ਮੁਲਾਜ਼ਮ ਆਗੂ ਹੇਮ ਰਾਜ ਬਾਦਲ ਨੂੰ ਸ਼ਰਧਾਂਜ਼ਲੀਆਂ

 ਮੁਲਾਜ਼ਮ ਆਗੂ ਹੇਮ ਰਾਜ ਬਾਦਲ ਨੂੰ ਸ਼ਰਧਾਂਜ਼ਲੀਆਂ 

ਟੈਕਨੀਕਲ ਸਰਵਿਸਜ਼ ਯੂਨੀਅਨ (ਰਜਿ) ਪੰਜਾਬ ਰਾਜ ਬਿਜਲੀ ਬੋਰਡ ਸਰਕਲ ਸ੍ਰੀ ਮੁਕਤਸਰ ਸਾਹਿਬ ਦੇ ਸਾਬਕਾ ਸਰਕਲ ਪ੍ਰਧਾਨ ਹੇਮ ਰਾਜ ਬਾਦਲ ਦੇ ਪਿੰਡ ਬਾਦਲ ਵਿਖੇ ਹੋਏ ਸ਼ਰਧਾਂਜਲੀ ਸਮਾਗਮ ਮੌਕੇ ਬਿਜਲੀ ਕਾਮਿਆਂ ਤੋਂ ਇਲਾਵਾ ਖੇਤ ਮਜ਼ਦੂਰਾਂ, ਕਿਸਾਨਾਂ ਤੇ ਆਰ ਐਮ ਪੀ ਡਾਕਟਰਾਂ ਸਮੇਤ ਵੱਖ ਵੱਖ ਵਰਗਾਂ ਦੀਆਂ ਜਥੇਬੰਦੀਆਂ ਦੇ ਆਗੂਆਂ ਤੇ ਵਰਕਰਾਂ ਅਤੇ ਪਿੰਡ ਵਾਸੀਆਂ ਵੱਲੋਂ ਭਾਰੀ ਸ਼ਮੂਲੀਅਤ ਕੀਤੀ ਗਈ। ਸਮਾਧ ਬਾਬਾ ਹੀਰਾ ਦਾਸ ਵਿਖੇ ਹੇਮਰਾਜ ਦੇ ਭੋਗ ਉਪਰੰਤ ਖੁੱਲ੍ਹੇ ਪੰਡਾਲ 'ਚ ਜੁੜੇ ਇਕੱਠ ਨੂੰ ਟੈਕਨੀਕਲ ਸਰਵਿਸਿਜ਼ ਯੂਨੀਅਨ ਦੇ ਸੂਬਾ ਚੀਫ਼ ਆਰਗੇਨਾਈਜਰ ਭੁਪਿੰਦਰ ਸਿੰਘ ਬਿੱਟੂ, ਸਰਕਲ ਪ੍ਰਧਾਨ ਜਰਨੈਲ ਸਿੰਘ, ਸਾਬਕਾ ਸੂਬਾ ਪ੍ਰਧਾਨ ਸੁਖਵੰਤ ਸਿੰਘ ਸੇਖੋਂ, ਸਤਪਾਲ ਬਾਦਲ,ਪੰਜਾਬ ਖੇਤ ਮਜ਼ਦੂਰ ਯੂਨੀਅਨ ਦੇ ਸੂਬਾ ਜਨਰਲ ਸਕੱਤਰ ਲਛਮਣ ਸਿੰਘ ਸੇਵੇਵਾਲਾ, ਬੀਕੇਯੂ ਏਕਤਾ ਉਗਰਾਹਾਂ ਦੇ ਬਲਾਕ ਪ੍ਰਧਾਨ ਗੁਰਪਾਸ਼ ਸਿੰਘ, ਪੈਨਸ਼ਨਰ ਐਸੋਸ਼ੀਏਸ਼ਨ ਦੇ ਆਗੂ ਦਿਲਾਵਰ ਸਿੰਘ ਤੇ ਮੈਡੀਕਲ ਪ੍ਰੈਕਟੀਸ਼ਨਰਜ਼ ਐਸੋਸੀਏਸ਼ਨ ਦੇ ਆਗੂ ਡਾਕਟਰ ਮਨਜਿੰਦਰ ਸਿੰਘ ਸਰਾਂ ਨੇ ਸੰਬੋਧਨ ਕੀਤਾ। ਮੁਲਾਜ਼ਮ ਆਗੂ ਸੁਖਵੰਤ ਸਿੰਘ ਸੇਖੋਂ ਨੇ ਸੰਬੋਧਨ ਕਰਦਿਆਂ ਆਖਿਆ ਕਿ ਹੇਮਰਾਜ ਬਾਦਲ ਨੇ -ਆਪਣੀ ਨੌਕਰੀ ਦੌਰਾਨ ਬਿਜਲੀ ਕਾਮਿਆਂ ਦੀਆਂ ਬਿਹਤਰ ਕੰਮ ਹਾਲਤਾਂ ਸਿਰਜਣ ਤੇ ਪੁੱਗਤ ਸਥਾਪਤੀ ਲਈ ਅਹਿਮ ਜੱਦੋਜਹਿਦ ਕੀਤੀ। ਉਹਨਾਂ ਆਖਿਆ ਕਿ ਹੇਮ ਰਾਜ ਨੇ ਨੌਕਰੀ ਦੌਰਾਨ ਸ਼ਹੀਦ ਭਗਤ ਸਿੰਘ ਦੇ ਵਿਚਾਰਾਂ ਤੋਂ ਪ੍ਰਭਾਵਿਤ ਹੋ ਕੇ ਮੁਲਾਜ਼ਮਾਂ ਤੋਂ ਇਲਾਵਾ ਖੇਤ ਮਜ਼ਦੂਰਾਂ, ਕਿਸਾਨਾਂ, ਠੇਕਾ ਕਾਮਿਆਂ ਸਮੇਤ ਸਮੂਹ ਕਿਰਤੀ ਕਮਾਊ ਲੋਕਾਂ ਦੇ ਸਾਂਝੇ ਤੇ ਵਿਸ਼ਾਲ ਘੋਲਾਂ ਦੀ ਸਿਰਜਣਾ ਲਈ ਲੰਬੀ ਇਲਾਕੇ 'ਚ ਅਹਿਮ ਭੂਮਿਕਾ ਨਿਭਾਈ। ਮਜ਼ਦੂਰ ਆਗੂ ਲਛਮਣ ਸਿੰਘ ਸੇਵੇਵਾਲਾ ਨੇ ਆਖਿਆ ਕਿ ਹੇਮਰਾਜ ਬਾਦਲ ਨੇ ਕਿਰਤੀ ਲੋਕਾਂ 'ਚ ਵੰਡੀਆਂ ਪਾਉਣ ਵਾਲੀਆਂ ਫਿਰਕੂ ਤਾਕਤਾਂ ਅਤੇ ਹਕੂਮਤੀ ਜਬਰ ਖ਼ਿਲਾਫ਼ ਵੀ ਡਟ ਕੇ ਆਵਾਜ਼ ਬੁਲੰਦ ਕੀਤੀ। ਹੇਮਰਾਜ ਦੀ ਬੇਟੀ ਸਰਬਜੀਤ ਕੌਰ ਤੇ ਮਨਦੀਪ ਕੌਰ ਨੇ ਆਏ ਲੋਕਾਂ ਦਾ ਧੰਨਵਾਦ ਕਰਦਿਆਂ ਹੇਮਰਾਜ ਵੱਲੋਂ ਬੱਚਿਆਂ ਦੇ ਚੰਗੇ ਪਾਲਣ ਪੋਸ਼ਣ ਤੋਂ ਇਲਾਵਾ ਧੀਆਂ ਨੂੰ ਦਿੱਤੇ ਜਮਹੂਰੀ ਤੇ ਬਰਾਬਰਤਾ ਵਾਲੇ ਮਾਹੌਲ ਦੀ ਚਰਚਾ ਕੀਤੀ। ਇਨਕਲਾਬੀ ਜਮਹੂਰੀ ਫਰੰਟ ਦੇ ਸੂਬਾ ਕਨਵੀਨਰ ਗੁਰਦਿਆਲ ਭੰਗਲ ਤੇ ਪਲਸ ਮੰਚ ਦੇ ਪ੍ਰਧਾਨ ਅਮੋਲਕ ਸਿੰਘ ਵੱਲੋਂ ਸ਼ੋਕ ਸੰਦੇਸ਼ ਭੇਜੇ ਗਏ। 

ਇਨਕਲਾਬੀ ਜਮਹੂਰੀ ਫਰੰਟ ਪੰਜਾਬ ਦੇ ਕਨਵੀਨਰ ਗੁਰਦਿਆਲ ਸਿੰਘ ਭੰਗਲ ਵੱਲੋਂ  ਸਮਾਗਮ  'ਚ ਭੇਜਿਆ ਗਿਆ ਸ਼ੋਕ ਸੰਦੇਸ਼ 

ਸਾਥੀ ਹੇਮਰਾਜ ਲੰਬੀ ਬਿਮਾਰੀ ਉਪਰੰਤ ਸਾਨੂੰ ਸਦੀਵੀ ਵਿਛੋੜਾ ਦੇ ਗਏ ਹਨ। ਜਿਥੇ ਉਨ੍ਹਾਂ ਦੇ ਇਸ  ਨਾ ਸਹਿਣ ਯੋਗ ਵਿਛੋੜੇ ਦਾ ਦੁੱਖ ਸਾਥੀ ਦੇ ਪਰਿਵਾਰ ਨੂੰ ਹੈ ਉਥੇ ਉਨ੍ਹਾਂ ਦੇ ਇਸ ਵਿਛੋੜੇ ਦਾ ਡੂੰਘਾ ਅਫ਼ਸੋਸ ਅਤੇ ਵੱਡਾ ਘਾਟਾ ਪੰਜਾਬ ਦੇ ਲੋਕਾਂ ਦੀ ਇਨਕਲਾਬੀ ਜਮਹੂਰੀ ਲਹਿਰ ਨੂੰ ਵੀ ਪਿਆ ਹੈ। ਕਿਉਂ ਕਿ ਸਾਥੀ ਹੇਮ ਰਾਜ ਕਹਿਣ ਨੂੰ ਭਾਵੇਂ ਬਿਜਲੀ ਮੁਲਾਜ਼ਮਾਂ ਦੀ ਟੈਕਨੀਕਲ ਸਰਵਿਸਿਜ਼ ਯੂਨੀਅਨ ਦੇ ਸਾਬਕਾ ਸਰਕਲ ਪ੍ਰਧਾਨ ਸਨ। ਪਰ ਉਨ੍ਹਾਂ ਦਾ ਮੱਤ ਸੀ ਕਿ ਟਰੇਡ ਯੂਨੀਅਨਾਂ ਇਕ ਸੀਮਤ ਹੱਦ ਤੱਕ ਹੀ ਮਸਲਿਆਂ ਦਾ ਹੱਲ ਕਰਵਾ ਸਕਦੀਆਂ ਹਨ। ਮੁਲਾਜ਼ਮ ਅਤੇ ਲੋਕਾਂ ਦੀ ਪੂਰਨ ਮੁਕਤੀ ਲਈ ਇਸ ਤੋਂ ਅਗਾਂਹ ਇਨ੍ਹਾਂ ਦੀ ਇਨਕਲਾਬੀ ਕਾਇਆ ਪਲਟੀ ਦੀ ਦਿਸ਼ਾ ਸੇਧ ਅਖਤਿਆਰ ਕਰਕੇ ਯੂਨੀਅਨਾਂ ਨੂੰ ਇਸ ਦਿਸ਼ਾ ਸੇਧ ਅਨੁਸਾਰ ਵਿਕਸਿਤ ਕਰਨ ਦਾ ਕਾਰਜ ਯੂਨੀਅਨਾਂ ਦੀਆਂ ਲੀਡਰਸ਼ਿਪਾਂ ਵੱਲੋਂ ਆਪਣੇ ਹੱਥ ਲੈ ਕੇ ਕਰਨ ਦੀ ਜ਼ਰੂਰਤ ਹੈ। ਸਾਥੀ ਹੇਮ ਰਾਜ ਇਸ ਮੁਕੰਮਲ ਮੁਕਤੀ ਦੇ ਰਾਹ ਦਾ ਨਿਧੜਕ ਅਤੇ ਸੱਚਾ ਪਾਂਧੀ ਸੀ ਤੇ ਉਹ ਸਾਥੀ ਕਰੋੜਾ ਸਿੰਘ ਤੇ ਅਮਰ ਲੰਬੀ ਵਰਗੇ ਸਾਥੀਆਂ ਦਾ ਸੰਗੀ ਤੇ ਮੋਹਰਲੀ ਕਤਾਰ ਦਾ ਆਗੂ ਸੀ।

ਅੱਜ ਜਿਸ ਸਮੇਂ ਅਸੀਂ ਉਨ੍ਹਾਂ ਨੂੰ ਸ਼ਰਧਾਂਜਲੀ ਭੇਟ ਕਰ ਰਹੇ ਹਾਂ ਇਸ ਸਮੇਂ ਉਨ੍ਹਾਂ ਵੱਲੋਂ ਟਰੇਡ ਯੂਨੀਅਨਾਂ ਦੀ ਇਨਕਲਾਬੀ ਕਾਇਆ ਪਲਟੀ ਦਾ ਕਾਰਜ ਅਧੂਰਾ ਹੈ। ਇਸ ਰਾਹ ਵਿੱਚ ਆਉਣ ਵਾਲੀਆਂ ਚੁਣੌਤੀਆਂ ਨੂੰ ਸਰ ਕਰਨ ਲਈ ਅੱਜ ਵੀ ਪਹਿਲਾਂ ਦੀ ਤਰ੍ਹਾਂ ਤਿੱਖੀ ਜੱਦੋਜਹਿਦ ਦੀ ਲੋੜ ਜਿਉਂ ਦੀ ਤਿਉਂ ਬਰਕਰਾਰ ਹੈ। ਇਸ ਹਾਲਤ ਵਿੱਚ ਸਾਥੀ ਹੇਮ ਰਾਜ ਨੂੰ ਸੱਚੀ ਸ਼ਰਧਾਂਜਲੀ ਉਸ ਵੱਲੋਂ ਜਾਰੀ ਜੱਏਦੋਜਹਿਦ ਨੂੰ ਜਾਰੀ ਰੱਖਣਾ ਹੋਵੇਗਾ। ਮੈਂ ਆਸ ਕਰਾਂਗਾ ਕਿ ਤੁਸੀਂ ਸਭ ਸਾਥੀ ਹੇਮ ਰਾਜ ਵੱਲੋਂ ਅਪਣਾਏ ਰਾਹ 'ਤੇ ਚੱਲ ਕੇ ਉਸ ਦੇ ਅਧੂਰੇ ਕਾਰਜ ਨੂੰ ਪੂਰਾ ਕਰਨ ਲਈ ਪੂਰਾ ਤਾਣ ਲਾਉਗੇ, ਇਹੀ ਸਾਥੀ ਨੂੰ ਸੱਚੀ ਸ਼ਰਧਾਂਜਲੀ ਹੋਵੇਗੀ। (ਸੰਖੇਪ)