ਮੈਂ ਵਹਿਮਾਂ-ਭਰਮਾਂ ਦੇ ਖਿਲਾਫ ਕਿਸਾਨਾਂ ਵਿੱਚ ਕੁੱਝ ਪ੍ਰਚਾਰ ਕੀਤਾ
-ਕਾਮਰੇਡ ਮਾਓ
ਜਦੋਂ ਮੈਂ ਪੇਂਡੂ ਇਲਾਕੇ ਵਿੱਚ ਸੀ, ਮੈਂ ਵਹਿਮਾਂ-ਭਰਮਾਂ ਦੇ ਖਿਲਾਫ ਕਿਸਾਨਾਂ ਵਿੱਚ ਕੁੱਝ ਪ੍ਰਚਾਰ ਕੀਤਾ। ਮੈਂ ਕਿਹਾ: ਜੇ ਕੋਈ ਅੱਠ ਅੱਖਰਾਂ ਵਿੱਚ ਵਿਸ਼ਵਾਸ਼ ਰੱਖਦਾ ਹੈ ਤਾਂ ਉਹ ਖੁਸ਼ਕਿਸਮਤੀ ਦੀ ਆਸ ਰੱਖ ਸਕਦਾ ਹੈ। (ਕਿਸਮਤ ਦੇ ਚਾਰ ਥੰਮ੍ਹ, ਚੀਨੀ ਜੋਤਿਸ਼ ਦਾ ਮਹੱਤਵਪੂਰਨ ਅੰਗ ਹੈ। ਚੀਨੀ ਸੂਰਜੀ ਕਲੰਡਰ ਦੇ ਹਿਸਾਬ ਨਾਲ ਜਨਮ ਦਾ ਸਾਲ, ਮਹੀਨਾ, ਦਿਨ ਅਤੇ ਘੰਟਾ, ਇਹ ਚਾਰ ਥੰਮ੍ਹ ਬਣਦੇ ਹਨ, ਜਿਹਨਾਂ ਦੇ ਹਿਸਾਬ ਨਾਲ ਚੀਨੀ ਜੋਤਿਸ਼ੀ ਕਿਸੇ ਲਈ ਚੰਗੀ ਜਾਂ ਮਾੜੀ ਭਵਿੱਖਬਾਣੀ ਕਰਦੇ ਸਨ। ਉਵੇਂ ਜਿਵੇਂ ਸਾਡੇ ਜੋਤਿਸ਼ੀ ਬਾਰਾਂ ਰਾਸ਼ੀਅÎਾਂ ਦੇ ਹਿਸਾਬ ਨਾਲ ਭਵਿੱਖ-ਬਾਣੀ ਕਰਦੇ ਹਨ।) ਜੇ ਕੋਈ ਇਸ ਗੱਲ ਵਿੱਚ ਵਿਸ਼ਵਾਸ਼ ਰੱਖਦਾ ਹੈ ਕਿ ਉਹਨਾਂ ਦੇ ਵੱਡ-ਵਡੇਰਿਆਂ ਦੀਆਂ ਕਬਰਾਂ ਦੀ ਵਿਸ਼ੇਸ਼ ਭੁਗੋਲਿਕ ਸਥਿਤੀ ਅਤੇ ਆਲਾ-ਦੁਆਲਾ ਉਹਨਾਂ ਦੀ ਕਿਸਮਤ ਉੱਤੇ ਅਸਰ ਪਾਉਂਦਾ ਹੈ ਤਾਂ ਇਸ ਸਥਿਤੀ ਅਤੇ ਆਲਾ-ਦੁਆਲੇ ਦੇ ਸ਼ੁਭ ਹੋਣ ਤੋਂ ਉਹ ਚੰਗੀ ਕਿਸਮਤ ਦੀ ਆਸ ਰੱਖ ਸਕਦਾ ਹੈ। ਇਸ ਸਾਲ ਕੁੱਝ ਮਹੀਨਿਆਂ ਦੇ ਵਕਫੇ ਨਾਲ ਹੀ ਸਥਾਨਕ ਜ਼ਾਲਮ, ਬੁਰੇ ਸ਼ਰੀਫਜ਼ਾਦੇ ਅਤੇ ਭ੍ਰਿਸ਼ਟ ਅਫਸਰ ਸਾਰੇ ਦੇ ਸਾਰੇ ਮਾਨ-ਸਨਮਾਨ ਦੇ ਰੁਤਬਿਆਂ ਤੋਂ ਉਲਟਾ ਦਿੱਤੇ ਗਏ ਹਨ। ਕੀ ਇਹ ਸੰਭਵ ਹੈ ਕਿ ਅਜੇ ਕੁੱਝ ਮਹੀਨੇ ਪਹਿਲਾਂ ਹੀ ਉਹ ਸਾਰੇ ਖੁਸ਼ਕਿਸਮਤ ਸਨ ਅਤੇ ਆਪਣੇ ਵੱਡ-ਵਡੇਰਿਆਂ ਦੀਆਂ ਕਬਰਾਂ ਦੀ ਸ਼ੁਭ ਭੂਗੋਲਿਕ ਸਥਿਤੀ ਦਾ ਆਨੰਦ ਮਾਣਦੇ ਸਨ ਜਦ ਕਿ ਪਿਛਲੇ ਕੁੱਝ ਮਹੀਨਿਆਂ ਵਿੱਚ ਇੱਕਦਮ ਉਹਨਾਂ ਦੀ ਕਿਸਮਤ ਪਲਟਾ ਖਾ ਗਈ ਅਤੇ ਉਹਨਾਂ ਵੱਡ ਵਡੇਰਿਆਂ ਦੀਆਂ ਕਬਰਾਂ ਨੇ ਉਹਨਾਂ ਉੱਤੇ ਸ਼ੁਭ ਅਸਰ ਪਾਉਣਾ ਬੰਦ ਕਰ ਦਿੱਤਾ?
ਸਥਾਨਕ ਜ਼ਾਲਮ ਅਤੇ ਬੁਰੇ ਸ਼ਰੀਫਜ਼ਾਦੇ ਤੁਹਾਡੀ ਕਿਸਾਨ ਯੂਨੀਅਨ ਦਾ ਮੁੰਹ ਚਿੜਾਉਂਦੇ ਹਨ ਅਤੇ ਕਹਿੰਦੇ ਹਨ, 'ਕਿੱਡੀ ਕਲੱਲੀ ਗੱਲ ਹੈ! ਅੱਜ ਦੀ ਦੁਨੀਆਂ ਕਮੇਟੀ ਦੇ ਬੰਦਿਆਂ ਦੀ ਦੁਨੀਆਂ ਹੈ, ਦੇਖੋ, ਤੁਸੀਂ ਕਿਸੇ ਕਮੇਟੀ ਦੇ ਬੰਦੇ ਵਿੱਚ ਵੱਜੇ ਬਿਨਾ ਪਿਸ਼ਾਬ ਕਰਨ ਵੀ ਨਹੀਂ ਜਾ ਸਕਦੇ!' ਗੱਲ ਐਨ ਸਹੀ ਹੈ, ਸ਼ਹਿਰ ਅਤੇ ਕਸਬੇ, ਟਰੇਡ ਯੂਨੀਅਨਾਂ ਅਤੇ ਕਿਸਾਨ ਯੂਨੀਅਨਾਂ, ਕੌਮਿੰਨਤਾਂਗ ਅਤੇ ਕਮਿਊਨਿਸਟ ਪਾਰਟੀ, ਬਿਨਾ ਛੋਟ, ਸਾਰਿਆਂ ਦੇ ਕਾਰਜਕਾਰੀ ਕਮੇਟੀ ਮੈਂਬਰ ਹਨ, ਇਹ ਅਸਲ ਵਿੱਚ ਕਮੇਟੀਆਂ ਦੇ ਬੰਦਿਆਂ ਦੀ ਦੁਨੀਆ ਹੈ। ਪਰ ਕੀ ਇਹ ਅੱਠ ਅੱਖਰਾਂ ਅਤੇ ਵੱਡ-ਵਡੇਰਿਆਂ ਦੀਆਂ ਕਬਰਾਂ ਦੀ ਸਥਿਤੀ ਦੇ ਕਾਰਨ ਹੈ? ਕਿੱਡੀ ਅਜੀਬ ਗੱਲ ਹੈ। ਪੇਂਡੂ ਇਲਾਕਿਆਂ ਦੇ ਸਭ ਗਰੀਬ ਦੁਖਿਆਰਿਆਂ ਦੇ ਅੱਠ ਅੱਖਰ ਇੱਕਦਮ ਸ਼ੁਭ ਹੋ ਗਏ ਹਨ! ਅਤੇ ਉਹਨਾਂ ਦੇ ਵੱਡ-ਵਡੇਰਿਆਂ ਦੀਆਂ ਕਬਰਾਂ ਨੇ ਇੱਕਦਮ ਸ਼ੁਭ ਅਸਰ ਪਾਉਣਾ ਸ਼ੁਰੂ ਕਰ ਦਿੱਤਾ ਹੈ। ਦੇਵਤੇ? ਹਰ ਤਰੀਕੇ ਨਾਲ ਉਹਨਾਂ ਨੂੰ ਪੂਜੋ। ਪਰ ਜੇ ਥੋਡੇ ਕੋਲ ਸਿਰਫ ਭਗਵਾਨ ਕੁਆਨ ਅਤੇ ਰਹਿਮ ਦੀ ਦੇਵੀ ਹੀ ਹੁੰਦੀ ਅਤੇ ਕੋਈ ਕਿਸਾਨ ਯੂਨੀਅਨ ਨਾ ਹੁੰਦੀ ਕੀ ਤੁਸੀਂ ਸਥਾਨਕ ਜ਼ਾਲਮਾਂ ਅਤੇ ਬੁਰੇ ਸ਼ਰੀਫਜ਼ਾਦਿਆਂ ਨੂੰ ਉਲਟਾ ਸਕਦੇ ਸੀ? ਦੇਵੀ ਅਤੇ ਦੇਵਤੇ ਅਸਲ ਵਿੱਚ ਵਿਚਾਰੇ ਤਰਸਯੋਗ ਚੀਜ਼ਾਂ ਹਨ। ਤੁਸੀਂ ਉਹਨਾਂ ਨੂੰ ਸਦੀਆਂ ਤੋਂ ਪੂਜਦੇ ਆ ਰਹੇ ਹੋ ਅਤੇ ਉਹਨਾਂ ਨੇ ਤੁਹਾਡੇ ਖਾਤਰ ਇੱਕ ਵੀ ਸਥਾਨਕ ਜ਼ਾਲਮ ਜਾਂ ਬੁਰੇ ਸ਼ਰੀਫਜ਼ਾਦੇ ਨੂੰ ਨਹੀਂ ਉਲਟਾਇਆ। ਹੁਣ ਤੁਸੀਂ ਆਪਣਾ ਭੋਇੰ-ਲਗਾਨ ਘਟਾਉਣਾ ਹੈ। ਮੈਂ ਪੁੱਛਦਾ ਹਾਂ ਹੁਣ ਤੁਸੀਂ ਕਿਵੇਂ ਚੱਲੋਗੇ? ਕੀ ਤੁਸੀਂ ਦੇਵਤਿਆਂ ਵਿੱਚ ਵਿਸ਼ਵਾਸ਼ ਕਰੋਗੇ ਜਾਂ ਕਿਸਾਨ ਯੂਨੀਅਨ ਵਿੱਚ?
ਮੇਰੇ ਸ਼ਬਦਾਂ ਨੇ ਕਿਸਾਨਾਂ ਨੂੰ ਠਹਾਕਾ ਮਾਰ ਕੇ ਹਸਾ ਦਿੱਤਾ।
(ਕਾਮਰੇਡ ਮਾਓ ਦੀ ਲਿਖਤ, ''ਹੂਨਾਨ ਵਿੱਚ ਕਿਸਾਨ ਲਹਿਰ ਦੀ ਜਾਂਚ ਪੜਤਾਲ ਬਾਰੇ ਇੱਕ ਰਿਪੋਰਟ ਵਿੱਚੋਂ, ਗਰੰਥ ਪਹਿਲਾ) (ਨੋਟ ਬਰੈਕਟ ਵਿਚਲੀਆਂ ਸਤਰਾਂ ਅਨੁਵਾਦਕ ਵੱਲੋਂ ਹਨ।)
