ਨਿਵੇਸ਼ ਸੰਮੇਲਨਾਂ ਰਾਹੀਂ ਮੁਲਕ ਨੂੰ ਗਹਿਣੇ ਧਰਨ ਦੀਆਂ ਪੇਸ਼ਕਸ਼ਾਂ

 

ਨਿਵੇਸ਼ ਸੰਮੇਲਨਾਂ ਰਾਹੀਂ ਮੁਲਕ ਨੂੰ ਗਹਿਣੇ ਧਰਨ ਦੀਆਂ ਪੇਸ਼ਕਸ਼ਾਂ

                                                                            

          2014 ’ਚ ਭਾਰਤੀ ਜਨਤਾ ਪਾਰਟੀ ਨੇ ਆਪਣੇ ਚੋਣ ਪ੍ਰਚਾਰ ਦੌਰਾਨ ‘ਸਭ ਕਾ ਵਿਕਾਸ, ਸਭ ਕਾ ਸਾਥ’ ਦਾ ਨਾਹਰਾ ਲਾਇਆ ਸੀ। ਇਹ ਨਾਹਰਾ ਕਾਂਗਰਸ ਪਾਰਟੀ ਦੇ ‘ਸੰਮਿਲਤ ਵਿਕਾਸ’ (inclusive growth) ਦੇ ਨਾਹਰੇ ਨਾਲੋਂ ਸ਼ਬਦਾਂ ’ਚ ਹੀ ਵੱਖਰਾ ਸੀ/ਹੈ। ਦੋਹਾਂ ਨਾਹਰਿਆਂ ਦੇ ਅਰਥ ਤੇ ਤੱਤ ਇੱਕੋ ਹਨ। ਲੋਕਾਂ ਨੂੰ ਲੁਭਾਉਣ ਲਈ ਇਹਨਾਂ ਦਾ ਅਰਥ ਹੈ ਕਿ ਸਮਾਜ ਦੇ ਸਭਨਾਂ ਹਿੱਸਿਆਂ-ਕੀ ਅਮੀਰ ਤੇ ਕੀ ਗਰੀਬ, ਕੀ ਧਨਵਾਨ ਤੇ ਕੀ ਕੰਗਾਲ-ਸਭਨਾਂ ਦਾ ਵਿਕਾਸ। ਪਰ ਤੱੱਤ ਪੱਖੋਂ ਇਹਨਾਂ ਨਾਹਰਿਆਂ ਦੇ ਅਮਲ ਨੇ ਅਮੀਰਾਂ ਦੀ ਅਮੀਰੀ ਤੇ ਧਨ-ਦੌਲਤ ’ਚ ਹੋਰ ਵਾਧਾ ਤੇ ਵਿਕਾਸ ਕਰਨਾ ਹੈ ਤੇ ਗਰੀਬਾਂ ਦੀ ਗਰੀਬੀ ਤੇ  ਕੰਗਾਲੀ ’ਚ ਵੀ ਹੋਰ ਵਾਧਾ ਕਰਨਾ ਹੈ। 

          ਲੋਕਾਂ ਦੇ ਵਿਰੋਧੀ ਤੇ ਹਾਕਮ ਜਮਾਤਾਂ ਦੇ ਪੱਖੀ ਇਸ ਇੱਕਪਾਸੜ ਵਿਕਾਸ ਲਈ ਵੀ, ਸੱਭੇ ਮੌਕਾਪ੍ਰਸਤ ਚੋਣ ਪਾਰਟੀਆਂ (ਸਮੇਤ ਖੱਬੇ-ਪੱਖੀ ਕਹਾਉਂਦੀਆਂ  ਪਾਰਟੀਆਂ) ਪੈਦਾਵਾਰ ਦੇ ਸਾਧਨਾਂ ਦੀਆਂ ਮਾਲਕ ਤੇ ਪੈਦਾਵਾਰੀ ਅਮਲ  ’ਚ ਸਰਗਰਮ ਦੇਸੀ-ਵਿਦੇਸ਼ੀ ਤੇ ਬਹੁ-ਦੇਸ਼ੀ ਵੱਡੀਆਂ ਧੜਵੈਲ ਕੰਪਨੀਆਂ ਉਤੇ ਹੀ ਟੇਕ ਰੱਖਦੀਆਂ ਹਨ। ‘‘ਇੰਡੀਆ ’ਚ ਬਣਾਓ’’ ਤੋਂ ‘ਇੰਡੀਆ ’ਚ ਬਣਾਓ, ਸੰਸਾਰ ਲਈ ਬਣਾਓ’ ਤੱਕ ਪਹੁੰਚ ਚੁੱਕੀਆਂ ਇਹ ਪਾਰਟੀਆਂ ਇਹਨਾਂ ਧੜਵੈਲ ਕੰਪਨੀਆਂ ਤੋਂ ਹੀ ਨਿਵੇਸ਼  ਕਰਾਉਣ ਲਈ ਤਰਲੇ ਮਾਰ ਰਹੀਆਂ ਹਨ। ਇਸ ਨਿਵੇਸ਼ ਨੂੰ ਵਿਆਪਕ ਫੈਲੀ ਬੇਰੁਜ਼ਗਾਰੀ ਦੇ ਹੱਲ ਵਜੋਂ ਵੀ ਪੇਸ਼ ਕਰਦੀਆਂ ਹਨ। ਪਰ ਜਿਉਂ ਜਿਉਂ ਇਹ ਨਿਵੇਸ਼ ਵਧ ਰਿਹਾ ਹੈ ਉਸ ਤੋਂ ਕਿਤੇ ਜ਼ਿਆਦਾ ਤੇਜ਼ੀ ਨਾਲ ਬੇਰੁਜ਼ਗਾਰੀ ਤੇ ਗਰੀਬੀ ਵਧ ਰਹੀ ਹੈ।

          ਪਿਛਲੇ ਦਿਨੀਂ ਉੱਤਰ ਪ੍ਰਦੇਸ ਦੀ ਭਾਜਪਾ ਸਰਕਾਰ ਨੇ ਗਲੋਬਲ ਨਿਵੇਸ਼ ਸੰਮੇਲਨ ਕਰਵਾਇਆ ਹੈ। ਪੰਜਾਬ ਦੀ ਆਮ ਆਦਮੀ ਦੀ ਸਰਕਾਰ ਨੇ ਮੁਹਾਲੀ ਵਿਖੇ 23-24 ਫਰਵਰੀ ਨੂੰ ਨਿਵੇਸ਼ ਸੰਮੇਲਨ ਕਰਵਾਇਆ ਹੈ। ਇਸੇ ਪ੍ਰਕਾਰ ਦਾ ਗਲੋਬਲ ਨਿਵੇਸ਼ ਸੰਮੇਲਨ ਆਂਧਰਾ ਪ੍ਰਦੇਸ਼ ਦੀ ਵਾਈ.ਐਸ.ਆਰ ਕਾਂਗਰਸ ਸਰਕਾਰ ਵੀ 3,4 ਮਾਰਚ ਨੂੰ ਕਰਵਾ ਰਹੀ ਹੈ। ਇਸ ਵਰਤਾਰੇ ’ਚੋਂ ਕਾਰਪੋਰੇਟ ਜਗਤ ਤੋਂ ਨਿਵੇਸ਼ ਕਰਾਉਣ ਦੀ ਇਹਨਾਂ ਪਾਰਟੀਆਂ ਦੀ ਟੇਕ ਅਤੇ ਸਾਂਝ ਉਜਾਗਰ ਹੋ ਰਹੀ ਹੈ।

          ਕਾਰਪੋਰੇਟਾਂ ਦੇ ਮੂਹਰੇ ਦੇਸ਼ ਦੀ ਕੁਦਰਤੀ ਅਤੇ ਮਨੁੱਖੀ ਦੌਲਤ ਅਤੇ ਤਕਨੀਕੀ ਵਸੀਲੇ ਪ੍ਰੋਸਦੀਆਂ ਕੇਂਦਰੀ ਤੇ ਸੂਬਾਈ ਸਰਕਾਰਾਂ ਆਮ ਹੀ ਨਜ਼ਰ ਆਉਂਦੀਆਂ ਹਨ। ਪਰ ਇੰਡੀਅਨ ਐਕਸਪ੍ਰੈਸ ਦੇ ਇੱਕ ਇਸ਼ਤਿਹਾਰ ਰਾਹੀਂ ਤਾਂ ਆਂਧਰਾ ਸਰਕਾਰ ਕਾਰਪੋਰੇਟ ਜਗਤ ਮੂਹਰੇ ਕਿਸੇ ਵੇਸਵਾ ਵਾਂਗ ਪੇਸ਼ ਹੋ ਰਹੀ ਹੈ। ਧੜਵੈਲ ਬਹੁ-ਦੇਸ਼ੀ ਕੰਪਨੀਆਂ ਦੀ ਪਹਿਲਾਂ ਕੀਤੀ ਆਪਣੀ ਸੇਵਾ ਦੇ ਪੜੁੱਲ ਬੰਨ੍ਹਦਿਆਂ, ਉਹਨਾਂ ਨਿਵੇਸ਼ ਕਰਾਉਣ ਦੀ ਲਾਲਸਾ-ਵੱਸ, ਦੱਸ ਰਹੀ ਹੈ ਕਿ ਅਸੀਂ ਤੁਹਾਡੇ ਸੁਆਗਤ ’ਚ ਕਿੰਨੀਆਂ ਚੀਜਾਂ ਦੇ ਖਜਾਨੇ ਲਈ ਖੜ੍ਹੇ ਹਾਂ। ਆਓ ਜ਼ਰਾ ਇਸ਼ਤਿਹਾਰ ਰਾਹੀਂ ਪੇਸ਼ ਕੀਤੇ ਇਸ ਖਜ਼ਾਨੇ ਦੇ ਦਰਸ਼ਨ ਕਰੀਏ-

* 48000 ਏਕੜ ਦਾ ਲੈਂਡ ਬੈਂਕ। * 48 ਕਿਸਮ ਦੇ ਖਣਿਜਾਂ ਦਾ ਖਜ਼ਾਨਾ

* ਭਰਪੂਰ ਪਾਣੀ  * ਨਿਰਵਿਘਨ ਬਿਜਲੀ * ਹੁਨਰਮੰਦ ਕਿਰਤ ਸ਼ਕਤੀ

* 974 ਕਿਲੋਮੀਟਰ ਦਾ ਸਮੁੰਦਰੀ ਕਿਨਾਰਾ * 10 ਸਮੁੰਦਰੀ ਬੰਦਰਗਾਹਾਂ

* 6 ਹਵਾਈ ਅੱਡੇ।

‘ਨਿਵੇਸ਼ ਤਾਂ ਕਰੋ, ਐਨਾ ਕੁੱਝ ਹਾਜ਼ਰ ਹੈ!’

          ਲੈਂਡ ਬੈਂਕ ਅਧੀਨ ਉਹ ਜ਼ਮੀਨ ਆਉਂਦੀ ਹੈ ਜਿਹੜੀ ਲੋਕਾਂ ਤੋਂ ਅਕੁਆਇਰ ਕਰਕੇ ਸਰਕਾਰ ਨੇ ਪਹਿਲਾਂ ਹੀ ਆਪਣੀ ਮਾਲਕੀ ਹੇਠ ਕਰ ਰੱਖੀ ਹੁੰਦੀ ਹੈ। ਇਸ ਜ਼ਮੀਨ ਨੂੰ ਕਾਰਪੋਰੇਟਾਂ ਨੂੰ ਤੁਰੰਤ ਅਲਾਟ ਕਰ ਦਿੱਤਾ ਜਾਂਦਾ ਹੈ ਤਾਂ ਕਿ ਸਿੰਗੂਰ ਤੇ ਨੰਦੀਗਰਾਮ ਵਾਲੀ ਨੌਬਤ ਹੀ ਨਾ ਆਵੇ।

          ਅਜਿਹੀ ਜ਼ਮੀਨ ਬੇਜ਼ਮੀਨਿਆਂ ’ਚ ਵੰਡਣ ਵੇਲੇ ਸਭਨਾਂ ਸਰਕਾਰਾਂ ਨੂੰ ਸੱਪ ਸੁੰਘ ਜਾਂਦਾ ਹੈ। 

          ਐਨਾ ਕੁੱਝ ਪੇਸ਼ ਕਰਨ ਤੋਂ ਇਲਾਵਾ, ਅਮਨ ਸ਼ਾਂਤੀ ਦਾ ਮਹੌਲ ਬਣਾਏ ਰੱਖਣ ਦਾ ਵਾਅਦਾ ਵੀ ਕੀਤਾ ਜਾਂਦਾ ਹੈ। ਜਿਸ ਦਾ ਅਰਥ ਮਜ਼ਦੂਰਾਂ ਕਿਸਾਨਾਂ ਵੱਲੋਂ ਕਾਰਪੋਰੇਟਾਂ ਦੇ ਕੰਮ ’ਚ ਕਿਸੇ ਤਰ੍ਹਾਂ ਦੇ ਪਾਏ ਜਾਣ ਵਾਲੇ ਵਿਘਨ ਨੂੰ ਡੰਡੇ ਦਾ ਜ਼ੋਰ ਥਾਏਂ ਨੱਪ ਦੇਣਾ ਹੁੰਦਾ ਹੈ।

          ਮੁਹਾਲੀ ਵਿਖੇ ਕਰਵਾਏ ਪ੍ਰਗਤੀਸ਼ੀਲ ਪੰਜਾਬ ਨਿਵੇਸ਼ ’ਚ ਕਾਰੋਬਾਰੀ ਹਸਤੀਆਂ ਨੂੰ ਦੇਖ ਕੇ ਮੁੱਖ ਮੰਤਰੀ ਭਗਵੰਤ ਮਾਨ ਅਤਿਅੰਤ ਖੁਸ਼ ਨਜ਼ਰ ਆਇਆ। ਕਾਰੋਬਾਰੀਆਂ ਨੂੰ ਖੁਸ਼ ਕਰਨ ਵਾਸਤੇ ਉਸ ਨੇ ਸਮਝਦਾਰੀ ਸਮਝੌਤੇ  (MO”) ਕਰਨ ਦੀ ਬਜਾਏ ਦਿਲੋਂ ਸਮਝੌਤੇ ਕਰਨ ਦੀ ਗੱਲ ਆਖੀ। ਭਰੋਸਾ ਦਿਵਾਇਆ ਤੇ ਵਾਅਦਾ ਕੀਤਾ ਕਿ ਕਾਰੋਬਾਰੀਆਂ ਲਈ ਪ੍ਰੇਸ਼ਾਨੀ ਦਾ ਸਵੱਬ ਬਣਦੇ ਜ਼ਮੀਨ ਦੀ ਵਰਤੋਂ ਸਬੰਧੀ ਤਬਦੀਲੀ (3hange of land use) ਅਤੇ ਕੋਈ ਇਤਰਾਜ਼ ਨਹੀਂ  (NO3) ਲੈਣ ਦੇ ਝੰਜਟ ਖਤਮ ਕਰ ਦਿੱਤੇ ਜਾਣਗੇ। ਪੰਜਾਬ ਦੀਆਂ ਪ੍ਰਾਪਤੀਆ ਗਿਣਾਉਂਦਿਆ ਤਿੜੇ ਹੋਏ ਦੇ ਮੂੰਹੋਂ ਇਹ ਸਾਫ ਸਾਫ ਸੁਣਨ ਨੂੰ ਮਿਲਿਆ ਕਿ ਇੱਥੇ ਜਾਪਾਨ, ਇੰਗਲੈਂਡ, ਯੂ ਏ ਈ, ਅਮਰੀਕਾ, ਜਰਮਨੀ, ਦੱਖਣੀ ਕੋਰੀਆ, ਸਿੰਘਾਪੁਰ ਸਪੇਨ ਫਰਾਂਸ ਤੇ ਇਟਲੀ ਤੋਂ ਨਿਵੇਸ਼ ਹੋ ਰਿਹਾ ਹੈ।

          ਪੰਜਾਬ ਦੀਆਂ ਵਿਰੋਧੀ ਪਾਰਟੀਆਂ ਅਕਾਲੀ ਦਲ ਤੇ ਕਾਂਗਰਸ ਦੀ ਕਾਰਪੋਰੇਟ ਜਗਤ ਵੱਲੋਂ ਕਰਵਾਏ ਜਾਂਦੇ ਨਿਵੇਸ਼ ਸਬੰਧੀ ਸਮਝ ਹੋਰ ਉਜਾਗਰ ਹੋਈ ਹੈ। ਸੁਖਬੀਰ ਬਾਦਲ ਨੇ ਕਿਹਾ ਕਿ ਨਿਵੇਸ਼ ਪੰਜਾਬ ਅਸੀਂ ਹੀ ਸ਼ੁਰੂ ਕਰਵਾਇਆ ਸੀ ਅਤੇ ਹਜਾਰਾਂ ਕਰੋੜ ਰੁਪਏ ਦਾ ਨਿਵੇਸ਼ ਕਰਵਾਇਆ ਵੀ। ਰਾਜਾ ਵੜਿੰਗ ਨੇ ਕਾਰੋਬਾਰੀਆਂ ਨੂੰ ਬਿਹਤਰ ਸਹੂਲਤਾਂ ਪ੍ਰਦਾਨ ਨਾ ਕਰਨ ਸਬੰਧੀ ਆਪ ਸਰਕਾਰ ’ਤੇ ਉਂਗਲ ਉਠਾਈ ਹੈ।

          ਦਲਾਲ ਖਾਸੇ ਤੇ ਗੁਲਾਮ ਮਾਨਸਿਕਤਾ ਵਾਲੀਆਂ ਕੇਂਦਰੀ ਤੇ ਸੂਬਾਈ ਸਰਕਾਰਾਂ, ਕਾਰਪੋਰੇਟ ਘਰਾਣਿਆਂ ਮੂਹਰੇ  ਜਿੰਨਾ ਮਰਜ਼ੀ ਵਿਛ ਵਿਛ ਦਿਖਾਉਣ, ਉਹਨਾਂ ਨੇ ਆਪਣੇ ਇਜ਼ਾਰੇਦਾਰ ਸਰਮਾਏ ਦੇ ਪ੍ਰਚਲਨ ਲੱਛਣਾਂ ਅਨੁਸਾਰ ਹੀ ਪੈਸਾ ਨਿਵੇਸ਼ ਕਰਨਾ ਹੈ। ਉਹਨਾਂ ਖੇਤਰਾਂ ’ਚ ਹੀ ਕਾਰੋਬਾਰ ਲਾਉਣੇ ਤੇ ਚਲਾਉਣੇ ਹਨ ਜਿਨ੍ਹਾਂ ’ਚੋਂ ਵੱਧ ਤੋ ਵੱਧ ਮੁਨਾਫਾ ਚੂਸਿਆ ਜਾ ਸਕੇ ਅਤੇ ਆਪੋ ਆਪਣੀ ਮਾਲਕੀ ਹੇਠਲੇ ਸਰਮਾਏ ਤੇ ਕੁੱਲ ਦੌਲਤ ਨੂੰ ਵਧਾਇਆ ਜਾ ਸਕੇ। ਹਾਂ, ਇਹਨਾਂ ਦਲਾਲਾਂ ਨੂੰ ਦਲਾਲੀ ਦੇ ਗੱਫੇ ਉਹ ਜ਼ਰੂਰ ਦਿੰਦੇ ਰਹਿਣਗੇ। 

                                      ---0---