ਦੁਨੀਆਂ ਦੇ ਕਿਰਤੀਆਂ ਦੀ ਗਾਜ਼ਾ ਨਾਲ ਯੱਕਯਹਿਤੀ
ਇਜ਼ਰਾਇਲ ਦੀ ਨਸਲਪ੍ਰਸਤ ਯਹੂਦੀਵਾਦੀ ਸਰਕਾਰ ਵੱਲੋਂ ਅਮਰੀਕਨ ਸਾਮਰਾਜ ਦੀ ਸਰਪ੍ਰਸਤੀ, ਹੱਲਾਸ਼ੇਰੀ ਅਤੇ ਚੌਤਰਫਾ ਮੱਦਦ ਨਾਲ ਗਾਜ਼ਾ 'ਚ ਮੌਤ ਅਤੇ ਤਬਾਹੀ ਦਾ ਬੇਅਟਕ ਤਾਂਡਵ ਜਾਰੀ ਰੱਖਿਆ ਜਾ ਰਿਹਾ ਹੈ। ਬੇਕਸੂਰ ਫ਼ਲਸਤੀਨੀ ਵਸੋਂ ਨੂੰ ਹਵਾਈ ਬੰਬਾਰੀ, ਮਿਜ਼ਾਇਲਾਂ, ਟੈਕਾਂ ਦੇ ਹਮਲਿਆਂ, ਵਾਰ-ਵਾਰ ਉਜਾੜਿਆ ਅਤੇ ਵਿਆਪਕ ਤਬਾਹੀ ਅਤੇ ਹੁਣ ਗਿਣੇ ਮਿਥੇ ਢੰਗ ਨਾਲ ਮਹੀਨਿਆਂ ਤੋਂ ਦਾਣਾ-ਪਾਣੀ ਬੰਦ ਕਰਕੇ ਨਸਲਘਾਤ ਕੀਤਾ ਜਾ ਰਿਹਾ ਹੈ। ਦੁਨੀਆ ਭਰ ਦੇ ਲੋਕਾਂ ਵੱਲੋਂ ਜੰਗ ਬੰਦ ਕਰਨ ਦੀ ਆਵਾਜ਼ ਨੂੰ ਹਕਾਰਤ ਨਾਲ ਅਣਸੁਣਿਆ ਕਰਿਆ ਜਾ ਰਿਹਾ ਹੈ। ਬਰਾਬਰੀ, ਜਮਹੂਰੀਅਤ ਅਤੇ ਮਨੁੱਖੀ ਹੱਕਾਂ ਦੇ ਰਖਵਾਲੇ ਅਤੇ ਸੱਭਿਅਕ ਹੋਣ ਦੀ ਕਲਗੀ ਸਜਾਈ ਫਿਰਦੇ ਯੂਰਪ ਅਤੇ ਬਾਕੀ ਦੁਨੀਆਂ ਦੇ ਧਨੀ ਦੇਸ਼ਾਂ ਦੇ ਹਾਕਮ ਪੂਰੀ ਬੇਸ਼ਰਮੀ ਤੇ ਢੀਠਤਾਈ ਨਾਲ ਇਸ ਬੱਜਰ ਕੁਕਰਮ ਨੂੰ ਸਿਰਫ ਜਾਣ ਬੁੱਝ ਕੇ ਅਣਡਿੱਠ ਹੀ ਨਹੀਂ ਕਰ ਰਹੇ, ਸਗੋਂ ਇਸ 'ਚ ਭਾਗੀਦਾਰ ਬਣੇ ਹੋਏ ਹਨ। ਗਾਜ਼ਾ 'ਚ ਮੌਤ ਦਾ ਤਾਂਡਵ ਰਚਾਇਆ ਜਾ ਰਿਹਾ ਹੈ, ਉਹ ਘੋਰ ਮੁਜ਼ਰਮਾਨਾ, ਜ਼ਾਲਮਾਨਾ ਅਤੇ ਹੌਲਨਾਕ ਹੈ। ਮਨੁੱਖਤਾ ਨੂੰ ਸ਼ਰਮਸਾਰ ਕਰਨ ਵਾਲਾ ਹੈ।
ਜਿੱਥੇ ਧਨੀ ਦੇਸ਼ਾਂ ਦੇ ਹਾਕਮ ਲਾਣੇ ਗਾਜ਼ਾ 'ਚ ਫ਼ਲਸਤੀਨੀ ਕੌਮ ਦੇ ਕਤਲੇਆਮ ਦੀ ਪਿੱਠ ਪੂਰ ਰਹੇ ਹਨ, ਉੱਥੇ ਇਹਨਾਂ ਮੁਲਕਾਂ 'ਚ ਵੱਡੀ ਗਿਣਤੀ ਅਵਾਮ, ਖਾਸ ਕਰਕੇ ਮਿਹਨਤਕਸ਼ ਜਮਾਤਾਂ ਦੇ ਲੋਕ, ਗਾਜ਼ਾ 'ਚ ਇਜ਼ਰਾਇਲੀ-ਅਮਰੀਕੀ ਬੁਰਛਾਗਰਦੀ ਅਤੇ ਫਲਸਤੀਨੀਆਂ ਦੇ ਨਸਲਘਾਤ ਵਿਰੁੱਧ ਲਗਾਤਾਰ ਆਵਾਜ਼ ਉਠਾਉਂਦੇ ਆ ਰਹੇ ਹਨ। ਜੰਗਬਾਜ਼ ਜੁੰਡਲੀ ਦੇ ਨਾਪਾਕ ਮਨਸੂਬਿਆਂ ਅਤੇ ਨਹੱਕੀ ਜੰਗ ਵਿਰੁੱਧ ਸਾਮਰਾਜੀ/ਸਰਮਾਏਦਾਰ ਦੇਸ਼ਾਂ ਦੇ ਪ੍ਰਮੁੱਖ ਕੇਂਦਰਾਂ 'ਚ ਲੋਕਾਂ ਵੱਲੋਂ ਸਮੇਂ-ਸਮੇਂ ਭਾਰੀ ਰੋਸ-ਵਿਖਾਵੇ ਕੀਤੇ ਜਾਂਦੇ ਰਹੇ ਹਨ ਜੋ ਅੱਜ ਵੀ ਜਾਰੀ ਹਨ। ਵੱਖ-ਵੱਖ ਦੇਸ਼ਾਂ 'ਚ ਅੱਡ-ਅੱਡ ਥਾਵਾਂ ਉੱਤੇ ਗਾਜ਼ਾ ਉੱਪਰ ਮੜ੍ਹੀ ਜੰਗ 'ਤੇ ਫ਼ਲਸਤੀਨੀ ਲੋਕਾਂ ਦੇ ਨਸਲਘਾਤ ਵਿਰੁੱਧ ਅਜਿਹੇ ਕੁੱਝ ਤਾਜ਼ਾ ਵਿਰੋਧ-ਪ੍ਰਦਰਸ਼ਨਾਂ ਦੀ ਇੱਕ ਬਹੁਤ ਹੀ ਸੀਮਤ ਤੇ ਸੰਖੇਪ ਰਿਪੋਰਟ ਹੇਠਾਂ ਦਿੱਤੀ ਜਾ ਰਹੀ ਹੈ।
ਲੰਡਨ (ਯੂ.ਕੇ.)
ਟਾਈਮਜ਼ ਆਫ ਇੰਡੀਆ ਦੀ ਇੱਕ ਰਿਪੋਰਟ ਅਨੁਸਾਰ ਗਾਜ਼ਾ 'ਚ ਇਜ਼ਰਾਇਲੀ ਜੰਗ ਅਤੇ ਬਰਤਾਨਵੀ ਸਰਕਾਰ ਵੱਲੋਂ ਯੂ.ਕੇ. 'ਚ ਸਰਗਰਮ “ਫ਼ਲਸਤੀਨੀ ਐਕਸ਼ਨ ਗਰੁੱਪ” ਨੂੰ ਦਹਿਸ਼ਤਗਰਦ ਕਰਾਰ ਦੇ ਕੇ ਉਸ ਉੱਪਰ ਪਾਬੰਦੀ ਲਾਉਣ ਦੇ ਵਿਰੁੱਧ 19 ਜੁਲਾਈ ਨੂੰ ਸਮੁੱਚੇ ਯੂ.ਕੇ. 'ਚ ਜੋ ਵਿਰੋਧ ਪ੍ਰਦਰਸ਼ਨ ਕਰਨ ਦਾ ਸੱਦਾ ਦਿੱਤਾ ਗਿਆ ਸੀ, ਉਸਨੂੰ ਲਾਮਿਸਾਲ ਹੁੰਗਾਰਾ ਮਿਲਿਆ। ਵੱਖ-ਵੱਖ ਵਰਗਾਂ ਅਤੇ ਭਾਈਚਾਰਿਆਂ ਦੇ ਦਹਿ-ਹਜ਼ਾਰਾਂ ਲੋਕਾਂ ਨੇ ਲੰਡਨ 'ਚ ਕੱਢੇ ਮਾਰਚ 'ਚ ਹਿੱਸਾ ਲਿਆ। ਪ੍ਰਤੱਖਦਰਸ਼ੀਆਂ ਅਤੇ ਆਰਗੇਨਾਈਜ਼ਰਾਂ ਮੁਤਾਬਕ ਇਹ ਮਾਰਚ ਬਰਤਾਨੀਆਂ ਦੇ ਇਤਿਹਾਸ 'ਚ ਹੋਏ ਸਭ ਤੋਂ ਵੱਡੇ ਰੋਸ ਮੁਜ਼ਾਹਰਿਆਂ 'ਚੋਂ ਇੱਕ ਸੀ ਜਿਸ ਨਾਲ ਸਾਰਾ ਯੂ.ਕੇ. ਭੜਕ ਉੱਠਿਆ ਜਾਪਦਾ ਸੀ। ਵਿਰੋਧ ਮਾਰਚ 'ਚ ਫ਼ਲਸਤੀਨੀ ਕਾਜ਼ ਦੀ ਹਮਾਇਤ, ਨੇਤਨਯਾਹੂ ਨੂੰ ਮਾਸੂਮਾਂ ਦਾ ਕਾਤਲ ਗਰਦਾਨਣ, ਫ਼ਲਸਤੀਨੀ ਲੋਕਾਂ ਦੀ ਨਸਲਕੁਸ਼ੀ ਬੰਦ ਕਰਨ, ਜੰਗਬੰਦੀ ਕਰਨ, ਫ਼ਲਸਤੀਨੀ ਐਕਸ਼ਨ ਗਰੁੱਪ 'ਤੇ ਲਾਈ ਪਾਬੰਦੀ ਵਾਪਸ ਲੈਣ ਅਤੇ ਹੋਰ ਕਈ ਮੰਗਾਂ ਨਾਲ ਸੰਬੰਧਤ ਬੈਨਰ, ਮਾਟੋ ਅਤੇ ਫ਼ਲਸਤੀਨੀ ਝੰਡੇ ਪ੍ਰਦਰਸ਼ਨ ਕੀਤੇ ਜਾ ਰਹੇ ਸਨ।
ਈਡਨਬਰਗ (ਸਕਾਟਲੈਂਡ)
ਇੱਥੇ ਵੀ 19 ਜੁਲਾਈ ਨੂੰ ਫ਼ਲਸਤੀਨੀ ਲੋਕਾਂ ਦੇ ਹੱਕ 'ਚ ਵਿਰਾਟ ਰੈਲੀ ਤੇ ਮਾਰਚ ਕੀਤਾ ਗਿਆ। ਜਿਸ 'ਚ ਭਾਰੀ ਉਤਸ਼ਾਹ ਨਾਲ ਲੋਕਾਂ ਨੇ ਹਿੱਸਾ ਲਿਆ। ਲੋਕਾਂ ਦੀ ਵੱਡੀ ਭਾਰੀ ਗਿਣਤੀ ਦੁਪਹਿਰ ਤੋਂ ਪਹਿਲਾਂ ਹੀ ਸੇਂਟ ਗਾਈਲਜ਼ ਗਿਰਜਾਘਰ ਕੋਲ ਆ ਜੁੜੀ। ਇੱਥੋਂ ਸ਼ੁਰੂ ਹੋਏ ਮਾਰਚ 'ਚ ਲੋਕ ਫ਼ਲਸਤੀਨੀ ਮਸਲੇ ਨਾਲ ਸੰਬੰਧਤ ਵੱਖ-ਵੱਖ ਨਾਹਰੇ ਮਾਰ ਰਹੇ ਸਨ। ਫ਼ਲਸਤੀਨੀ ਲੋਕਾਂ ਦਾ ਕਤਲੇਆਮ ਤੇ ਜੰਗ ਰੋਕਣ ਦੀ ਆਵਾਜ਼ ਉਠਾ ਰਹੇ ਸਨ। ਉਪਰੋਕਤ ਥਾਵਾਂ ਤੋਂ ਇਲਾਵਾ ਯੂ.ਕੇ. ਦੇ ਕਈ ਹੋਰ ਸ਼ਹਿਰਾਂ ਜਿਵੇਂ ਬਹਰਿਸਟਲ, ਮਾਨਚੈਸਟਰ, ਬੋਸਟਨ, ਟਰੂਰੋ ਆਦਿਕ ਵਿੱਚ ਵੀ ਜਬਰਦਸਤ ਇਕੱਠ ਹੋਏ। ਯੂ.ਕੇ. ਪੁਲਸ ਨੇ ਪਾਬੰਦੀਸ਼ੁਦਾ “ਫ਼ਲਸਤੀਨੀ ਐਕਸ਼ਨ ਗਰੁੱਪ” ਦੀ ਹਮਾਇਤ ਕਰਨ ਦੇ ਦੋਸ਼ 'ਚ ਲੰਡਨ ਅਤੇ ਮਾਨਚੈਸਟਰ 'ਚ ਸੌ ਦੇ ਕਰੀਬ ਵਿਅਕਤੀਆਂ ਨੂੰ ਹਿਰਾਸਤ 'ਚ ਵੀ ਲਿਆ।
ਨਿਊ-ਯਾਰਕ (ਅਮਰੀਕਾ)
ਅਮਰੀਕਾ 'ਚ ਜਿੱਥੇ ਸਰਕਾਰ ਨੇ ਫ਼ਲਸਤੀਨ ਦਾ ਨਾਂ ਲੈਣਾ ਵੀ ਗੁਨਾਹ ਬਣਾ ਰੱਖਿਆ ਹੈ, 23 ਜੁਲਾਈ ਨੂੰ ਨਿਊਯਾਰਕ 'ਚ ਫ਼ਲਸਤੀਨ 'ਚ ਜੰਗ ਅਤੇ ਕਤਲੇਆਮ ਬੰਦ ਕਰਨ ਲਈ ਲੋਕਾਂ ਦਾ ਇੱਕ ਭਰਵਾਂ ਤੇ ਵਿਸ਼ਾਲ ਇਕੱਠ ਹੋਇਆ। ਬੁਲਾਰਿਆਂ ਨੇ ਮੰਗ ਕੀਤੀ ਕਿ ਗਾਜ਼ਾ 'ਚ ਇਜ਼ਰਾਇਲੀ ਹਮਲਾ ਫੌਰੀ ਬੰਦ ਕੀਤਾ ਜਾਵੇ, ਲੋਕਾਂ ਨੂੰ ਭੁੱਖੇ-ਤਿਹਾਏ ਮਾਰਨਾ ਬੰਦ ਕੀਤਾ ਜਾਵੇ, ਬਾਰਡਰ ਖੋਹਲਿਆ ਜਾਵੇ ਅਤੇ ਗਾਜ਼ਾ ਦੀ ਨਾਕਾਬੰਦੀ ਖਤਮ ਕੀਤੀ ਜਾਵੇ। ਅਮਰੀਕਾ ਦੀ ਰਾਜਧਾਨੀ ਵਸ਼ਿੰਗਟਨ (ਡੀ.ਸੀ.), ਸ਼ਿਕਾਗੋ ਅਤੇ ਸਾਂ-ਫਰਾਂਸਿਸਕੋ ਵਰਗੇ ਕਈ ਹੋਰ ਸ਼ਹਿਰਾਂ 'ਚ ਵੱਡੇ-ਵੱਡੇ ਇਕੱਠ ਕੀਤੇ ਗਏ ਜਿਹਨਾਂ ਵਿੱਚ ਇਨਸਾਫ਼ਪਸੰਦ ਯਹੂਦੀ ਲੋਕ ਵੀ ਸ਼ਾਮਿਲ ਹੋਏ। ਮਾਰਚ ਵੀ ਕੀਤੇ ਗਏ। ਬੁਲਾਰਿਆਂ ਵੱਲੋਂ ਹੋਰਨਾਂ ਗੱਲਾਂ ਤੋਂ ਇਲਾਵਾ ਗਾਜ਼ਾ ਦੇ ਲੋਕਾਂ ਨੂੰ ਭੁੱਖਮਰੀ ਦਾ ਸ਼ਿਕਾਰ ਬਣਾ ਕੇ ਮਾਰਨ ਦੇ ਅਣਮਨੁੱਖੀ ਕਾਰੇ 'ਤੇ ਵੀ ਥੂਹ-ਥੂਹ ਕੀਤੀ ਗਈ। ਯੂ.ਐਨ. ਵੱਲੋਂ ਵੀ ਗਾਜ਼ਾ 'ਚ ਰਾਸ਼ਨ ਵੰਡਣ ਦੌਰਾਨ ਰਾਸ਼ਨ ਹਾਸਲ ਕਰਨ ਲਈ ਜੁੜਨ ਵਾਲੇ ਲੋਕਾਂ ਉੱਪਰ ਜਾਨਲੇਵਾ ਹਮਲਾ ਕਰਨ ਦੇ ਵਰਤਾਰੇ ਨੂੰ ਨਾ-ਸਵੀਕਾਰ ਯੋਗ ਗਰਦਾਨਦਿਆਂ ਇਸਦੀ ਕਰੜੀ ਨਿੰਦਾ ਕੀਤੀ।
ਤੇਲ-ਅਵੀਵ (ਇਜ਼ਰਾਇਲ)
20 ਜੁਲਾਈ 2025 ਦੀ, ਐਸੋਸੀਏਟਡ ਪ੍ਰੈਸ ਦੀ ਇੱਕ ਖ਼ਬਰ ਅਨੁਸਾਰ ਸ਼ਨੀਵਾਰ ਨੂੰ ਹੋਸਟੇਜ਼ ਸੁਕੇਅਰ ਵਿੱਚ ਹਰ ਹਫ਼ਤੇ ਹੋਣ ਵਾਲੀ ਰੈਲੀ ਵਿੱਚ ਵੱਡੀ ਗਿਣਤੀ ਇਜ਼ਰਾਇਲੀ ਲੋਕਾਂ ਨੇ ਹਿੱਸਾ ਲਿਆ। ਬਾਅਦ 'ਚ ਤੇਲ ਅਵੀਵ 'ਚ ਅਮਰੀਕਨ ਅੰਬੈਸੀ ਤੱਕ ਇੱਕ ਮਾਰਚ ਕੀਤਾ ਗਿਆ ਜਿਸ ਦੌਰਾਨ ਮੰਗ ਕੀਤੀ ਗਈ ਕਿ ਗਾਜ਼ਾ 'ਚ ਫੌਰੀ ਜੰਗਬੰਦੀ ਕਰਕੇ ਜੰਗ ਖਤਮ ਕੀਤੀ ਜਾਵੇ ਅਤੇ ਹਾਲੇ ਤੱਕ ਰਿਹਾਅ ਨਾ ਕਰਵਾਏ ਜਾ ਸਕੇ ਅਗਵਾ ਇਜ਼ਰਾਇਲੀ ਬੰਦੀਆਂ ਨੂੰ ਹਮਾਸ ਨਾਲ ਗੱਲਬਾਤ ਕਰਕੇ ਮੁਕਤ ਕਰਵਾਇਆ ਜਾਵੇ।
ਪੈਰਿਸ (ਫਰਾਂਸ)
ਯੂਰਪ ਭਰ ਅੰਦਰ, ਟਰਾਂਸਪੋਰਟ ਅਤੇ ਲੱਦਾਈ ਕਾਮਿਆਂ ਅਤੇ ਟਰੇਡ ਯੂਨੀਅਨਾਂ ਵੱਲੋਂ ਇਜ਼ਰਾਇਲ ਭੇਜੀ ਜਾ ਰਹੀ ਜੰਗ-ਸਮੱਗਰੀ ਦਾ ਵਿਰੋਧ ਕਰਨ ਦਾ ਰੁਝਾਨ ਲਗਾਤਾਰ ਵਧ ਰਿਹਾ ਹੈ ਕਿਉਂਕਿ ਇਜ਼ਰਾਇਲ ਗਾਜ਼ਾ 'ਚ ਨਰਸੰਹਾਰ ਦਾ ਅਮਲ ਜਾਰੀ ਰੱਖ ਰਿਹਾ ਹੈ। ਜੁਲਾਈ ਮਹੀਨੇ 'ਚ ਪੈਰਿਸ ਦੇ ਏਅਰਪੋਰਟ ਕਾਮਿਆਂ ਵੱਲੋਂ ਇਜ਼ਰਾਇਲ ਨੂੰ ਭੇਜੀ ਜਾ ਰਹੀ ਫੌਜੀ ਸਮਾਨ ਦੀ ਖੇਪ ਦੀ ਜਹਾਜ਼ਾਂ 'ਚੋਂ ਲੱਦਾਈ ਕਰਨ ਤੋਂ ਇਨਕਾਰ ਕਰ ਦਿੱਤਾ ਗਿਆ। ਕੁੱਝ ਚਿਰ ਪਹਿਲਾਂ, ਜੂਨ ਮਹੀਨੇ 'ਚ ਐਸ.ਯੂ.ਡੀ. ਏਰੀਅਨ ਨਾਂ ਦੀ ਜਥੇਬੰਦੀ ਦੇ ਕਾਮਿਆਂ ਨੇ ਐਲਵਿੱਟ ਸਿਸਟਮਜ਼ ਦੇ ਮਾਲ ਦਾ ਪੈਰਿਸ ਅੱਡੇ 'ਤੇ ਲੱਦਾਈ ਕਰਨ ਤੋਂ ਇਨਕਾਰ ਕਰ ਦਿੱਤਾ ਸੀ। ਇਉਂ ਹੀ ਫੋਸਰਮੇਰ ਦੇ ਬੰਦਰਗਾਹੀ ਕਾਮਿਆਂ ਨੇ, ਮਾਰਸਿਲੇ ਨੇੜੇ, ਅਜਿਹੇ ਹੀ ਮਾਲ ਦੀ ਲੱਦਾਈ ਕਰਨ ਤੋਂ ਜੁਆਬ ਦੇ ਦਿੱਤਾ ਸੀ।
ਏਥਨਜ਼ (ਗਰੀਸ)
ਏਥਨਜ਼ ਦੀ ਪਰੇਊਸ ਬੰਦਰਗਾਹ ਦੇ ਕਾਮਿਆਂ ਵੱਲੋਂ, ਇੱਕ ਸਫ਼ਲ ਲਾਮਬੰਦੀ ਕਰਕੇ “ਐਵਰ ਗੋਲਡਨ” ਨਾਂ ਦੇ ਸਮੁੰਦਰੀ ਜਹਾਜ਼ ਰਾਹੀਂ ਇਜ਼ਰਾਇਲ ਨੂੰ ਜੰਗੀ ਸਮਾਨ ਭੇਜਣ ਦੀ ਚਾਲ ਨੂੰ ਨਾਕਾਮ ਬਣਾ ਦਿੱਤਾ ਗਿਆ। ਗੋਦੀ ਕਾਮਿਆਂ ਨੂੰ ਸੂਹ ਮਿਲੀ ਸੀ ਕਿ ਉਪਰੋਕਤ ਸ਼ਿੱਪ ਰਾਹੀਂ ਜੰਗੀ ਸਮਾਨ ਜਾ ਰਿਹਾ ਹੈ। 14 ਜੁਲਾਈ ਨੂੰ, ਜਦ ਸ਼ਿੱਪ ਨੇ ਆਉਣਾ ਸੀ, ਗੋਦੀ ਕਾਮਿਆਂ ਨੇ ਨੇੜੇ ਦੀਆਂ ਨੌਜਵਾਨ ਜਥੇਬੰਦੀਆਂ, ਟਰੇਡ ਯੂਨੀਅਨਾਂ ਅਤੇ ਹੋਰ ਲੋਕਾਂ ਦਾ ਵਿਸ਼ਾਲ ਇਕੱਠ ਕਰ ਲਿਆ। ਪਰ ਸ਼ਿੱਪ ਮਾਲਕਾਂ ਨੇ ਚਲਾਕੀ ਖੇਡਦਿਆਂ ਇਹ ਸ਼ਿੱਪ ਖਾਲੀ ਹੀ ਭੇਜ ਦਿੱਤਾ। ਕਾਮਿਆਂ ਨੂੰ ਫਿਰ ਇਹ ਸੂਹ ਮਿਲੀ ਕਿ ਹੁਣ ਇਹ ਸਮਾਨ ਕਾਸਕੇ ਸ਼ਿੰਪਿੰਗ ਦੇ ਪਿਸਜ਼ ਨਾਂ ਦੇ ਜਹਾਜ਼ ਰਾਹੀਂ ਆ ਰਿਹਾ ਹੈ ਜੋ ਹਰ ਸਮਾਨ ਦੇ ਨਾਂ ਹੇਠ ਐਵਰ ਗੋਲਡਨ 'ਚ ਲੱਦਿਆ ਜਾਵੇਗਾ। ਇਉਂ ਕਾਮਿਆਂ ਨੇ ਚੌਕਸੀ, ਨਿਗਾਹਦਾਰੀ ਅਤੇ ਜਨਤਕ ਲਾਮਬੰਦੀ ਦੇ ਜ਼ੋਰ ਇਸ ਸਾਜਿਸ਼ ਨੂੰ ਨਾਕਾਮ ਕਰ ਦਿੱਤਾ। ਪਹਿਲਾਂ ਵੀ ਗਰੀਸ ਦੇ ਗੋਦੀ ਕਾਮਿਆਂ ਨੇ ਇਜ਼ਰਾਇਲ ਨੂੰ ਜੰਗੀ ਸਾਮਾਨ ਅਤੇ ਦੂਹਰੀ ਵਰਤੋਂ ਵਾਲੇ ਸਾਮਾਨ ਨੂੰ ਭੇਜੇ ਜਾਣ ਦੀਆਂ ਕੋਸ਼ਿਸ਼ਾਂ ਨੂੰ ਨਾਕਾਮ ਬਣਾਇਆ ਸੀ।
ਬਰੈਸ਼ੀਆ (ਇਟਲੀ)
ਇਟਲੀ ਵਿੱਚ, ਜੈਨੋਆ ਵਿਖੇ ਟਰਾਂਸਪੋਰਟ ਕਾਮਿਆਂ ਅਤੇ ਟਰੇਡ ਯੂਨੀਅਨਾਂ ਨੇ ਲਾਮਬੰਦੀ ਕਰਕੇ ਬਰੈਸ਼ੀਆ (ਲੰਬਾਰ ਡੀ) ਦੇ ਹਵਾਈ ਅੱਡੇ ਉੱਤੇ ਇਜ਼ਰਾਇਲ ਭੇਜੀ ਜਾ ਰਹੀ ਇੱਕ ਜੰਗੀ ਸਮਾਨ ਦੀ ਖੇਪ ਨੂੰ ਰੋਕ ਦਿੱਤਾ। ਕਾਮਿਆਂ ਨੇ ਜ਼ੋਰ ਦਿੱਤਾ ਕੇ ਜ਼ਮੀਰ ਦੀ ਆਵਾਜ਼ ਸੁਨਣ ਅਤੇ ਜੰਗ 'ਚ ਭਾਗੀਦਾਰ ਨਾ ਬਨਣਾ ਉਹਨਾਂ ਦਾ ਅਧਿਕਾਰ ਹੈ। ਨੌਕਰੀ ਦੇਣ ਵਾਲੀਆਂ ਮੈਨੇਜਮੈਂਟਾਂ ਜਾਂ ਸਰਕਾਰ ਵੱਲੋਂ ਉਹਨਾਂ ਨੂੰ ਧੋਖੇ ਨਾਲ ਜਾਂ ਜਬਰਨ ਜੰਗ ਦੇ ਕੁਕਰਮ 'ਚ ਭਾਗੀਦਾਰ ਬਨਾਉਣ ਦੀਆਂ ਕੋਸ਼ਿਸ਼ਾਂ ਨੂੰ ਉਹ ਰੱਦ ਕਰਦੇ ਹਨ। ਕਾਮਿਆਂ ਦਾ ਕਹਿਣਾ ਹੈ, “ਜੰਗ ਨੂੰ ਟਰਾਂਸਪੋਰਟ ਕਰਨਾ ਸਾਡਾ ਕੰਮ ਨਹੀਂ। ਸਾਡੀ ਇੱਕਮੁੱਠਤਾ ਮਜ਼ਲੂਮਾਂ ਨਾਲ ਹੈ, ਜੰਗ ਦੇ ਮੁਜ਼ਰਮਾਂ ਨਾਲ ਨਹੀਂ।”
ਇਜ਼ਰਾਇਲ ਨੂੰ ਜੰਗੀ ਸਾਮਾਨ ਦੀਆਂ ਖੇਪਾਂ ਭੇਜਣ ਦੀਆਂ ਕੋਸ਼ਿਸ਼ਾਂ ਕਰਨ ਦੇ ਯਤਨਾਂ ਨੂੰ ਨਾਕਾਮ ਕਰਨ ਵਾਲੇ ਐਕਸ਼ਨ ਯੂ.ਕੇ., ਸਵੀਡਨ 'ਚ ਤਾਂ ਗੋਦੀ ਕਾਮਿਆਂ ਨੇ ਵੋਟਾਂ ਰਾਹੀਂ ਇਸ ਮਸਲੇ 'ਤੇ ਰਾਇ-ਸ਼ਮਾਰੀ ਕਰਵਾ ਕੇ, ਇਜ਼ਰਾਇਲ ਨੂੰ ਹਥਿਆਰ ਭੇਜਣ ਉੱਤੇ ਮੁਕੰਮਲ ਰੋਕ ਦਾ ਪ੍ਰਸਤਾਵ ਵੀ ਪਾਸ ਕੀਤਾ।
No comments:
Post a Comment