ਸੀਰੀਆ ਅੰਦਰ ਅਮਰੀਕਾ ਦੇ ਜੰਗੀ ਅਪਰਾਧ ਜੋ ਮੀਡੀਆ ਲਈ ਖਬਰ ਨਹੀਂ ਬਣੇ

ਸੀਰੀਆ ਅੰਦਰ ਅਮਰੀਕਾ ਦੇ ਜੰਗੀ ਅਪਰਾਧ  ਜੋ ਮੀਡੀਆ ਲਈ ਖਬਰ ਨਹੀਂ ਬਣੇ

ਜੂਨ ਦੇ ਪਹਿਲੇ ਹਫਤੇ ਮਨੁੱਖੀ ਅਧਿਕਾਰ ਗਰੁੱਪਾਂ ਵੱਲੋਂ ਰਿਪੋਰਟ ਪ੍ਰਕਾਸ਼ਤ ਕੀਤੀ ਗਈ ਹੈ ਜੋ ਐਮਨੈਸਟੀ ਇੰਟਰਨੈਸ਼ਨਲ ਵੱਲੋਂ ਕੀਤੀ ਤੱਥ ਖੋਜ ’ਤੇ ਅਧਾਰਤ ਹੈ। ਇਸ ਰਿਪੋਰਟ ਅੰਦਰ  ਅਮਰੀਕਾ ਨੂੰ ਸੀਰੀਆ ਅੰਦਰ ਅਪਰਾਧਾਂ ਦਾ ਦੋਸ਼ੀ ਪਾਇਆ ਗਿਆ ਹੈ। ਪਰ ਜਿਸ ਮੀਡੀਆ ਨੇ ਡੋਉਮਾ ਅੰੰਦਰ ਅਸਦ ਹਕੂਮਤ ਵੱਲੋਂ ਕੀਤੇ ਕਥਿੱਤ ਕੈਮੀਕਲ ਹਮਲੇ ਬਾਰੇ ਹੱਦੋਂ ਵੱਧ ਬੂ-ਪਾਹਰਿਆ ਮਚਾਈ ਸੀ ਉਸ ਨੇ ਰਾਕਾ ਅੰਦਰ ਅਮਰੀਕੀ ਫੌਜ ਦੇ ਜੰਗੀ ਅਪਰਾਧਾਂ ਬਾਰੇ ਬੇਸ਼ਰਮ ਚੁੱਪ ਧਾਰੀ ਹੋਈ ਹੈ।

          ਇਸ ਰਿਪੋਰਟ ਮੁਤਾਬਕ ਸੀਰੀਆ ਅੰਦਰ  ਪਿਛਲੇ ਸਾਲ ਇਸਲਾਮਿਕ ਸਟੇਟ ਦੇ ਲੜਾਕਿਆਂ ਖਿਲਾਫ ਫੌਜੀ ਕਾਰਵਈ ਦੇ ਨਾਂ ਹੇਠ ਅਮਰੀਕਾ ਵੱਲੋਂ ਸੀਰੀਆਈ ਲੋਕਾਂ ਖਿਲਾਫ ਵੱਡੇ ਜੰਗੀ ਅਪਰਾਧ ਕੀਤੇ ਗਏ ਹਨ। ਅਮਨੈਸਟੀ ਇੰਟਰਨੈਸ਼ਨਲ ਦੀ ਟੀਮ ਨੇ ਇਹ ਤੱਥ ਰਾਕਾ ਸ਼ਹਿਰ ’ਚ ਹਵਾਈ ਹਮਲੇ ਦੀ ਮਾਰ ਹੇਠ ਆਈਆਂ 42 ਥਾਵਾਂ ਦਾ ਦੌਰਾ ਕਰਕੇ ਤੇ ਇਹਨਾਂ ਹਮਲਿਆਂ ’ਚੋਂ ਬਚੇ 112 ਲੋਕਾਂ ਨਾਲ ਗਲਬਾਤ ਦੇ ਅਧਾਰ ’ਤੇ ਇਕੱਤਰ ਕੀਤੇ ਹਨ। ਇਹਨਾਂ ਮੁਤਾਬਕ 4 ਮਹੀਨੇ ਰਾਕਾ ’ਤੇ ਕਬਜੇ ਦੀ ਲੜਾਈ ਦੌਰਾਨ ਅਮਰੀਕਾ ਨੇ ਸਿਵਲੀਅਨਾਂ ਦੀ ਪ੍ਰਵਾਹ ਕੀਤੇ ਬਿਨਾ ਹਵਾਈ ਹਮਲੇ ਕੀਤੇ ਤੇ ਹਜ਼ਾਰਾਂ ਸਧਾਰਨ ਨਾਗਰਿਕਾਂ ਨੂੰ ਮਾਰ ਦਿੱਤਾ, ਭਾਵੇਂ ਅਮਰੀਕਾ ਨੇ ਰਾਕਾ ’ਤੇ ਕਬਜਾ ਜ਼ਮੀਨੀ ਫੌਜ ਰਾਹੀਂ ਕੀਤਾ ਪਰ ਉਹਨਾਂ ਦਾ ਕੰਮ ਸਹਿਲ ਕਰਨ ਲਈ ਵੱਡੀ ਪੱਧਰ ’ਤੇ ਹਵਾਈ ਹਮਲੇ ਕੀਤੇ ਗਏ। ਅਮਰੀਕਾ ਵੱਲੋਂ ਕੀਤੇ ਦਾਅਵੇ ਕਿ ਰਾਕਾ ਅੰਦਰ ਸਿਰਫ 32 ਸਧਾਰਨ ਨਾਗਰਿਕ ਮਾਰੇ ਗਏ ਦੇ ਉਲਟ ਏਅਰ ਵਾਰਜ਼ ਮੁਤਾਬਕ ਇਸ ਹਮਲੇ ਵਿਚ 1400 ਸਿਵਲੀਅਨ ਮਾਰੇ ਗਏ ਹਨ। ਪਹਿਲੀ ਸੱਟੇ ਮਲਬੇ ’ਚੋਂ 500 ਲਾਸ਼ਾਂ ਮਿਲੀਆਂ ਤੇ ਸੈਂਕੜੇ ਹੋਰ ਬਾਅਦ ’ਚ ਲਭਦੀਆਂ ਰਹੀਆਂ। ਰਿਪੋਰਟ ਨੇ ਅਮਰੀਕੀ ਸਾਰਜੰਟ ਮੇਜਰ ਜੌਹਨ ਟਰੌਕਸਲ ਦਾ ਹਵਾਲਾ ਦਿੱਤਾ ਹੈ ਜਿਸ ਅਨੁਸਾਰ ਅਮਰੀਕੀ ਫੌਜ ਨੇ ਇਹਨਾਂ ਚਾਰ ਮਹੀਨਿਆਂ ਦੌਰਾਨ 30000 ਗੋਲੀਆਂ ਦਾਗੀਆਂ। ਉਸ ਮੁਤਾਬਕ ਵੀਅਤਨਾਮ ਤੋਂ ਬਾਅਦ ਸਭ ਤੋਂ ਵੱਡਾ ਹਵਾਈ ਹਮਲਾ ਸੀ ਜਦੋਂ ਹਰ  ਘੰਟੇ ਦੇ ਹਰ ਮਿੰਟ ਹੀ ਬੰਬ, ਗੋਲੀਆਂ, ਡਰੋਨ , ਮਿਜ਼ਾਈਲਾਂ ਰਾਕਟ ਤੇ ਗੈਸ ਵਰ੍ਹਾਏ ਜਾਂਦੇ ਰਹੇ ਹਨ। ਰਾਕਾ ਸ਼ਹਿਰ ਦਾ ਇਹ 80 ਫੀਸਦੀ ਹਿੱਸਾ ਪੂਰੀ ਤਰ੍ਹਾਂ ਮਿੱਟੀ ’ਚ ਮਿਲਾ ਦਿੱਤਾ  ਗਿਆ, 11000 ਇਮਾਰਤਾਂ ਪੂਰੀ ਤਰ੍ਹਾਂ ਢਹਿ ਢੇਰੀ ਹੋ ਗਈਆਂ।

          ਜੰਗ ਤੋਂ ਪਹਿਲਾਂ ਰਾਕਾ ਸ਼ਹਿਰ ਦੀ ਆਬਾਦੀ 340000 ਸੀ ਜੋ ਬਾਅਦ ਵਿਚ ਇਕ ਲੱਖ ਤੋਂ ਵੀ ਘੱਟ ਰਹਿ ਗਈ। ਸ਼ਹਿਰ ਵਿਚ ਵਾਪਸ ਮੁੜਨ ਵਾਲਿਆਂ ਦੀਆਂ ਮੌਤਾਂ ਦਾ ਸਿਲਸਿਲਾ ਅਜੇ ਵੀ ਜਾਰੀ ਹੈ ਕਿਉਕਿ ਅਮਰੀਕਾ ਵੱਲੋਂ ਸੁੱਟੇ ਅਣਚੱਲੇ ਬੰਬ ਤੇ ਮਿਜ਼ਾਈਲਾਂ ਥਾਂ ਪੁਰ ਥਾਂ ਖਿੰਡੇ ਹੋਏ ਹਨ। ਆਈ ਐਸ ਆਈ ਐਸ ਵੱਲੋਂ ਸ਼ਹਿਰ ਅੰਦਰ ਵਿਛਾਈਆਂ ਸੁਰੰਗਾਂ ਵੀ ਫਟਦੀਆਂ ਰਹਿੰਦੀਆਂ ਹਨ। ਅਮਨੈਸਟੀ ਇੰਟਰਨੈਸ਼ਨਲ ਵੱਲੋਂ ਇੱਕ ਅਜਿਹੇ ਪਰਿਵਾਰ ਦੇ ਬਚ ਰਹੇ ਲੋਕਾਂ ਨਾਲ ਮੁਲਾਕਾਤ ਕੀਤੀ ਜਿਸ ਨੇ ਆਪਣੇ 39 ਜੀਅ ਅਮਰੀਕੀ ਹਵਾਈ ਹਮਲਿਆਂ ਵਿਚ ਗੁਆਏ ਸਨ। ਇਸ ਪਰਿਵਾਰ ਦੇ ਮ੍ਰਿਤਕਾਂ ਵਿਚ ਵੱਡੀ ਗਿਣਤੀ ਔਰਤਾਂ ਅਤੇ ਬੱਚੇ ਸਨ। ਇਹਨਾਂ ਦੇ ਦੱਸਣ ਮੁਤਾਬਕ ਪਰਿਵਾਰ ਚਾਰ ਹਵਾਈ ਹਮਲਿਆਂ ਦਾ ਸ਼ਿਕਾਰ ਹੋਇਆ। ਇਸਦੇ ਕੁੱਝ ਮੈਂਬਰ ਉਦੋਂ ਮਾਰੇ ਗਏ ਜਦੋਂ ਉਹ ਬਚਣ ਲਈ ਇਕ ਤੋਂ ਦੂਜੀ ਥਾਂ ਤੱਕ ਭੱਜ-ਨੱਠ ਕਰ ਰਹੇ ਸਨ ਤੇ ਕੁੱਝ ਔਰਤਾਂ ਤੇ ਬੱਚੇ ਜਿਨ੍ਹਾਂ ਨੂੰ ਸੁਰੱਖਿਅਤ ਰੱਖਣ ਲਈ ਗੁਆਂਢ ਦੇ ਘਰਾਂ ਵਿਚ ਬਿਠਾਇਆ।ਗਿਆ ਸੀ, ਉਨ੍ਹਾਂ ਘਰਾਂ ਉਤੇ ਬੰਬਾਰੀ ਦੌਰਾਨ ਮਾਰੇ ਗਏ ।

          ਇਸ ਰਿਪੋਰਟ ਅੰਦਰ ਧਿਆਨ ਦਿਵਾਇਆ ਗਿਆ ਕਿ ਰਾਕਾ ਉਤੇ ਹਵਾਈ ਹਮਲੇ  ਉਦੋਂ ਵੀ ਜਾਰੀ ਰਹੇ ਜਦੋਂ ਅਮਰੀਕੀ ਫੌਜ ਅਤੇ ਇਸਦੀ ਸਹਾਇਕ ਸੀਰੀਅਨ ਡੈਮੋਕਰੇਟਿਕ ਫੋਰਸ ਦੀ ਆਈ ਐਸ ਆਈ ਐਸ ਨਾਲ ਸਮਝੌਤੇ ਬਾਰੇ ਗੱਲਬਾਤ ਚੱਲ ਰਹੀ ਸੀ। ਇਸ ਸਮਝੌਤੇ ਤਹਿਤ ਜਿਸ ਇਸਲਾਮਿਕ ਸਟੇਟ ਖਿਲਾਫ ਲੜਾਈ ਦਾ ਨਾਂ ਲੈ ਕੇ ਰਾਕਾ ਉਪਰ ਹਮਲਾ ਵਿੱਢਿਆ ਗਿਆ ਸੀ ਉਸ ਦੇ ਲੜਾਕਿਆਂ ਨੂੰ ਬੱਸਾਂ ਦੇ ਕਾਫਲੇ ਰਾਹੀਂ ਸ਼ਹਿਰ ’ਚੋਂ ਕੱਢ ਕੇ ਪੂਰਬੀ ਖੇਤਰ ਦੀਆਂ ਉਹਨਾਂ ਥਾਵਾਂ ਤੱਕ ਲਿਜਾਇਆ ਗਿਆ ਜੋ ਅਜੇ ਵੀ ਆਈ ਐਸ ਆਈ ਐਸ ਦੇ ਕਬਜੇ ਹੇਠ ਸਨ। ਅਮਰੀਕਾ-ਸੀਰੀਅਨ ਡੈਮੋਕਰੇਟਿਕ ਫੋਰਸ ਗੱਠਜੋੜ ਨੇ ਅਜੇ ਤੱਕ ਇਹ ਨਹੀਂ ਦੱਸਿਆ ਕਿ ਆਈ ਐਸ ਦੇ ਲੜਾਕਿਆਂ ਨਾਲ ਸੁਰੱਖਿਅਤ ਲਾਂਘਾ ਦੇਣ ਦੇ ਸਮਝੌਤੇ ਦੇ ਬਾਵਜੂਦ ਸ਼ਹਿਰ ਉਪਰ ਬੰਬਾਰੀ ਕਿਉ ਜਾਰੀ ਰੱਖੀ ਗਈ ਜਿਸ ਨੇ ਹਜ਼ਾਰਾਂ ਨਾਗਰਿਕਾਂ ਨੂੰ ਮਾਰ ਦਿੱਤਾ। ਇਹਨਾਂ ਹਮਲਿਆਂ ਤੋਂ ਬਚਣ ਵਾਲੇ ਅਨੇਕਾਂ ਵਿਅਕਤੀਆਂ ਨੇ ਅਮਨੈਸਟੀ ਇੰਟਰਨੈਸ਼ਨਲ ਤੋਂ ਸੁਆਲ ਪੁਛਿਆ ਕਿ ਜਿਨ੍ਹਾਂ ਆਈ ਐਸ ਲੜਾਕਿਆਂ ਦੇ ਨਾਂ ’ਤੇ ਸਾਰਾ ਸ਼ਹਿਰ ਤਬਾਹ ਕੀਤਾ ਗਿਆ, ਉਹਨਾਂ ਨੂੰ ਫੇਰ ਸੁਰੱਖਿਅਤ ਲਾਂਘਾ ਕਿਉ ਦਿੱਤੀ ਗਿਆ? ਦਰਅਸਲ ਅਮਰੀਕਾ ਇਹਨਾਂ ਆਈ ਐਸ ਲੜਾਕਿਆਂ ਦੀ ਵਰਤੋਂ ਪੂਰਬੀ ਖੇਤਰਾਂ ਵਿਚ ਅਸਦ ਹਕੂਮਤ ਦੀ ਪੇਸ਼ਕਦਮੀ ਰੋਕਣ ਲਈ ਕਰਨਾ ਚਾਹੁੰਦਾ ਸੀ। ਇਹੀ ਉਸ ਦਾ ਆਈ ਐਸ ਨਾਲ ਸਮਝੌਤਾ ਸੀ।

ਅਮਰੀਕੀ ਰੱਖਿਆ ਸਕੱਤਰ ਜੇਮਜ਼ ਮੈਟਿਸ ਨੇ ਆਈ ਐਸ ਆਈ ਐਸ ਖਿਲਾਫ ਇਸ ਹਮਲੇ ਨੂੰ ‘ਖਾਤਮੇ ਦੀ ਜੰਗ’ ਕਿਹਾ ਸੀ। ਐਮਨੈਸਟੀ ਇੰਟਰਨੈਸ਼ਨਲ ਦੇ ਤੱਥਾਂ ’ਤੇ ਅਧਾਰਤ ਇਸ ਰਿਪੋਰਟ ਦਾ ਸਿਰਲੇਖ ਵੀ ਸਿਵਲੀਅਨਾਂ ਦੀ ਤਬਾਹੀ ਦਾ ਹਵਾਲਾ ਦਿੰਦੇ ਹੋਏ ‘ਖਾਤਮੇ ਦੀ ਜੰਗ’ ਹੀ ਰੱਖਿਆ ਗਿਆ ਹੈ