ਪਿੰਡਾਂ ਨੂੰ ਜਗਾਓ

ਪਿੰਡਾਂ ਨੂੰ ਜਗਾਓ
-ਅਮੋਲਕ ਸਿੰਘ
ਜਾਗੋ ਪਿੰਡ ਪਿੰਡ ਆਈ
ਇਹ ਸੁਨੇਹਾ ਲੈ ਕੇ ਆਈ
ਸੁੱਤੀ ਜਾਗੇ ਇਹ ਲੋਕਾਈ
ਰੁੱਤ ਜਾਗਣੇ ਦੀ ਆਈ

ਗੂੜ੍ਹੀ ਨੀਂਦ ਸੁੱਤੇ, ਲੋਕਾਂ ਨੂੰ ਜਗਾ ਦਿਓ
ਪਿੰਡਾਂ ਨੂੰ ਜਗਾਓ, ਪਿੰਡਾਂ ਨੂੰ ਹਿਲਾ ਦਿਓ
ਪਿੰਡਾਂ ਨੂੰ ਜਗਾਓ.. .. ..

ਦਫ਼ਾ ਇਹ ਚੁਤਾਲੀ ਪਿੰਡ ਪਿੰਡ ਮੜ੍ਹਦੇ
ਸਾਹ ਲੈਣ ਉੱਤੇ ਵੀ ਪਾਬੰਦੀ ਜੜਦੇ

ਰਾਜ ਭਾਗ ਮਾਰੇ ਡੰਡੇ ਬੁੱਢੀ ਮਾਂ 'ਤੇ
ਤਣੀਆਂ ਬੰਦੂਕਾਂ ਦੇਖੋ 'ਨੰਨ੍ਹੀ ਛਾਂ' 'ਤੇ

ਮੰਗ-ਪੱਤਰਾਂ ਤੋਂ ਐਨੇ ਹਾਕਮ ਡਰੇ
ਛਾਪਾਮਾਰੀ ਕੀਤੀ ਸਾਡੇ ਆਣ ਕੇ ਘਰੇ

ਭਾਵੇਂ ਰੋਕਾਂ ਮੜ੍ਹੀਆਂ ਬਠਿੰਡੇ ਸ਼ਹਿਰ 'ਤੇ
ਚੜ੍ਹ ਗਈ ਜੁਆਨੀ ਦੂਣੀ ਲੋਕ-ਲਹਿਰ 'ਤੇ

ਪਿੰਡਾਂ ਦੀਆਂ ਕੰਧਾਂ ਉੱਤੇ ਲਿਖ ਲਾ ਦਿਓ
ਪਿੰਡਾਂ ਨੂੰ ਜਗਾਓ.. .. ..

ਮੰਗ-ਪੱਤਰਾਂ 'ਚ ਲੋਕੀ ਹੱਕ ਮੰਗਦੇ
ਹਾਕਮਾਂ ਦੇ ਬਾਰ ਮੂਹਰੇ ਆਣ ਖੰਘਦੇ

ਚੜ੍ਹਿਆ ਬੁਖ਼ਾਰ ਹੈ ਜਾਗੀਰਦਾਰਾਂ ਨੂੰ
ਨੀਂਦ ਨਹੀਂਓਂ ਆਉਂਦੀ ਵੱਡੇ ਸ਼ਾਹੂਕਾਰਾਂ ਨੂੰ

ਢਿੱਡ ਸੂਲ ਹੋ ਗਿਆ 'ਜਮਹੂਰੀ ਰਾਜ' ਦੇ
ਗਲ਼ 'ਗੂਠਾ ਦਿੱਤਾ ਲੋਕਾਂ ਦੀ ਆਵਾਜ਼ ਦੇ

ਜਿੰਨਾ ਉਹ ਦਬਾਉਣ ਲੋਕੀ ਹੋਰ ਉੱਠਦੇ
ਹਾਕਮਾਂ ਦੇ ਹੁਕਮਾਂ 'ਤੇ ਲੋਕ ਥੁੱਕਦੇ
ਪੰਨੇ ਇਤਿਹਾਸ ਵਾਲੇ ਇਹ ਸੁਣਾ ਦਿਓ
ਪਿੰਡਾਂ ਨੂੰ ਜਗਾਓ.. .. ..

ਸੰਗਤਾਂ ਦੇ ਦਰਸ਼ਨ ਓਹਲਾ ਪਰਦਾ
ਡੰਡਿਆਂ ਦੇ ਨਾਲ ਰਾਜ 'ਸੇਵਾ' ਕਰਦਾ

ਕਰਜ਼ੇ ਦੇ ਮਾਰੇ ਲੋਕੀ ਮੰਗ ਕਰਦੇ
ਕੀਹਦੇ ਕੋਲੇ ਦੱਸੀਏ ਜੀ ਦੁੱਖ ਘਰ ਦੇ

ਨਾਕਾਬੰਦੀ ਕਰਦੇ ਨੇ ਪਿੰਡ ਪਿੰਡ ਦੀ
ਭੰਨ ਦੇਣੀ ਲੋਕਾਂ, ਹਾਕਮਾਂ ਦੀ ਹਿੰਡ ਜੀ

ਲੋਕਾਂ ਨਾਲ ਜੀਹਨੇ ਵੀ ਹੈ ਮੱਥਾ ਲਾ ਲਿਆ
ਜਿੱਤ ਜਾਂਦੇ ਲੋਕ, ਜਾਬਰਾਂ ਨੂੰ ਢਾਅ ਲਿਆ

ਹੱਕ ਦੇ ਨਗ਼ਾਰੇ ਉੱਤੇ ਚੋਟ ਲਾ ਦਿਓ
ਪਿੰਡਾਂ ਨੂੰ ਜਗਾਓ.........

ਪੁਲਸ, ਕਾਨੂੰਨ ਦੀਆਂ ਡੋਰਾਂ ਲੱਭੀਏ
ਜੀਹਦੇ ਹੱਥ ਡੋਰਾਂ ਉਹਦੀ ਪੈੜ ਦੱਬੀਏ

ਹਾਲੇ ਤਾਂ ਗ਼ੁਲਾਮੀ ਦੀਆਂ ਪੈਰੀਂ ਬੇੜੀਆਂ
ਲੁੱਟਦੀਆਂ, ਕੁੱਟਦੀਆਂ ਨਿੱਤ ਜਿਹੜੀਆਂ

ਕਰਦੇ ਤਮਾਸ਼ਾਂ ਐਵੇ ਵੋਟਾਂ ਪਾਉਣ ਦਾ 
ਲੁੱਟੇ ਹੋਏ ਮਾਲ ਦੀਆਂ ਵੰਡਾਂ ਪਾਉਣ ਦਾ

ਇੱਕੋ ਜਿਹੀਆਂ ਨੀਤੀਆਂ ਡਕੈਤ ਘੜਦੇ
ਵੰਨ ਤੇ ਸੁਵੰਨੇ ਐਵੇਂ ਪਾਉਣ ਪੜਦੇ

'ਕੱਠੇ ਹੋ ਕੇ ਏਨ੍ਹਾਂ ਦੇ ਨਕਾਬ ਲਾਹ ਦਿਓ
ਪਿੰਡਾਂ ਨੂੰ ਜਗਾਓ.............


ਸਾਂਝੇ ਦੁੱਖਾਂ ਵਾਲੀ ਸਾਂਝੀ ਪੂਣੀ ਕੱਤੀਏ
ਫ਼ਰਜ਼ਾਂ ਤੋਂ ਭੁੱਲ ਕੇ ਨਾ ਅੱਖ ਵੱਟੀਏ

ਜਕੋ ਤਕੀ ਛੱਡੋ ਉੱਠੋ ਜੋਟੀ ਪਾ ਲਈਏ
ਪਿੰਡਾਂ ਵਿੱਚੋਂ ਸੁੱਤੇ ਸ਼ੇਰਾਂ ਨੂੰ ਜਗਾ ਲਈਏ

ਇੱਕ ਪਿੰਡ ਜਾਗੇ, ਦੂਜੇ ਨੂੰ ਜਗਾ ਲਏ
ਔਰਤਾਂ ਤੇ ਮਰਦਾਂ ਨੇ ਮੋਢੇ ਲਾ ਲਏ

ਬੇੜੀ ਹੈ ਕਿਨਾਰੇ 'ਕੱਠੇ ਹੋ ਕੇ ਲੱਗਣੀ
ਜਾਬਰਾਂ ਦੇ ਤਾਲੂਏ 'ਚ ਸੱਟ ਵੱਜਣੀ

ਉੱਠੋ ਸ਼ੇਰੋ ਕੂੜ ਦੇ ਮਹੱਲ ਢਾਅ ਦਿਓ
ਪਿੰਡਾਂ ਨੂੰ ਜਗਾਓ.. .. ..

(ਪਿੰਡ ਫਤਿਹਗੜ੍ਹ ਛੰਨਾ (ਬਰਨਾਲਾ) ਵਿਖੇ ਔਰਤ-ਮਰਦ, ਮਜ਼ਦੂਰਾਂ-ਕਿਸਾਨਾਂ ਦੇ ਇਤਿਹਾਸਕ ਜੋੜ-ਮੇਲੇ 'ਚ ਨਵਦੀਪ ਧੌਲਾ ਵੱਲੋਂ ਪੇਸ਼ ਗੀਤ)