ਗਾਜ਼ਾ `ਤੇ ਕਹਿਰ ਖਿਲਾਫ਼-
ਹੇਗ ਗਰੁੱਪ ਦੀ ਕਾਨਫਰੰਸ
'ਹੇਗ ਗਰੁੱਪ' ਦੇ ਨਾਂ ਨਾਲ ਜਾਣ ਜਾਂਦੇ ਗਲੋਬਲ ਸਾਊਥ ਕਈ ਦੇਸ਼ਾਂ ਦੀ ਇਸ ਜਥੇਬੰਦੀ ਨੇ 15 ਅਤੇ 16 ਜੁਲਾਈ ਨੂੰ ਫਲਸਤੀਨੀ ਲੋਕਾਂ ਨਾਲ ਯਕਯਹਿਤੀ ਪ੍ਰਗਟ ਕਰਨ ਲਈ ਬੋਗੋਟਾ (ਕੋਲੰਬੀਆ) ਵਿਖੇ ਇੱਕ ਮੰਤਰੀ ਪੱਧਰ ਦੀ ਐਮਰਜੈਂਸੀ ਕਾਨਫਰੰਸ ਬੁਲਾਈ। ਇਸ ਵਿੱਚ 30 ਮੁਲਕਾਂ ਦੇ ਨੁੰਮਾਇੰਦਿਆਂ ਨੇ ਹਿੱਸਾ ਲਿਆ। ਇਹ ਕਾਨਫਰੰਸ ਕੋਲੰਬੀਆ ਅਤੇ ਸਾਊਥ ਅਫ਼ਰੀਕੀ ਸਰਕਾਰਾਂ ਵੱਲੋਂ ਸਾਂਝੇ ਤੌਰ 'ਤੇ ਬੁਲਾਈ ਗਈ ਸੀ। ਕਾਨਫਰੰਸ ਵਿੱਚ ਇਸ ਗੱਲ ਉੱਤੇ ਸਹਿਮਤੀ ਹਾਸਲ ਕੀਤੀ ਜਾ ਸਕੀ ਕਿ ਸਜ਼ਾ ਦੇ ਡਰ ਤੋਂ ਮੁਕਤ (Impunity) ਮਹਿਸੂਸ ਕਰਨ ਦੇ ਦੌਰ ਦਾ ਅੰਤ ਹੋਣਾ ਚਾਹੀਦਾ ਹੈ। ਬਿਨ੍ਹਾਂ ਕਿਸੇ ਡਰ ਜਾਂ ਰਿਆਇਤੀ ਵਿਹਾਰ ਦੇ, ਕੌਮਾਂਤਰੀ ਕਾਨੂੰਨਾਂ ਨੂੰ, ਫੌਰੀ ਲਾਗੂ ਕੀਤੇ ਜਾਣ ਵਾਲੀਆਂ ਘਰੇਲੂ ਨੀਤੀਆਂ ਅਤੇ ਕਾਨੂੰਨੀ ਉਪਾਵਾਂ (ਵਿਵਸਥਾਵਾਂ) ਰਾਹੀਂ, ਅਮਲ 'ਚ ਲਿਆਉਣਾ ਜ਼ਰੂਰੀ ਬਣਾਉਣਾ ਚਾਹੀਦਾ ਹੈ। ਇਸਦੇ ਨਾਲ ਹੀ ਫੌਰੀ ਜੰਗਬੰਦੀ ਲਈ ਸਭ ਵੱਲੋਂ ਸਾਂਝੀ ਮੰਗ ਕੀਤੀ ਜਾਣੀ ਚਾਹੀਦੀ ਹੈ।” ਗਾਜ਼ਾ 'ਚ ਨਸਲਘਾਤ ਰੋਕਣ ਲਈ ਵੀ ਕਾਨਫਰੰਸ 'ਚ ਕਈ ਕਦਮ ਸੁਝਾਏ ਗਏ।
ਜਾਰੀ ਕੀਤੇ ਅੰਤਿਮ ਐਲਾਨਨਾਮੇ 'ਚ ਜੋ ਸਾਂਝੇ ਫੈਸਲੇ ਦਰਜ ਕੀਤੇ ਗਏ, ਉਹਨਾਂ ਨੂੰ ਫੌਰੀ ਲਾਗੂ ਕਰਨ ਲਈ 12 ਮੁਲਕਾਂ ਨੇ ਰਜ਼ਮੰਦੀ ਜਾਹਰ ਕੀਤੀ। ਇਹ ਮੁਲਕ ਹਨ:- ਬੋਲੀਵੀਆ, ਕਿਊਬਾ, ਕੋਲੰਬੀਆ, ਇੰਡੋਨੇਸ਼ੀਆ, ਇਰਾਕ, ਲੀਬੀਆ, ਮਲੇਸ਼ੀਆ, ਨਮੀਬੀਆ, ਨਿਕਾਰਗੂਆ, ਓਮਾਨ, ਸੇਂਟ ਵਿਨਸੈਟ, ਗਰੇਨਾਡਾਈਨਜ਼, ਅਤੇ ਸਾਊਥ ਅਫਰੀਕਾ। ਇਸ ਕਾਨਫਰੰਸ 'ਚ ਸ਼ਾਮਲ ਬਾਕੀ ਮੁਲਕ 20 ਸਤੰਬਰ2025 ਨੂੰ ਜਨਰਲ ਅਸੈਂਬਲੀ ਦੀ ਹੋਣ ਵਾਲੀ ਮੀਟਿੰਗ ਤੱਕ ਆਪਣੀ ਰਾਇ ਸਾਂਝੀ ਕਰ ਸਕਦੇ ਹਨ।
ਕੋਲੰਬੀਆ ਦੇ ਰਾਸ਼ਟਰਪਤੀ ਗੁਸਤਾਵੋ ਪੈਟਰੋ ਨੇ ਕਿਹਾ, “ਅਸੀਂ ਬੋਗੋਟਾ ਵਿੱਚ ਇਤਿਹਾਸ ਰਚ ਦੇਣ ਲਈ ਜੁੜੇ ਸੀ। ਉਹ ਅਸੀਂ ਰਚ ਦਿੱਤਾ ਹੈ। ਅਸੀਂ ਸਾਰਿਆਂ ਨੇ ਰਲ ਕੇ ਸਜ਼ਾ ਤੋਂ ਡਰ-ਮੁਕਤੀ (Impunity) ਦਾ ਦੌਰ ਖਤਮ ਕਰਨ ਦਾ ਕਾਰਜ ਛੂਹ ਲਿਆ ਹੈ। ਸਾਡੇ ਵੱਲੋਂ ਲਏ ਫੈਸਲੇ ਦਿਖਾਉਂਦੇ ਹਨ ਕਿ ਅਸੀਂ ਹੁਣ ਕਿਸੇ ਨੂੰ ਵੀ ਕੌਮਾਂਤਰੀ ਕਾਨੂੰਨਾਂ ਨੂੰ ਤੁੱਛ ਸਮਝਣ ਦੀ ਇਜਾਜ਼ਤ ਨਹੀਂ ਦਿਆਂਗੇ, ਨਾ ਹੀ ਫ਼ਲਸਤੀਨੀ ਜ਼ਿੰਦਗੀਆਂ ਨੂੰ ਬੇਮਾਅਨਾ ਬਨਣ ਦਿਆਂਗੇ।”
ਸਾਊਥ ਅਫ਼ਰੀਕਾ ਦੇ ਵਿਦੇਸ਼ ਮੰਤਰੀ ਨੇ ਕਿਹਾ, “ਇੱਥੇ ਅਸੀਂ ਜੋ ਹਾਸਲ ਕੀਤਾ ਹੈ, ਉਹ ਸਾਡੇ ਵੱਲੋਂ ਸਮੂਹਿਕ ਤੌਰ 'ਤੇ ਇਸ ਗੱਲ 'ਤੇ ਮੋਹਰ ਲਾਉਣਾ ਹੈ ਕਿ ਕੋਈ ਵੀ ਰਾਜ (ਦੇਸ਼) ਕਾਨੂੰਨ ਤੋਂ ਉੱਪਰ ਨਹੀਂ ਹੈ। ਹੇਗ ਗਰੁੱਪ ਦਾ ਜਨਮ ਸਜ਼ਾ ਦੇ ਡਰ ਤੋਂ ਬੇਫ਼ਿਕਰੀ ਦੇ ਦੌਰ 'ਚ ਕੌਮਾਂਤਰੀ ਕਾਨੂੰਨ ਦੀ ਮਹੱਤਤਾ ਨੂੰ ਸਥਾਪਤ ਕਰਨਾ ਸੀ। ਬੋਗੋਟਾ 'ਚ ਲਏ ਫੈਸਲੇ ਦਰਸਾਉਂਦੇ ਹਨ ਕਿ ਅਸੀਂ ਇਸ ਬਾਰੇ ਗੰਭੀਰ ਹਾਂ ਅਤੇ ਇਹ ਕੇ ਇਹਨਾਂ ਰਾਜਾਂ ਵੱਲੋਂ ਆਪਸੀ ਤਾਲਮੇਲ ਰਾਹੀਂ ਐਕਸ਼ਨ ਕਰਨ ਸੰਭਵ ਹੈ।”
ਹੇਗ ਗਰੁੱਪ ਦੇ ਇਹ ਫ਼ੈਸਲੇ ਕਾਫੀ ਮਹੱਤਵਪੂਰਨ ਹਨ। ਇਹ ਪਹਿਲਾ ਅਜਿਹਾ ਬਹੁਧਿਰੀ ਰਲਵਾਂ ਉੱਦਮ ਹੈ ਜਿਹੜਾ ਇਜ਼ਰਾਈਲ ਅਤੇ ਹੋਰਨਾਂ ਦੇ ਕੌਮਾਂਤਰੀ ਕਾਨੂੰਨਾਂ ਅਤੇ ਫੈਸਲਿਆਂ ਨੂੰ ਟਿੱਚ ਸਮਝਣ ਦੀ ਬਿਰਤੀ ਨੂੰ ਸਮੂਹਿਕ ਚੁਣੌਤੀ ਦੇਣ ਦਾ ਉਪਰਾਲਾ ਹੈ। ਇਹ ਉੱਦਮ ਹੋਰਾਂ ਨੂੰ ਆਪਹੁਦਰਾਸ਼ਾਹੀ ਦੇ ਖ਼ਿਲਾਫ਼ ਉੱਠ ਖੜ੍ਹਣ ਦਾ ਉਤਸ਼ਾਹ ਤੇ ਹੌਂਸਲਾ ਅਤੇ ਨਾਲ ਹੀ ਥੜ੍ਹਾ ਵੀ ਮੁਹੱਈਆ ਕਰਦਾ ਹੈ। ਭਾਰਤ ਹਾਕਮ ਅਜਿਹੇ ਕਿਸੇ ਵੀ ਉੱਦਮਾਂ 'ਚ ਸ਼ੁਮਾਰ ਹੋਣ ਦੀ ਥਾਂ ਕੌਮਾਂਤਰੀ ਧੌਂਸਬਾਜ਼ਾਂ ਅਤੇ ਆਪਹੁਦਰਾਸ਼ਾਹੀ ਦੇ ਪਾਲੇ 'ਚ ਖੜ੍ਹੇ ਹਨ। ਇਹਨਾਂ ਮੁਲਕਾਂ ਵੱਲੋਂ ਅਜਿਹੀ ਕਾਰਵਾਈ ਏਥੋਂ ਦੀ ਆਵਾਮ ਅੰਦਰ ਗਾਜ਼ਾ 'ਚ ਹੋ ਰਹੇ ਜੁਲਮਾਂ ਪ੍ਰਤੀ ਸਰੋਕਾਰਾਂ ਨੂੰ ਹੁੰਗਾਰਾ ਦੇਣ ਦੀ ਜ਼ਰੂਰਤ 'ਚੋਂ ਉਪਜੀ ਹੈ। ਚਾਹੇ ਇਹ ਰਸਮੀ ਵੀ ਹੋਵੇ ਤਾਂ ਵੀ ਮੌਜੂਦਾ ਦੌਰ 'ਚ ਅਜਿਹੀਆਂ ਕਾਰਵਾਈਆਂ ਦਾ ਵੀ ਮਹੱਤਵ ਹੈ।
No comments:
Post a Comment