂੰ ਇਹ ਪਾਲਸੀ ਵਾਪਸ ਲੈਣ ਅਤੇ ਚਾਲੂ ਸਨਅਤਾਂ ਨੂੰ ਬਰਾਬਰ ਦੇ ਲਾਭਾਂ ਵਾਲੀ ਨਵੀਂ ਪਾਲਸੀ ਬਣਾਉਣ ਦੀ ਬੇਨਤੀ ਕਰਦੇ ਹਾਂ।’’

ਪੰਜਾਬ ਵਿੱਚ ਇਸ ਉਮੀਦ ਨਾਲ ਨਿਵੇਸ਼ਕ ਸੰਮੇਲਨ ਕਰਵਾਇਆ ਜਾ ਰਿਹਾ ਹੈ ਕਿ ਇਹ ਸੂਬੇ ਦਾ ਬਹੁਪੱਖੀ ਸਨਅਤੀ ਵਿਕਾਸ ਕਰਨ ਵਿੱਚ ਅਹਿਮ ਭੂਮਿਕਾ ਨਿਭਾਵੇਗਾ।

(ਦਾ ਹਿੰਦੂ ਦੀ ਖ਼ਬਰ ਦਾ ਅਨੁਵਾਦ)  23 ਫਰਵਰੀ,2023