ਅਮਰੀਕੀ ਸਾਮਰਾਜੀਏ ਹੁਣ ਵੈਨਜ਼ੁਏਲਾ ਦੀ ਘੇਰਾਬੰਦੀ ਵੱਲ
ਸਿਰੇ ਦੀ ਜੰਗਬਾਜ਼ ਅਤੇ ਘੈਂਕਰੀ ਹੋਈ ਅਮਰੀਕਨ ਸਾਮਰਾਜਵਾਦ ਦੀ ਟਰੰਪ ਸਰਕਾਰ ਹੁਣ ਇੱਕ ਹੋਰ ਜੰਗ ਛੇੜਣ ਜਾ ਰਹੀ ਹੈ। ਐਂਤਕੀ ਇਸ ਨਿਹੱਕੀ ਤੇ ਬੇਬੁਨਿਆਦ ਜੰਗ ਦਾ ਨਿਸ਼ਾਨਾ ਲਾਤਿਨੀ ਅਮਰੀਕੀ ਮੁਲਕ ਵੈਨਜ਼ੁਏਲਾ ਬਣਨ ਜਾ ਰਿਹਾ ਹੈ। ਅਮਰੀਕਨ ਸਾਮਰਾਜ ਦੀ ਸਰਪ੍ਰਸਤੀ ਤੇ ਰਜ਼ਾ 'ਚ ਰਹਿ ਕੇ ਚੱਲਣ ਤੋਂ ਨਾਬਰ ਵੈਨਜ਼ੁਏਲਾ ਦੀ ਮੌਜੂਦਾ ਨਿਕੋਲਾਸ ਮਾਦਰੋ ਦੀ ਅਗਵਾਈ ਵਾਲੀ ਸਰਕਾਰ ਨੂੰ ਅਮਰੀਕਨ ਸਾਮਰਾਜੀਏ ਸ਼ੁਰੂ ਤੋਂ ਹੀ ਪ੍ਰਵਾਨ ਕਰਨ ਤੋਂ ਇਨਕਾਰੀ ਤੁਰੇ ਆ ਰਹੇ ਹਨ। ਇਸ ਹਕੂਮਤ ਨੂੰ ਉਲਟਾਉਣ ਤੇ ਇਸਦੀ ਥਾਂ ਅਮਰੀਕਨ ਸਾਮਰਾਜ ਦੀ ਕੱਠਪੁਤਲੀ ਸਰਕਾਰ ਸਥਾਪਤ ਕਰਨ ਲਈ ਤਰ੍ਹਾਂ-ਤਰ੍ਹਾਂ ਦੀਆਂ ਗੋਦਾਂ ਗੁੰਦਦੇ ਆ ਰਹੇ ਸਨ। ਪਿਛਲੇ ਲਗਭਗ ਦਹਾਕੇ ਭਰ ਤੋਂ ਵੈਨਜ਼ੁਏਲਾ ਦੀ ਪੈਟਰੋਲੀਅਮ ਸਨਅਤ ਤੇ ਹੋਰ ਖੇਤਰਾਂ ਉੱਪਰ ਅਮਰੀਕੀ ਸਾਮਰਾਜੀਆਂ ਵੱਲੋਂ ਆਪਹੁਦਰੇ ਢੰਗ ਨਾਲ ਮੜ੍ਹੀਆਂ ਬੇਸ਼ੁਮਾਰ ਆਰਥਿਕ ਤੇ ਵਪਾਰਕ ਬੰਦਿਸ਼ਾਂ ਅਤੇ ਹੋਰ ਭੜਕਾਊ ਕਾਰਵਾਈਆਂ ਦੇ ਬਾਵਜੂਦ ਉਹ ਆਪਣੇ ਇਸ ਮਨੋਰਥ ਦੀ ਪ੍ਰਾਪਤੀ 'ਚ ਅਸਮਰੱਥ ਰਹੇ ਹਨ। ਹੁਣ ਟਰੰਪ ਪ੍ਰਸ਼ਾਸਨ ਵੱਲੋਂ ਸੰਤਬਰ 2025 ਤੋਂ ਬਾਅਦ ਮਾਦਰੋ ਸਰਕਾਰ ਨੂੰ ਚਲਦਾ ਕਰਨ ਲਈ ਮੁਹਿੰਮ ਹੋਰ ਤਿੱਖੀ ਕਰ ਦਿੱਤੀ ਗਈ ਹੈ। ਹੁਣ ਸੈਨਿਕ ਤਾਕਤ ਦੀ ਵਰਤੋਂ ਕਰਕੇ ਉਪਰੋਕਤ ਮਨੋਰਥ ਪ੍ਰਾਪਤੀ ਲਈ ਜ਼ੋਰ-ਸ਼ੋਰ ਦੀ ਤਿਆਰੀ ਚੱਲ ਰਹੀ ਦਿਖਾਈ ਦੇ ਰਹੀ ਹੈ। ਇਸ ਹਮਲਾਵਰ ਫੌਜੀ ਜੰਗ ਲਈ ਮਾਦਰੋ ਸਰਕਾਰ ਉੱਪਰ ਨਸ਼ਾ-ਤਸਕਰੀ ਕਰਨ, ਗੈਰ-ਕਾਨੂੰਨੀ ਪ੍ਰਵਾਸ 'ਚ ਲਿਪਤ ਹੋਣ, ਜਮਹੂਰੀ ਹੱਕਾਂ ਦਾ ਘਾਣ ਕਰਨ ਜਿਹੇ ਬੇਤੁੱਕੇ ਇਲਜ਼ਾਮ ਲਾ ਕੇ ਹਮਲੇ ਲਈ ਅਧਾਰ ਤਿਆਰ ਕੀਤਾ ਜਾ ਰਿਹਾ ਹੈ।
ਵੈਨਜ਼ੁਏਲਾ ਦੀ ਸਖਤ ਨਾਕਾਬੰਦੀ
ਮਾਦਰੋ ਸਰਕਾਰ ਨੂੰ ਚੱਲਦਾ ਕਰਨ ਅਤੇ ਅਮਰੀਕੀ ਰਜ਼ਾ 'ਚ ਚੱਲਣ ਵਾਲੀ ਕੱਠਪੁੱਤਲੀ ਹਕੂਮਤ ਦੀ ਕਾਇਮੀ ਲਈ ਸਤੰਬਰ 2025 'ਚ ਹਮਲਾਵਰ ਕਦਮਾਂ 'ਚ ਟਰੰਪ ਪ੍ਰਸ਼ਾਸਨ ਵੱਲੋਂ ਇੱਕਦਮ ਤੇਜ਼ੀ ਲਿਆਂਦੀ ਗਈ। ਇਸ ਵੱਲੋਂ ਵੈਨਜ਼ੁਏਲਾ ਨਾਲ ਲੱਗਦੇ ਕੈਰੀਬੀਅਨ ਸਮੁੰਦਰੀ ਖੇਤਰ 'ਚ 15000 ਸੈਨਿਕ ਤਾਇਨਾਤ ਕਰ ਦਿੱਤੇ ਗਏ। ਅਮਰੀਕਾ ਦੇ ਸਭ ਤੋਂ ਵੱਡੇ ਸਮੁੰਦਰੀ ਜੰਗੀ ਬੇੜੇ-ਯੂ.ਐਸ.ਐਸ. ਗੈਰਾਲਡ ਆਰ.ਫੋਰਡ ਸਮੇਤ ਦਰਜਨ ਦੇ ਕਰੀਬ ਹੋਰ ਸਮੁੰਦਰੀ ਜੰਗੀ ਜਹਾਜ ਵੈਨਜ਼ੁਏਲਾ ਨਾਲ ਲੱਗਦੇ ਸਮੁੰਦਰੀ ਖੇਤਰ 'ਚ ਤਾਇਨਾਤ ਕਰ ਦਿੱਤੇ ਗਏ ਜਿੰਨ੍ਹਾਂ 'ਚ ਗਾਈਡਡ ਮਿਜ਼ਾਇਲ ਡੈਸਟਰੋਇਰ, ਨਿਊਕਲੀਅਰ ਪਣਡੁੱਬੀ ਤੇ ਹੋਰ ਕਈ ਘਾਤਕ ਜੰਗੀ ਬੇੜੇ ਸ਼ਾਮਿਲ ਹਨ। ਇਸ ਹਮਲਾਵਰ ਧਾੜ 'ਚ ਸਭ ਤੋਂ ਆਧੁਨਿਕ ਐਫ 35 ਜਹਾਜਾਂ ਸਮੇਤ ਅਨੇਕ ਜਹਾਜ਼, ਭਿਆਨਕ ਹੈਲੀਕਾਪਟਰ ਤੇ ਡੋਰਨ ਸ਼ਾਮਿਲ ਹਨ। ਅਮਰੀਕਨ ਸਾਮਰਾਜੀਆਂ ਵੱਲੋਂ ਵੈਨਜ਼ੁਏਲਾ ਦੀ ਮੁਕੰਮਲ ਸਮੁੰਦਰੀ ਨਾਕੇਬੰਦੀ ਕਰ ਦਿੱਤੀ ਗਈ ਹੈ। ਵੈਨਜ਼ੁਏਲਾ ਦੇ ਹਵਾਈ ਖੇਤਰ 'ਚ ਵੀ ਅਮਰੀਕਨ ਧੌਂਸਬਾਜ਼ਾਂ ਨੇ ਹਵਾਈ ਉਡਾਣਾਂ ਦੀ ਮਨਾਹੀ ਕਰ ਦਿੱਤੀ ਹੈ। ਇਉਂ ਮੁਕੰਮਲ ਨਾਕੇਬੰਦੀ ਕਰਕੇ ਵੈਨਜ਼ੁਏਲਾ ਦੀ ਤੇਲ ਦੀ ਬਰਾਮਦ ਰੋਕ ਦਿੱਤੀ ਹੈ। ਵਪਾਰ ਦੇ ਮਾੜੇ ਰੁਖ ਪ੍ਰਭਾਵਿਤ ਹੋਣ ਨਾਲ ਵੈਨਜ਼ੁਏਲਾ ਦੀ ਆਰਥਿਕਤਾ ਦਾ ਸੰਕਟ ਵਧ ਰਿਹਾ ਹੈ। ਨਸ਼ੀਲੇ ਪਦਾਰਥਾਂ ਦੀ ਤਸਕਰੀ ਰੋਕਣ ਦੇ ਨਾਂ ਹੇਠ ਅਮਰੀਕਨ ਧਾੜਵੀ ਸੈਨਾ ਨੇ ਸਮੁੰਦਰੀ ਕਿਸ਼ਤੀਆਂ ਉੱਪਰ ਮਿਜ਼ਾਇਲ ਜਾਂ ਹੋਰ ਹਵਾਈ ਹਮਲੇ ਕਰਕੇ ਹੁਣ ਤੱਕ ਵੈਨਜ਼ੁਏਲਾ ਦੇ 100 ਤੋਂ ਵੱਧ ਨਾਗਰਿਕ ਮਾਰ ਦਿੱਤੇ ਹਨ। ਵੈਨਜ਼ੁਏਲਾ ਤੋਂ ਤੇਲ ਲਿਜਾਣ ਵਾਲੇ ਕਈ ਸਮੁੰਦਰੀ ਟੈਕਰਾਂ ਉੱਪਰ ਅਮਰੀਕਾ ਨੇ ਬੰਦਿਸ਼ਾਂ ਲਾ ਦਿੱਤੀਆਂ ਹਨ। ਵੈਨਜ਼ੁਏਲਾ ਦੇ ਕਿਊਬਾ ਅਤੇ ਚੀਨ ਨੂੰ ਤੇਲ ਲਿਜਾ ਰਹੇ ਦੋ ਟੈਂਕਰਾਂ ਨੂੰ ਅਮਰੀਕੀ ਸੈਨਾ ਨੇ ਕਬਜ਼ੇ 'ਚ ਲੈ ਕੇ ਉਹਨਾਂ ਟੈਂਕਰਾ ਅਤੇ ਉਹਨਾਂ ਵਿਚਲਾ 20-25 ਲੱਖ ਬੈਰਲ ਕੱਚਾ ਤੇਲ ਜ਼ਬਤ ਕਰ ਲਿਆ ਹੈ। ਅਮਰੀਕਾ ਨੇ ਵੈਨਜ਼ੁਏਲਾ ਦੇ ਰਾਸ਼ਟਰਪਤੀ ਨੂੰ ਨਸ਼ਾ ਤਸਕਰੀ ਦਾ ਸਰਗਨਾ ਕਰਾਰ ਦੇ ਕੇ ਉਸਦੀ ਗ੍ਰਿਫ਼ਤਾਰੀ ਲਈ ਭਾਰੀ ਇਨਾਮ ਐਲਾਨ ਕਰ ਰੱਖਿਆ ਹੈ। ਅਨੇਕਾਂ ਹੋਰ ਧੌਂਸਬਾਜ਼ ਕਦਮ ਅਮਰੀਕਨ ਧਾੜਵੀਆਂ ਵੱਲੋਂ ਪਹਿਲਾਂ ਹੀ ਚੱਕੇ ਜਾ ਚੁੱਕੇ ਹਨ ਜਾਂ ਚੁੱਕੇ ਜਾ ਰਹੇ ਹਨ।
ਟਰੰਪ ਪ੍ਰਸਾਸ਼ਨ ਦੀ ਇਹ ਸੀਨਾਜ਼ੋਰੀ ਵੈਨਜ਼ੁਏਲਾ ਦਾ ਆਜ਼ਾਦੀ ਅਤੇ ਪ੍ਰਭੂਸੱਤਾ ਦਾ ਖੁੱਲ੍ਹਮ ਖੁੱਲ੍ਹਾ ਉਲੰਘਣ ਜੋ ਪੂਰੀ ਤਰ੍ਹਾਂ ਗੈਰ-ਕਾਨੂੰਨੀ ਹੈ। ਇਹ ਕੌਮਾਂਤਰੀ ਕਾਨੂੰਨਾਂ ਨੂੰ ਪੂਰੀ ਤਰ੍ਹਾਂ ਪੈਰਾਂ ਹੇਠ ਲਤਾੜਣ ਦੇ ਤੁੱਲ ਹੈ। ਨੰਗੀ ਚਿੱਟੀ ਗੁੰਡਾਗਰਦੀ ਅਤੇ ਧੌਂਸ ਹੈ। ਵੈਨਜ਼ੁਏਲਾ ਦੀ ਕੀਤੀ ਨਾਕੇਬੰਦੀ ਅਤੇ ਲਾਈਆਂ ਆਰਥਿਕ-ਵਪਾਰਕ ਬੰਦਿਸ਼ਾਂ ਉਸ ਵਿਰੁੱਧ ਜੰਗ ਦਾ ਜ਼ਾਹਰਾ ਐਲਾਨ ਹੈ।
ਅਮਰੀਕੀ ਪ੍ਰਸ਼ਾਸਨ ਵੈਨਜ਼ੁਏਲਾ ਉੱਪਰ ਆਪਣੇ ਹਮਲੇ ਨੂੰ ਵਾਜਬ ਠਹਿਰਾਉਣ ਲਈ ਵੈਨਜ਼ੁਏਲਾ ਹਕੂਮਤ ਉੱਤੇ ਨਸ਼ਾ ਜਾਂ ਮਨੁੱਖੀ ਤਸਕਰੀ ਕਰਨ ਦੇ ਜੋ ਇਲਜ਼ਾਮ ਲਾ ਰਿਹਾ ਹੈ, ਉਸਦਾ ਕੋਈ ਵੀ ਪੁਖਤਾ ਸਬੂਤ ਦੁਨੀਆਂ ਦੇ ਲੋਕਾਂ ਮੂਹਰੇ ਨਹੀਂ ਰੱਖ ਸਕਿਆ। ਉਹ ਇੱਕ ਮਹਾਂ-ਸ਼ਕਤੀ ਤੇ ਸੰਸਾਰ ਚੌਧਰੀ ਹੋਣ ਦੇ ਗਰੂਰ 'ਚ ਇਹੀ ਸਮਝਦੇ ਹਨ ਕਿ ਜੋ ਉਹਨਾਂ ਨੇ ਕਹਿ ਦਿੱਤਾ, ਓਹੀ ਸੱਚ ਹੈ। ਉਹ ਕਿਸੇ ਕੌਮਾਂਤਰੀ ਕਾਇਦੇ ਕਾਨੂੰਨ ਦੇ ਪਾਬੰਦ ਨਹੀਂ। ਇਹ ਨੰਗੀ ਚਿੱਟੀ ਧੌਂਸਬਾਜ਼ੀ ਹੈ, ਗੈਂਗਸਟਰਾਂ ਵਾਲਾ ਤਰਕ ਹੈ। ਇਰਾਕ ਅਤੇ ਲੀਬੀਆ ਆਦਿਕ ਵਰਗੇ ਮੁਲਕਾਂ ਉੱਤੇ ਅਮਰੀਕਨ ਸਾਮਰਾਜੀ ਹਮਲੇ ਲਈ ਜੋ ਮਨਘੜ੍ਹਤ ਅਤੇ ਬੇਬੁਨਿਆਦ ਦੂਸ਼ਣਾਂ ਦਾ ਸਹਾਰਾ ਲਿਆ ਗਿਆ ਸੀ, ਓਹੋ ਜਿਹੀ ਕਹਾਣੀ ਹੀ ਹੁਣ ਵੈਨਜ਼ੁਏਲਾ ਉੱਤੇ ਹਮਲੇ ਲਈ ਦੁਹਰਾਈ ਜਾ ਰਹੀ ਹੈ।
ਵੈਨਜ਼ੁਏਲਾ ਦੀ ਕੁਦਰਤੀ ਦੌਲਤ 'ਤੇ ਅੱਖ
ਇਹ ਗੱਲ ਹੁਣ ਕਿਸੇ ਤੋਂ ਲੁਕੀ ਛਿਪੀ ਨਹੀਂ ਕਿ ਨਸ਼ਾ ਤਸਕਰੀ ਜਿਹੇ ਲਾਏ ਜਾ ਰਹੇ ਅਮਰੀਕੀ ਇਲਜ਼ਾਮ ਤਾਂ ਸਿਰਫ ਇੱਕ ਘੜਿਆ ਬਹਾਨਾ ਹੈ। ਅਸਲ ਨਿਸ਼ਾਨਾ ਤਾਂ ਵੈਨਜ਼ੁਏਲਾ ਦੇ ਤੇਲ ਭੰਡਾਰ ਤੇ ਹੋਰ ਕੁਦਰਤੀ ਦੌਲਤ ਹੈ। ਵੈਨਜ਼ੁਏਲਾ ਕੋਲ ਦੁਨੀਆਂ ਦੇ ਕਿਸੇ ਵੀ ਮੁਲਕ ਦੇ ਤੇਲ ਭੰਡਾਰਾਂ ਨਾਲੋਂ ਵੱਡੇ, ਲਗਭਗ 300 ਅਰਬ ਬੈਰਲ ਦੇ ਤੇਲ ਰਿਜ਼ਰਵ ਹਨ। ਅਮਰੀਕਾ ਤਿੱਖੇ ਹੋਏ ਅੰਤਰ-ਸਾਮਰਾਜੀ ਭੇੜ ਦੀਆਂ ਹਾਲਤਾਂ 'ਚ, ਉਹਨਾਂ ਭੰਡਾਰਾਂ ਉੱਪਰ ਲਲਚਾਈਆਂ ਨਜ਼ਰਾਂ ਗੱਡੀ ਬੈਠਾ ਹੈ। ਅਮਰੀਕਨ ਰਾਸ਼ਟਰਪਤੀ ਚੁਨਣ ਲਈ 2024 'ਚ ਹੋਈਆਂ ਚੋਣਾਂ ਦੌਰਾਨ ਆਪਣੀ ਚੋਣ-ਮੁਹਿੰਮ 'ਚ ਟਰੰਪ ਖੁੱਲ੍ਹੇਆਮ ਇਹ ਕਹਿੰਦਾ ਰਿਹਾ ਹੈ ਕਿ ਉਸਦਾ ਨਿਸ਼ਾਨਾ ਹਮੇਸ਼ਾ ਇਹੀ ਰਿਹਾ ਹੈ ਕਿ ਵੈਨਜ਼ੁਏਲਾ ਨੂੰ ਬਦਲੇ 'ਚ ਕੁੱਝ ਵੀ ਦਿੱਤੇ ਬਿਨਾਂ ਉਸਦੇ ਤੇਲ ਨੂੰ ਅਮਰੀਕਾ ਆਪਣੇ ਕਬਜ਼ੇ ਹੇਠ ਲੈ ਲਵੇ। ਵੈਨਜ਼ੁਏਲਾ ਸਰਕਾਰ ਦਾ ਦੋਸ਼ ਹੈ ਕਿ ਵੈਨਜ਼ੁਏਲਾ ਉੱਪਰ ਅਮਰੀਕੀ ਧਾੜਵੀ ਹਮਲੇ ਦਾ ਇਹ ਗਿਣਿਆ ਮਿਥਿਆ ਮਕਸਦ ਹੈ ਕਿ ਵੈਨਜ਼ੁਏਲਾ ਦੀ ਊਰਜਾ ਦੌਲਤ ਵੈਨਜ਼ੁਏਲਾਈ ਲੋਕਾਂ ਤੋਂ ਖੋਹ ਲਈ ਜਾਵੇ। ਵੈਨਜ਼ੁਏਲਾ ਦੇ ਇੱਕ ਸਰਕਾਰੀ ਬਿਆਨ 'ਚ ਕਿਹਾ ਗਿਆ ਹੈ:-
“ਵੈਨਜ਼ੁਏਲਾ ਨੂੰ ਲੰਮੇ ਚਿਰ ਤੋਂ ਜਿਸ ਹਮਲੇ ਦਾ ਨਿਸ਼ਾਨਾ ਬਣਾਇਆ ਜਾ ਰਿਹਾ ਹੈ, ਉਸਦਾ ਅਸਲ ਕਾਰਨ ਹੁਣ ਜੱਗ-ਜ਼ਾਹਰ ਹੋ ਚੁੱਕਿਆ ਹੈ। ਇਹਦਾ ਕਾਰਨ ਨਾ ਪ੍ਰਵਾਸ ਦਾ ਮਸਲਾ ਹੈ, ਨਾ ਨਸ਼ਾ-ਤਸਕਰੀ ਹੈ ਤੇ ਨਾ ਹੀ ਜਮਹੂਰੀਅਤ ਜਾਂ ਮਨੁੱਖੀ ਅਧਿਕਾਰਾਂ ਦਾ ਘਾਣ ਹੈ। ਇਸਦਾ ਅਸਲ ਕਾਰਨ ਹਮੇਸ਼ਾਂ ਤੋਂ ਹੀ ਸਾਡੇ ਮੁਲਕ ਦੀ ਕੁਦਰਤੀ ਦੌਲਤ, ਸਾਡੇ ਤੇਲ, ਸਾਡੇ ਊਰਜਾ ਸ੍ਰੋਤਾਂ ਉੱਪਰ ਧਾੜਵੀਆਂ ਦੀ ਮੈਲੀ ਅੱਖ ਰਹੀ ਹੈ-ਉਹਨਾਂ ਸ੍ਰੋਤਾਂ ਉੱਪਰ ਜੋ ਸਿਰਫ਼ ਤੇ ਸਿਰਫ਼ ਵੈਨਜ਼ੁਏਲਾ ਦੇ ਲੋਕਾਂ ਦੀ ਮਲਕੀਅਤ ਹੈ।”
ਬਿੱਲੀ ਬੋਰੀਓਂ ਬਾਹਰ
ਮਨਘੜ੍ਹਤ ਤੇ ਲੰਗੜੇ ਬਹਾਨੇ ਬਣਾ ਕੇ ਵੈਨਜ਼ੁਏਲਾ ਉੱਪਰ ਹਥਿਆਰਬੰਦ ਵਾਹਰ ਚੜ੍ਹਾ ਕੇ ਵੈਨਜ਼ੁਏਲਾ ਦੀ ਨਾਕਾਬੰਦੀ ਕਰੀ ਬੈਠੇ ਅਮਰੀਕਨ ਧੌਂਸਬਾਜ਼ਾਂ ਦੇ ਮੂੰਹੋਂ ਵੀ ਆਖਰ ਸੱਚ ਫੁੱਟ ਨਿਕਲਿਆ ਹੈ। ਵੈਨਜ਼ੁਏਲਾ ਤੋਂ ਕਿਊਬਾ ਨੂੰ ਤੇਲ ਲੈ ਕੇ ਜਾ ਰਹੇ ਟੈਂਕਰ ਦੀ ਜ਼ਬਤੀ ਤੋਂ ਬਾਅਦ ਟਰੰਪ ਨੇ 16 ਦਸੰਬਰ ਨੂੰ “ਟਰੁੱਥ ਸੋਸ਼ਿਲ” 'ਤੇ ਪਾਈ ਪੋਸਟ 'ਚ ਆਖਰ ਇੰਕਸ਼ਾਫ ਕੀਤਾ ਹੈ:
“ਵੈਨਜ਼ੁਏਲਾ ਨੂੰ ਦੱਖਣੀ ਅਮਰੀਕਾ ਦੇ ਇਤਿਹਾਸ ਵਿੱਚ ਹੁਣ ਤੱਕ ਦੇ ਸਭ ਤੋਂ ਵੱਡੇ ਜੰਗੀ ਬੇੜੇ ਨੇ ਪੂਰੀ ਤਰ੍ਹਾਂ ਘੇਰ ਲਿਆ ਹੈ। ਇਹ ਘੇਰਾਬੰਦੀ ਹੋਰ ਵਧਦੀ ਹੀ ਜਾਵੇਗੀ ਅਤੇ ਇਸਦੀ ਵੈਨਜ਼ੁਏਲਾ ਉੱਪਰ ਅਜਿਹੀ ਭਿਆਨਕ ਨਪੀੜ ਹੋਵੇਗੀ ਜਿਸਦਾ ਸਾਹਮਣਾ ਉਸਨੂੰ ਅੱਜ ਤੱਕ ਕਦੇ ਨਹੀਂ ਕਰਨਾ ਪਿਆ। ਇਹ ਘੇਰਾਬੰਦੀ ਉਹਨਾਂ ਚਿਰ ਜਾਰੀ ਰਹੇਗੀ ਜਿੰਨਾਂ ਚਿਰ ਉਹ (ਯਾਨਿ ਵੈਨਜ਼ੁਏਲਾ) ਉਹ ਸਾਰਾ ਤੇਲ, ਜ਼ਮੀਨ ਅਤੇ ਉਹ ਹੋਰ ਅਸਾਸੇ ਯੂ.ਐਸ.ਏ. ਨੂੰ ਵਾਪਸ ਨਹੀਂ ਮੋੜ ਦਿੰਦੇ ਜੋ ਉਸਨੇ ਪਹਿਲਾਂ ਸਾਡੇ ਤੋਂ ਹਥਿਆ ਲਏ ਸਨ। ਮਾਦਰੋ ਦੀ ਨਜ਼ਾਇਜ਼ ਹਕੂਮਤ ਇਹਨਾਂ ਹਥਿਆਏ ਤੇਲ ਸਰੋਤਾਂ ਦਾ ਤੇਲ ਵੇਚ ਕੇ ਆਪਣੇ ਲਈ ਧਨ ਕਮਾ ਰਹੀ ਹੈ ਜਿਸਨੂੰ ਉਹ ਨਸ਼ਾ ਤਸਕਰੀ, ਮਨੁੱਖੀ ਤਸਕਰੀ, ਕਤਲਾਂ ਅਤੇ ਅਗਵਾ ਵਰਗੇ ਜੁਰਮਾਂ ਲਈ ਵਰਤ ਰਹੀ ਹੈ। ਸਾਡੇ ਅਸਾਸਿਆਂ ਦੀ ਚੋਰੀ ਕਰਨ ਅਤੇ ਦਹਿਸ਼ਤਗਰਦੀ, ਨਸ਼ਾ ਅਤੇ ਮਨੁੱਖੀ ਤਸਕਰੀ ਜਿਹੇ ਹੋਰ ਕਈ ਕਾਰਨਾਂ ਕਰਕੇ, ਵੈਨਜ਼ੁਏਲਾ ਦੀ ਹਕੂਮਤ ਨੂੰ ਇੱਕ ਵਿਦੇਸ਼ੀ ਦਹਿਸ਼ਤਗਰਦ ਜਥੇਬੰਦੀ ਕਰਾਰ ਦੇ ਦਿੱਤਾ ਗਿਆ ਹੈ। ਇਸ ਵਜ੍ਹਾ ਕਰਕੇ ਮੈਂ ਅੱਜ ਅਮਰੀਕਾ ਵੱਲੋਂ ਵੈਨਜ਼ੁਏਲਾ ਦੇ ਅੰਦਰ ਆਉਣ ਜਾਂ ਬਾਹਰ ਜਾਣ ਵਾਲੇ ਪਾਬੰਦੀ-ਸ਼ੁਦਾ ਸਾਰੇ ਤੇਲ ਟੈਂਕਰਾਂ ਨੂੰ ਰੋਕਣ ਲਈ ਸਮੁੱਚੀ ਤੇ ਮੁਕੰਮਲ ਨਾਕਾਬੰਦੀ ਕਰਨ ਦਾ ਹੁਕਮ ਜਾਰੀ ਕਰ ਰਿਹਾ ਹਾਂ।”
ਟਰੰਪ ਦੇ ਉਪਰੋਕਤ ਕਥਨ ਤੋਂ ਇਹ ਗੱਲ ਸਪੱਸ਼ਟ ਹੈ ਕਿ ਸਾਮਰਾਜੀ ਅਮਰੀਕਾ ਕਿਵੇਂ ਮਨਘੜ੍ਹਤ ਬਹਾਨੇ ਬਣਾ ਕੇ ਹੋਰਨਾਂ ਮੁਲਕਾਂ ਉੱਪਰ ਧਾੜਵੀ ਹਮਲੇ ਕਰਦਾ ਹੈ ਤੇ ਆਪਣੇ ਯੁੱਧਨੀਤਿਕ, ਆਰਥਿਕ ਤੇ ਸਿਆਸੀ ਮਕਸਦਾਂ ਨੂੰ ਅੱਗੇ ਵਧਾਉਣ ਲਈ ਹੋਰਨਾਂ ਮੁਲਕਾਂ ਦੀ ਆਜ਼ਾਦੀ ਤੇ ਪ੍ਰਭੂਸੱਤਾ ਨੂੰ ਪੈਰਾਂ ਹੇਠ ਰੋਲਦਾ ਹੈ, ਉਹਨਾਂ ਦੇ ਸਾਧਨਾਂ ਨੂੰ ਹਥਿਆਉਂਦਾ ਹੈ ਤੇ ਹਮਲਾਵਰ ਜੰਗਾਂ ਰਾਹੀਂ ਲੱਖਾਂ ਜਾਨਾਂ ਦੀ ਬਲੀ ਲੈਂਦਾ ਹੈ।
ਲੰਮੇ ਸਮੇਂ ਤੋਂ ਜੰਗ ਜਾਰੀ
ਵੈਨਜ਼ੁਏਲਾ 'ਤੇ ਹਾਲੀਆ ਅਮਰੀਕਨ ਸਾਮਰਾਜੀ ਧੌਂਸਬਾਜ਼ੀ ਦੀਆਂ ਘਟਨਾਵਾਂ ਇੱਕੋ-ਇੱਕ ਵਧੀਕੀ ਨਹੀਂ ਸਗੋਂ ਅਜਿਹੀ ਧੱਕੜਸ਼ਾਹੀ ਦਾ ਲੰਮਾ ਇਤਿਹਾਸ ਹੈ। ਖਾਸ ਕਰਕੇ 1999 ਵਿੱਚ ਹਿਊਗੋ ਸ਼ਾਵੇਜ਼ ਦੀ ਰਾਸ਼ਟਰਪਤੀ ਵਜੋਂ ਜਿੱਤ ਅਤੇ ਉਸ ਦੇ ਧੜੱਲੇਦਾਰ ਸਾਮਰਾਜ-ਵਿਰੋਧ ਤਹਿਤ ਅਮਰੀਕੀ ਤੇਲ ਕੰਪਨੀਆਂ ਨੂੰ ਵੈਨਜ਼ੁਏਲਾ 'ਚੋਂ ਚੱਲਦਾ ਕਰ ਦੇਣ ਤੋਂ ਬਾਅਦ ਕਿਸੇ ਨਾ ਕਿਸੇ ਰੂਪ 'ਚ ਅਮਰੀਕੀ ਭੜਕਾਊ ਅਤੇ ਧੌਂਸਬਾਜ਼ ਕਾਰਵਾਈਆਂ ਜਾਰੀ ਹਨ। ਵੇਲੇ ਦੀਆਂ ਅਮਰੀਕਨ ਹਕੂਮਤਾਂ ਵੱਲੋਂ ਪਹਿਲਾਂ ਸਾਵੇਜ਼ ਸਰਕਾਰ ਨੂੰ ਉਲਟਾਉਣ ਤੇ ਫਿਰ 2013 ਤੋਂ ਬਾਅਦ ਮਾਦਰੋ ਹਕੂਮਤ ਵਿਰੁੱਧ ਸਾਜਿਸ਼ੀ ਭੰਨ-ਤੋੜ ਅਤੇ ਹਕੂਮਤੀ ਤਬਦੀਲੀ ਦੀਆਂ ਕੋਸ਼ਿਸ਼ਾਂ ਲਗਾਤਾਰ ਚੱਲਦੀਆਂ ਆ ਰਹੀਆਂ ਹਨ। 2019 'ਚ ਅਮਰੀਕਨ ਪ੍ਰਸ਼ਾਸਨ ਵੱਲੋਂ ਵੈਨਜ਼ੁਏਲਾ ਤੇਲ ਦੀ ਢੋਅ-ਢੁਆਈ 'ਚ ਲੱਗੀਆਂ ਕਈ ਸ਼ਿਪਿੰਗ ਕੰਪਨੀਆਂ ਅਤੇ ਮਾਲ-ਵਾਹਕ ਜਹਾਜ਼ਾਂ 'ਤੇ ਮੜ੍ਹੀਆਂ ਪਾਬੰਦੀਆਂ ਅੱਜ ਤੱਕ ਜਾਰੀ ਹਨ। ਪਿਛਲੇ 10 ਸਾਲਾਂ 'ਚ ਅਮਰੀਕਨ ਸਾਮਰਾਜੀ ਹਕੂਮਤਾਂ ਵੱਲੋਂ ਵੈਨਜ਼ੁਏਲਾ ਦੀਆਂ ਸੰਸਥਾਵਾਂ, ਕੰਪਨੀਆਂ, ਵਿਅਕਤੀਆਂ ਆਦਿਕ ਉੱਪਰ ਇੱਕ ਹਜ਼ਾਰ ਤੋਂ ਵੱਧ ਆਰਥਿਕ ਤੇ ਵਪਾਰਕ ਪਾਬੰਦੀਆਂ ਠੋਸੀਆਂ ਗਈਆਂ ਹਨ ਜੋ ਲਗਾਤਾਰ ਜਾਰੀ ਹਨ। ਇਹਨਾਂ ਦਾ ਜ਼ਾਹਰਾ ਮਕਸਦ ਹੀ ਵੈਨਜ਼ੁਏਲਾ ਨੂੰ ਆਰਥਿਕ ਤੌਰ 'ਤੇ ਕਮਜ਼ੋਰ ਅਤੇ ਅਸਥਿਰ ਕਰਨਾ ਹੈ। ਪਿਛਲੇ ਸਾਲ 'ਚ ਅਮਰੀਕਾ ਨੇ ਵੈਨਜ਼ੁਏਲਾ ਦੇ ਦੋ ਹਵਾਈ ਜਹਾਜ਼ਾਂ ਨੂੰ ਇਹਨਾਂ ਪਾਬੰਦੀਆਂ ਦੀ ਆੜ੍ਹ 'ਚ ਕਬਜ਼ੇ 'ਚ ਲੈ ਕੇ ਜਬਤ ਕਰ ਲਿਆ ਹੈ। ਵੈਨਜ਼ੁਏਲਾ ਦੀ ਸਰਕਾਰੀ ਤੇਲ ਕੰਪਨੀ ਦੇ 15 ਹਵਾਈ ਜਹਾਜ਼ਾਂ ਦੀਆਂ ਉਡਾਣਾਂ 'ਤੇ ਪਾਬੰਦੀਆਂ ਲਾ ਰੱਖੀਆਂ ਹਨ ਅਤੇ ਉਹਨਾਂ ਦੇ ਸਾਰੇ ਅਸਾਸੇ ਜਾਮ ਕਰ ਦਿੱਤੇ ਹਨ। ਵੈਨਜ਼ੁਏਲਾ ਦੀ ਸਰਕਾਰੀ ਤੇਲ ਕੰਪਨੀ ਦੀ ਅਮਰੀਕਾ 'ਚ ਸਹਾਇਕ ਕੰਪਨੀ ਦੇ ਅਸਾਸੇ ਵੀ ਜਾਮ ਕਰ ਦਿੱਤੇ ਹਨ। ਵੈਨਜ਼ੁਏਲਾ ਦੇ ਵਿਦੇਸ਼ਾਂ 'ਚ 8 ਬਿਲੀਅਨ ਡਾਲਰ ਦੇ ਅਸਾਸਿਆਂ ਨੂੰ ਅਮਰੀਕੀ ਦਬਾਅ ਹੇਠ, ਕਈ ਕੌਮਾਂਤਰੀ ਬੈਂਕਾਂ ਨੇ ਇਸ ਅਧਾਰ ਉੱਤੇ ਹਥਿਆ ਲਿਆ ਹੈ ਕਿ ਉਹ ਮਾਦਰੋ ਹਕੂਮਤ ਦੀ ਵਾਜਬੀਅਤ ਨੂੰ ਤਸਲੀਮ ਨਹੀਂ ਕਰਦੇ। ਇਹ ਲੜੀ ਬਹੁਤ ਲੰਮੀ ਹੈ। ਹੁਣ ਵੈਨਜ਼ੁਏਲਾ ਦਾ ਊਰਜਾ ਅਤੇ ਟਰਾਂਸਪੋਰਟ ਤਾਣਾ-ਬਾਣਾ ਸਾਮਰਾਜੀ ਹੱਲੇ ਹੇਠ ਹੈ ਅਤੇ ਤੇਲ ਤੇ ਤੇਲ ਟੈਂਕਰਾਂ ਤੇ ਹੋਰ ਸਰਕਾਰੀ ਜਾਇਦਾਦਾਂ ਨੂੰ ਅਮਰੀਕਨ ਫੌਜੀ ਤਾਕਤ ਦੇ ਜ਼ੋਰ ਅਮਰੀਕਾ ਵੱਲੋਂ ਹਥਿਆਇਆ ਜਾ ਰਿਹਾ ਹੈ। ਵੈਨਜ਼ੁਏਲਾ ਦੀ ਨਾਕੇਬੰਦੀ ਰਾਹੀਂ ਆਰਥਿਕਤਾ ਨੂੰ ਢਾਹ ਲਾਈ ਜਾ ਰਹੀ ਹੈ ਤਾਂ ਕਿ ਥੁੜ੍ਹਾਂ ਦੀ ਸ਼ਿਕਾਰ ਜਨਤਾ ਨੂੰ ਸਰਕਾਰ ਵਿਰੁੱਧ ਉਕਸਾ ਕੇ ਆਪਣੇ ਏਜੰਟਾਂ ਰਾਹੀਂ ਹਕੂਮਤੀ ਸੱਤਾ ਬਦਲੀ ਕਰਵਾਈ ਜਾ ਸਕੇ। ਸਿੱਧੀ ਫੌਜੀ ਦਖਲਅੰਦਾਜ਼ੀ ਦੀਆਂ ਵੀ ਧਮਕੀਆਂ ਜਾਰੀ ਹਨ।
ਮੌਜੂਦਾ ਹਮਲਾਵਰ ਪੈਂਤੜਾ-ਵੱਡੀ ਵਿਉਂਤ ਦਾ ਹਿੱਸਾ
ਅਮਰੀਕਨ ਸਾਮਰਾਜੀ ਹਾਕਮਾਂ ਵੱਲੋਂ ਵੈਨਜ਼ੁਏਲਾ ਵਿਰੁੱਧ ਵਿੱਢੀ ਹਮਲਾਵਰ ਮੁਹਿੰਮ ਅਮਰੀਕਾ ਦੇ ਸਿਰਫ਼ ਫੌਰੀ ਆਰਥਿਕ ਹਿੱਤਾਂ ਤੋਂ ਹੀ ਪ੍ਰੇਰਿਤ ਨਹੀਂ ਸਗੋਂ ਇਹ ਇੱਕ ਵਡੇਰੀ ਵਿਉਂਤ ਦਾ ਅਨਿੱਖੜਵਾਂ ਅੰਗ ਜਾਪਦੀ ਹੈ। ਅਮਰੀਕੀ ਟਰੰਪ ਪ੍ਰਸ਼ਾਸਨ ਵੱਲੋਂ ਪਿਛਲੇ ਨਵੰਬਰ ਮਹੀਨੇ 'ਚ ਜਾਰੀ ਕੀਤੀ ਗਈ “ਨੈਸ਼ਨਲ ਸਕਿਉਰਿਟੀ ਸਟਰੈਟਜੀ” 'ਚ ਇਸ ਗੱਲ ਦਾ ਬਹੁਤ ਸਪੱਸ਼ਟ ਸ਼ਬਦਾਂ 'ਚ ਜ਼ਿਕਰ ਕੀਤਾ ਗਿਆ ਹੈ ਕਿ “ਪੱਛਮੀ ਅਰਧ ਗੋਲੇ 'ਚ ਅਮਰੀਕਨ ਪੁੱਗਤ ਤੇ ਦਬਦਬਾ ਬਹਾਲ ਕਰਨਾ” ਸਾਡਾ ਟੀਚਾ ਰਹਿਣਾ ਚਾਹੀਦਾ ਹੈ ਅਤੇ “ਸਾਡੇ ਇਸ ਅਰਧ -ਗੋਲੋ” ਦੇ ਖੇਤਰ 'ਚ ਚੀਨ ਨੂੰ ਯੁੱਧਨੀਤਕ ਪੱਖੋਂ ਮਹੱਤਵਪੂਰਨ ਅਸਾਸਿਆਂ (ਸਾਧਨਾਂ) ਦੀ ਮਾਲਕੀ ਜਾਂ ਕੰਟਰੋਲ ਕਰਨ ਦੀ ਸਮਰੱਥਾ ਤੋਂ ਵਿਹੂਣੇ ਕਰਨ ਦਾ ਟੀਚਾ ਬਿਆਨਿਆ ਗਿਆ ਹੈ ਇਹ ਟੀਚਾ 1923 'ਚ ਅਪਣਾਈ ਉਸ “ਮੋਨਰੋ ਡੌਕਟਰਾਇਨ” ਦਾ ਅਜੋਕਾ ਟਰੰਪ ਸੰਸਕਰਨ ਹੈ। ਮੋਨਰੋ ਸਿਧਾਂਤ ਤਹਿਤ ਯੂਰਪ ਦੀਆਂ ਪ੍ਰਮੁੱਖ ਬਸਤੀਵਾਦੀ ਸ਼ਕਤੀਆਂ ਨੂੰ ਉੱਤਰੀ ਅਮਰੀਕਾ ਤੇ ਲਾਤੀਨੀ ਅਮਰੀਕਾ ਦੇ ਖੇਤਰ 'ਚ ਬਸਤੀਵਾਦੀ ਪਸਾਰਾ ਕਰਨ ਤੇ ਉੱਥੇ ਦਖਲਅੰਦਾਜ਼ੀ ਕਰਨ ਤੋਂ ਵਰਜਿਆ ਗਿਆ ਸੀ ਤੇ ਅਮਰੀਕਾ ਵੱਲੋਂ ਯੂਰਪੀਨ ਮਾਮਲਿਆਂ 'ਚ ਦਖਲਅੰਦਾਜ਼ੀ ਨਾ ਕਰਨ ਦਾ ਵਿਸ਼ਵਾਸ਼ ਪ੍ਰਗਟਾਇਆ ਗਿਆ ਸੀ। ਤਾਜ਼ਾ ਅਮਰੀਕਨ ਨੈਸ਼ਨਲ ਸਕਿਊਰਿਟੀ ਸਟਰੈਟੇਜੀ 'ਚ ਸਰਕਾਰ ਨੂੰ ਕਿਹਾ ਗਿਆ ਹੈ ਕਿ ਉਹ “ਪੱਛਮੀ ਅਰਧ ਗੋਲੇ ਦੇ ਖੇਤਰਾਂ 'ਚ ਅਮਰੀਕਨ ਕੰਪਨੀਆਂ ਵੱਲੋਂ ਯੁੱਧਨੀਤਿਕ ਪੱਖੋਂ ਮਹੱਤਵਪੂਰਨ ਸਾਧਨਾਂ ਨੂੰ ਹਾਸਲ ਕਰਨ ਜਾਂ ਉਹਨਾਂ ਦੇ ਪੂੰਜੀ ਨਿਵੇਸ਼ ਕਰਨ ਦੇ ਮੌਕਿਆਂ ਦੀ ਨਿਸ਼ਾਨਦੇਹੀ ਕਰੇ।” ਇਸ ਦਸਤਾਵੇਜ਼ 'ਚ ਦੋਨਾਂ ਮਹਾਂਦੀਪਾਂ (ਉੱਤਰੀ ਅਮਰੀਕਾ ਤੇ ਲਾਤੀਨੀ ਅਮਰੀਕਾ) ਜਿੰਨਾਂ ਨੂੰ ਸਾਡੇ ਅਰਧ ਗੋਲੇ ਦਾ ਨਾਂ ਦਿੱਤਾ ਗਿਆ ਹੈ, ਅੰਦਰ ਅਮਰੀਕਾ ਦੀ ਮਾਲਕੀ ਦੀ ਪੁਰਅਸਰ ਢੰਗ ਨਾਲ ਜ਼ੋਰਦਾਰ ਵਕਾਲਤ ਕੀਤੀ ਗਈ ਹੈ। ਕਿਹਾ ਗਿਆ ਹੈ ਕਿ ਅਮਰੀਕਾ ਲਾਤੀਨੀ ਅਮਰੀਕਾ ਦੇ ਸਾਧਨਾਂ ਉੱਪਰ ਮਾਲਕੀ ਅਤੇ ਕੰਟਰੋਲ ਯਕੀਨੀ ਬਣਾਏਗਾ।
ਉਪਰੋਕਤ ਸੁਰੱਖਿਆ ਯੁੱਧਨੀਤੀ ਦਸਤਾਵੇਜ਼ ਤੋਂ ਸਮਝ 'ਚ ਆਉਂਦਾ ਹੈ ਕਿ ਟਰੰਪ ਕਿਉਂ ਵੈਨਜ਼ੁਏਲਾ ਦੇ ਤੇਲ, ਜ਼ਮੀਨ ਤੇ ਹੋਰ ਸਾਧਨਾਂ ਨੂੰ ਆਪਣਾ ਤੇਲ ਅਤੇ ਅਸਾਸੇ ਕਹਿ ਰਿਹਾ ਹੈ, ਉਹ ਕਿਉਂ ਗਰੀਨ ਲੈਂਡ ਨੂੰ ਹਰ ਹਾਲਤ ਅਮਰੀਕਾ ਲਈ ਹਥਿਆਉਣਾ ਚਾਹੁੰਦਾ ਹੈ, ਕਿਉਂ ਪਨਾਮਾ ਨਹਿਰ ਜਿਹੇ ਯੁੱਧਨੀਤਿਕ ਆਵਾਜਾਈ ਲਾਂਘੇ ਉੱਤੇ ਜਬਰਨ ਅਮਰੀਕੀ ਕੰਟਰੋਲ ਸਥਾਪਤ ਕਰਨਾ ਚਾਹੁੰਦਾ ਹੈ ਤੇ ਚੀਨ ਦੇ ਲਾਗੇ ਪੈਂਦੇ ਅਫਗਾਨਿਸਤਾਨ ਦੇ ਯੁੱਧਨੀਤਿਕ ਮਹੱਤਤਾ ਵਾਲੇ ਬਾਗਰਾਮ ਏਅਰਬੇਸ ਨੂੰ ਮੁੜ ਹਥਿਆਉਣ ਦੀਆਂ ਗੱਲਾਂ ਕਰ ਰਿਹਾ ਹੈ।
ਵੈਨਜ਼ੁਏਲਾ 'ਚ ਤੇਲ ਭੰਡਾਰਾਂ ਅਤੇ ਹੋਰ ਕੁਦਰਤੀ ਸਾਧਨਾਂ ਤੇ ਅਮਰੀਕਨ ਕੰਟਰੋਲ, ਚੀਨ ਅਤੇ ਰੂਸ ਨਾਲ ਕਿਸੇ ਭਾਵੀ ਜੰਗ 'ਚ ਮੜਿੱਕਣ ਲਈ ਅਣਸਰਦੀ ਲੋੜ ਹੈ। ਇਹ ਵੱਡੇ ਤੇਲ ਭੰਡਾਰ ਐਨ ਉਸਦੇ ਪਿਛਵਾੜੇ 'ਚ ਪੈਂਦੇ ਹਨ। ਇਹਨਾਂ 'ਤੇ ਨਿਰੋਲ ਅਮਰੀਕੀ ਕੰਟਰੋਲ ਸਥਾਪਤ ਕਰਨ ਤੋਂ ਇਲਾਵਾ ਉਸਦੀ ਲਾਤੀਨੀ ਅਮਰੀਕਾ ਦੇ ਹੋਰ ਮੁਲਕਾਂ ਦੇ ਯੁੱਧਨੀਤਿਕ ਮਹੱਤਤਾ ਵਾਲੇ ਸਰੋਤਾਂ ਉੱਪਰ ਅੱਖ ਹੈ ਜਿਹਨਾਂ 'ਚ ਚਿੱਲੀ 'ਚ ਤਾਂਬੇ ਅਤੇ ਲੀਥੀਅਮ ਦੇ ਸਰੋਤ ਸ਼ਾਮਿਲ ਹਨ। ਚੀਨ ਇਸ ਵੇਲੇ ਵੈਨਜ਼ੁਏਲਾ ਦਾ ਸਭ ਤੋਂ ਵੱਡਾ ਕਰਜ਼ਦਾਤਾ ਹੈ ਅਤੇ ਉਸਨੇ 2005 ਤੋਂ ਬਾਅਦ 62 ਬਿਲੀਅਨ ਡਾਲਰ ਦਾ ਉਧਾਰ ਵੈਨਜ਼ੁਏਲਾ ਨੂੰ ਦਿੱਤਾ ਹੈ। ਉਹ ਵੈਨਜ਼ੁਏਲਾ ਦੇ ਤੇਲ ਦਾ ਸਭ ਤੋਂ ਵੱਡਾ ਖਰੀਦਦਾਰ ਹੈ। ਵੈਨਜ਼ੁਏਲਾ ਦੀਆਂ 80 ਪ੍ਰਤੀਸ਼ਤ ਬਰਾਮਦਾਂ ਵੀ ਚੀਨ ਨੂੰ ਹੀ ਹੁੰਦੀਆਂ ਹਨ। ਰੂਸ ਦਾ ਵੀ ਵੈਨਜ਼ੁਏਲਾ ਦਾ ਊਰਜਾ ਸਨਅਤ 'ਚ ਕਾਫੀ ਪੈਸਾ ਲੱਗਿਆ ਹੋਇਆ ਹੈ। ਚੀਨ ਦਾ ਹੋਰਨਾਂ ਕਈ ਲਾਤੀਨੀ ਅਮਰੀਕੀ ਮੁਲਕਾਂ ਦੀ ਇਨਫਰਾਸਟਕਚਰ 'ਚ ਅਰਬਾਂ ਡਾਲਰਾਂ ਦਾ ਨਿਵੇਸ਼ ਹੋਇਆ ਹੈ। ਵੈਨਜ਼ੁਏਲਾ ਦੇ ਸਿਰ 'ਤੇ ਮੰਡਰਾ ਰਿਹਾ ਅਮਰੀਕੀ ਫੌਜੀ ਹਮਲੇ ਦਾ ਖਤਰਾ ਲਾਤੀਨੀ ਅਮਰੀਕਾ 'ਚ ਚੀਨ-ਰੂਸ ਦੇ ਵਧ ਰਹੇ ਪ੍ਰਭਾਵ ਨੂੰ ਠੱਲ੍ਹਣ ਤੇ ਖਦੇੜਣ ਲਈ ਬੰਨ੍ਹਿਆ ਜਾ ਰਿਹਾ ਸ਼ੁਰੂਆਤੀ ਪੈੜਾ ਹੈ।
ਆਪਣੀਆਂ ਸੰਸਾਰ-ਵਿਆਪੀ ਯੁੱਧਨੀਤਿਕ ਲੋੜਾਂ ਦੇ ਤਹਿਤ ਵੈਨਜ਼ੁਏਲਾ ਵਿਰੁੱਧ ਸੇਧਤ ਅਮਰੀਕੀ ਹਮਲਾ ਚਾਹੇ ਮਾਦਰੋ ਸਰਕਾਰ ਨੂੰ ਉਲਟਾਉਣ 'ਚ ਵਕਤੀ ਤੌਰ 'ਤੇ ਸਫਲ ਵੀ ਹੋ ਜਾਵੇ ਪਰ ਇਹ ਕਾਰਜ ਨਾ ਅਮਰੀਕਾ ਲਈ ਸੁਖਾਲਾ ਤੇ ਨਾ ਹੀ ਸਿਆਸੀ ਪੱਖੋਂ ਸਸਤਾ ਹੋ ਸਕਦਾ ਹੈ। ਨਿਕੋਲਾਸ ਮਾਦਰੋ ਹਕੂਮਤ ਨੂੰ ਮੁਲਕ ਦੇ ਗਰੀਬ ਤੇ ਮਿਹਨਤਕਸ਼ ਅਵਾਮ ਅਤੇ ਸੈਨਾ ਦੀ ਤਕੜੀ ਹਮਾਇਤ ਹਾਸਲ ਹੈ। ਰੈਗੂਲਰ ਸੈਨਾ ਤੋਂ ਬਿਨਾਂ ਮਾਦਰੋ ਸਰਕਾਰ ਨੂੰ ਚਾਰ ਲੱਖ ਦੇ ਕਰੀਬ ਵਲੰਟੀਅਰ ਫੋਰਸ ਦੀ ਹਮਾਇਤ ਹਾਸਲ ਹੈ। ਅਮਰੀਕਨ ਕੱਠਪੁਤਲੀ ਸਰਕਾਰ ਲਈ ਜ਼ਮੀਨੀ ਪੱਧਰ 'ਤੇ ਕਬਜ਼ਾ ਕਰਨ ਅਤੇ ਬਣਾ ਕੇ ਰੱਖਣਾ ਖਾਲਾ ਜੀ ਦਾ ਵਾੜਾ ਨਹੀਂ ਹੋਵੇਗਾ। ਇਸ ਹਮਲੇ ਨਾਲ ਸਾਰੇ ਲਾਤੀਨੀ ਅਮਰੀਕੀ ਦੇਸ਼ਾਂ 'ਚ ਅਮਰੀਕਾ ਵਿਰੋਧੀ ਭਾਵਨਾਵਾਂ ਦਾ ਪਸਾਰਾ ਹੋਵੇਗਾ ਜਿਸ ਨਾਲ ਲਾਤੀਨੀ ਅਮਰੀਕੀ ਦੇਸ਼ਾਂ 'ਚ ਅਮਰੀਕੀ ਚੌਧਰ ਕਾਇਮ ਕਰਨੀ ਜਾਂ ਰੱਖਣੀ ਹੋਰ ਵੀ ਮੁਹਾਲ ਹੋ ਜਾਵੇਗੀ। ਗਰੀਨ ਲੈਂਡ ਅਤੇ ਪਨਾਮਾ ਜਿਹੇ ਜੋਖਮਾਂ ਨਾਲ ਅਮਰੀਕਨ ਸਾਮਰਾਜ ਤੇ ਯੂਰਪੀ ਸਾਮਰਾਜੀ ਸ਼ਕਤੀਆਂ 'ਚ ਪਹਿਲਾਂ ਮੌਜੂਦ ਵਿੱਥ ਹੋਰ ਚੌੜੀ ਤੇ ਗੰਭੀਰ ਹੋ ਸਕਦੀ ਹੈ। ਅਮਰੀਕਨ ਸਾਮਰਾਜ ਨੂੰ ਸੰਸਾਰ ਪੱਧਰ 'ਤੇ ਹੋਰ ਵੀ ਅਨੇਕ ਨਿੱਕੀਆਂ-ਵੱਡੀਆਂ ਚੁਣੌਤੀਆਂ ਦਾ ਸਾਹਮਣਾ ਹੈ ਅਤੇ ਇਸ ਦੀਆਂ ਜੰਗੀ ਵਿਉਂਤਾਂ ਤੇ ਤਿਆਰੀਆਂ ਨੇ ਇਹਨਾਂ 'ਚ ਵਾਧਾ ਕਰਨਾ ਹੈ।
ਵੈਨਜ਼ੁਏਲਾ ਦੀ ਮਾਦੁਰੋ ਸਰਕਾਰ ਹਾਲੇ ਤੱਕ ਡਟ ਕੇ ਵੈਨਜ਼ੁਏਲਾ ਦੇ ਕੌਮੀ ਹਿੱਤਾਂ, ਇਸਦੀ ਆਜ਼ਾਦੀ, ਪ੍ਰਭਸੱਤਾ ਤੇ ਸਵੈਮਾਨ ਦੀ ਰਾਖੀ ਲਈ ਦ੍ਰਿੜ ਜਾਪਦੀ ਹੈ। ਇਸਨੇ ਐਲਾਨ ਕੀਤਾ ਹੈ ਕਿ “ਵੈਨਜ਼ੁਏਲਾ ਹੁਣ ਕਦੇ ਵੀ ਕਿਸੇ ਰਾਜਸ਼ਾਹੀ ਜਾਂ ਵਿਦੇਸ਼ੀ ਤਾਕਤ ਦੀ ਬਸਤੀ ਨਹੀਂ ਬਣੇਗਾ। ਇਹ ਆਪਣੇ ਲੋਕਾਂ ਦੇ ਸਾਥ ਨਾਲ ਖੁਸ਼ਹਾਲ ਵੈਨਜ਼ੁਏਲਾ ਦਾ ਨਿਰਮਾਣ ਕਰਨ ਅਤੇ ਆਪਣੀ ਆਜ਼ਾਦੀ ਤੇ ਪ੍ਰਭੂਸੱਤਾ ਦੀ ਰਾਖੀ ਕਰਨ ਦੇ ਰਾਹ 'ਤੇ ਡਟਿਆ ਰਹੇਗਾ।” --0--
