ਫਸਲੀ ਵੰਨ-ਸੁਵੰਨਤਾ ਦਾ ਅਰਥ
ਫਸਲੀ ਵੰਨ-ਸੁਵੰਨਤਾ ਦਾ ਅਰਥ ਹੈ- ਵੰਨ-ਸਵੰਨੀਆਂ ਫਸਲਾਂ ਪੈਦਾ ਕਰਨਾ। ਹਾੜ੍ਹੀ ਤੇ ਸੌਣੀ ਦੇ ਫਸਲੀ ਚੱਕਰ ਨੂੰ ਬਦਲਦੇ ਰਹਿਣਾ। ਇਸ ਹਿਸਾਬ ਨਾਲ ਬਦਲਦੇ ਰਹਿਣਾ ਕਿ ਜ਼ਮੀਨ ਦੀ ਉਪਜਾਊ ਸ਼ਕਤੀ ਨਵਿਆਈ ਜਾਂਦੀ ਰਹੇ। ਪਾਣੀ ਦੇ ਹਾਸਲ ਮੁਲਕੀ ਸੋਮਿਆਂ ਦੀ ਭਰਪੂਰ ਵਰਤੋਂ ਵੀ ਹੋ ਸਕੇ ਤੇ ਉਹਨਾਂ ਨੂੰ ਖੋਰਾ ਵੀ ਨਾ ਲੱਗੇ। ਸਗੋਂ ਸਿੰਜਾਈ ਸਮਰੱਥਾ ਵਿੱਚ ਲੋੜੀਂਦਾ ਵਾਧਾ ਹੁੰਦਾ ਰਹਿ ਸਕੇ। ਹਾਸਲ ਪੌਣ-ਪਾਣੀ ਅਤੇ ਵਾਤਾਵਰਣ ਦੀ ਵੰਨ-ਸੁਵੰਨਤਾ ਅਤੇ ਸ਼ੁੱਧਤਾ ਨੂੰ ਵਿਗਾੜਨ ਤੇ ਪ੍ਰਦੂਸ਼ਤ ਕਰਨ ਦਾ ਕਾਰਨ ਨਾ ਬਣੇ। ਇਸਦਾ ਅਰਥ ਹੈ, ਫਸਲੀ ਵੰਨ-ਸੁਵੰਨਤਾ ਦੀ ਅਜਿਹੀ ਢੁੱਕਵੀਂ ਚੋਣ ਕਰਨੀ ਜਿਸ ਨਾਲ ਖੇਤੀ ਕਿੱਤੇ ਵਿੱਚ ਆਪਣੀ ਮਿਹਨਤ-ਸ਼ਕਤੀ, ਹੁਨਰ ਅਤੇ ਪੂੰਜੀ ਨੂੰ ਝੋਕਣ ਵਾਲੀ ਮਿਹਨਤਕਸ਼ ਕਿਸਾਨੀ ਅਤੇ ਕਾਮਾ-ਸ਼ਕਤੀ ਦੀ ਕਿਰਤ-ਕਮਾਈ ਵਿੱਚ ਬਰਕਤ ਆਵੇ। ਇਸ ਮਿਹਨਤਕਸ਼ ਲੋਕਾਈ ਦਾ ਸਮਾਜਿਕ,ਆਰਥਿਕ ਤੇ ਸੱਭਿਆਚਾਰਕ ਵਿਕਾਸ ਯਕੀਨੀ ਬਣਦਾ ਹੋਵੇ। ਮੁਲਕ ਦੀ ਕੁੱਲ ਆਬਾਦੀ ਦੀਆਂ ਵੰਨ-ਸੁਵੰਨੀਆਂ ਖਾਧ-ਖੁਰਾਕੀ ਲੋੜਾਂ ਦੀ ਪੂਰਤੀ ਯਕੀਨੀ ਬਣਦੀ ਹੋਵੇ। ਸਨਅੱਤੀ ਵਿਕਾਸ ਦੀਆਂ ਮੁਲਕੀ ਲੋੜਾਂ ਲਈ ਖੇਤੀ ਸੈਕਟਰ ਵੱਲੋਂ ਕੱਚਾ ਮਾਲ ਮੁਹੱਈਆ ਕਰਨ ਵਿੱਚ ਕੋਈ ਕਸਰ ਬਾਕੀ ਨਾ ਰਹੇ। ਮੁਲਕ ਦੇ ਖਾਧ-ਖੁਰਾਕੀ ਅਤੇ ਸਨੱਅਤੀ ਵਿਕਾਸ ਦੀਆਂ ਲੋੜਾਂ ਤੋਂ ਵਧਵੀਂ, ਵਾਫ਼ਰ ਖੇਤੀ ਪੈਦਾਵਾਰ ਨਾਲ ਰਾਖਵੇਂ ਭੰਡਾਰ ਭਰੇ ਰਹਿਣ। ਵਾਫ਼ਰ ਖੇਤੀ ਪੈਦਾਵਾਰ ਦੀਆਂ ਅਜਿਹੀਆਂ ਵੰਨਗੀਆਂ ਦੀ ਚੋਣ ਕੀਤੀ ਜਾਵੇ, ਜਿਹੜੀਆਂ ਮੁਲਕ ਦੇ ਹਿੱਤ ਵਿੱਚ ਜਾਣ ਵਾਲੇ ਬਦੇਸ਼ੀ ਵਪਾਰ ਲਈ ਸਭ ਤੋਂ ਬਿਹਤਰ ਬਣਦੀਆਂ ਹੋਣ। ਫਸਲੀ ਵੰਨ-ਸੁਵੰਨਤਾ ਦੀ ਇਹ ਪ੍ਰੀਭਾਸ਼ਾ ਲੋਕ-ਹਿੱਤਾਂ ਦੇ ਪੱਖ ਤੋਂ, ਕੌਮੀ ਹਿੱਤਾਂ ਦੇ ਪੱਖ ਤੋਂ ਦਿੱਤੀ ਪ੍ਰੀਭਾਸ਼ਾ ਹੈ। ਮੁੱਠੀ ਭਰ ਦੇਸੀ-ਬਦੇਸ਼ੀ ਲੁਟੇਰਿਆਂ ਦੇ ਅੰਨ੍ਹੇਂ ਮੁਨਾਫੇ ਯਕੀਨੀ ਕਰਨ ਦੇ ਹਿੱਤ ’ਚੋਂ ਦਿੱਤੀ ਜਾਣ ਵਾਲੀ ਫਸਲੀ ਵੰਨ-ਸੁਵੰਨਤਾ ਦੀ ਪ੍ਰੀਭਾਸ਼ਾ ਬਿਨਾਂ ਸ਼ੱਕ ਇਸ ਤੋਂ ਵੱਖਰੀ ਅਤੇ ਟਕਰਾਵੀਂ ਹੋਵੇਗੀ।
ਪੈਦਾ ਹੋਣ ਵਾਲੀਆਂ ਫਸਲਾਂ ਦੀਆਂ ਵੰਨਗੀਆਂ ਦੀ ਚੋਣ ਦਾ ਆਧਾਰ ਜ਼ਮੀਨ ਦੀ ਤਾਕਤ ਵੀ ਬਣਦੀ ਹੈ। ਮੌਸਮ ਦੀ ਕਿਸਮ ਤੇ ਸਿੰਜਾਈ ਸਾਧਨਾਂ ਦਾ ਵਿਕਾਸ ਪੱਧਰ ਵੀ ਬਣਦਾ ਹੈ। ਪੌਣਪਾਣੀ ਅਤੇ ਵਾਤਾਵਰਣ ਵੀ ਬਣਦਾ ਹੈ। ਇਸ ਤੋਂ ਬਿਨਾਂ ਕੁੱਲ ਮੁਲਕੀ ਲੋੜਾਂ ਲਈ ਖੇਤੀ ਪੈਦਾਵਾਰ ਦੀ ਢੁੱਕਵੀਂ ਯੋਜਨਾਬੰਦੀ, ਖੇਤੀ ਖੋਜ ਦੇ ਪੱਧਰ ’ਤੇ ਮਿਹਨਤ ਸ਼ਕਤੀ ਦਾ ਸਿਰੜ ਅਤੇ ਹੁਨਰ ਬਣਦਾ ਹੈ। ਇਸ ਤੋਂ ਬਿਨਾਂ ਖੇਤੀ ਵਿੱਚ ਕੀਤੇ ਜਾ ਰਹੇ ਪੂੰਜੀ ਨਿਵੇਸ਼ ਦੀ ਪੱਧਰ ’ਚੋਂ ਵੀ ਫਸਲੀ ਵੰਨਗੀਆਂ ਦੀ ਚੋਣ ਤਹਿ ਹੁੰਦੀ ਹੈ। ਪਰ ਮੁਲਕ ਦੀ ਸਿਆਸੀ ਸੱਤਾ ਅਤੇ ਇਸਦੇ ਪੈਦਾਵਾਰੀ ਸਾਧਨਾਂ ਉੱਪਰ ਕਾਬਜ ਜਮਾਤਾਂ ਦਾ ਜਮਾਤੀ ਸਿਆਸੀ ਕਿਰਦਾਰ ਫਸਲੀ ਵੰਨ-ਸੁਵੰਨਤਾ ਦੀ ਚੋਣ ਇਸਦੇ ਮਕਸਦ ਅਤੇ ਕਿਰਦਾਰ ਨੂੰ ਫੈਸਲਾਕੁੰਨ ਰੂਪ ਵਿੱਚ ਤਹਿ ਕਰਦਾ ਹੈ।
