ਇਜ਼ਰਾਈਲੀ ਜੰਗੀ ਕੁਕਰਮਾਂ ’ਚ ਭਾਈਵਾਲ ਬਣ ਰਹੇ ਭਾਰਤੀ ਹਾਕਮ

 ਇਜ਼ਰਾਈਲੀ ਜੰਗੀ ਕੁਕਰਮਾਂ ’ਚ ਭਾਈਵਾਲ ਬਣ ਰਹੇ ਭਾਰਤੀ ਹਾਕਮ

ਗਾਜ਼ਾ ’ਤੇ ਵਰ੍ਹਾਏ ਜਾ ਰਹੇ ਬਰੂਦ ਦੀ ਸਪਲਾਈ ’ਚ ਹਿੱਸੇਦਾਰੀ

ਗਾਜ਼ਾ ਵਿੱਚ ਚੱਲ ਰਹੇ ਮਨੁੱਖੀ ਨਸਲ ਘਾਤ ਦੇ ਦਰਮਿਆਨ ਜਿੱਥੇ ਦੁਨੀਆਂ ਦੇ ਅਨੇਕਾਂ ਮੁਲਕ ਇਜ਼ਰਾਈਲ ਦੀ ਇਸ ਧੱਕੇਸ਼ਾਹੀ ਦੇ ਵਿਰੋਧ ਵਿੱਚ ਖੜ੍ਹੇ ਹਨ, ਉੱਥੇ ਭਾਰਤ ਇਸ ਕੁਕਰਮ ਵਿੱਚ ਭਾਈਵਾਲ ਬਣ ਰਿਹਾ ਹੈ। ਕਿਸੇ ਸਮੇਂ ਭਾਰਤ ਫ਼ਲਸਤੀਨੀ ਕਾਜ ਦਾ ਹਮਾਇਤੀ ਰਿਹਾ ਹੈ। ਪਰ ਪਿਛਲੇ ਸਮੇਂ ਤੋਂ ਇਹਨੇ ਲਗਾਤਾਰ ਉਸ ਨੂੰ ਪਿੱਠ ਦਿਖਾਉਣੀ ਸ਼ੁਰੂ ਕੀਤੀ ਹੈ। ਮੋਦੀ ਹਕੂਮਤ ਦੇ 2014 ਵਿੱਚ ਸੱਤਾ ਵਿੱਚ ਆਉਣ ਤੋਂ ਬਾਅਦ ਉਸਨੇ ਇਜ਼ਰਾਈਲ ਨਾਲ ਹੋਰ ਵੀ ਨੇੜਤਾ ਗੰਢੀ ਹੈ ਅਤੇ ਅਨੇਕਾਂ ਫੌਜੀ ਸੰਧੀਆਂ ਕੀਤੀਆਂ ਜਿਸ ਦੇ ਇਜ਼ਰਾਈਲ ਫ਼ਲਸਤੀਨ ਅਤੇ ਭਾਰਤ ਸਮੇਤ ਅਨੇਕਾਂ ਦੇਸ਼ਾਂ ਦੇ ਲੋਕਾਂ ਲਈ ਮਾਰੂ ਅਰਥ ਬਣਦੇ ਹਨ। ਹੁਣ ਚੱਲ ਰਹੀ ਜੰਗ ਦੌਰਾਨ ਫਲਸਤੀਨੀ ਕਾਜ ਅਤੇ ਮਨੁੱਖੀ ਸਰੋਕਾਰਾਂ ਪ੍ਰਤੀ ਹੋਰ ਵੀ ਦਗਾ ਕਮਾਉਂਦਿਆਂ ਉਹਨੇ ਇਸ ਜੰਗ ਵਿੱਚ ਇਜ਼ਰਾਈਲ ਨੂੰ ਮਾਰੂ ਹਥਿਆਰਾਂ ਦੀ ਸਪਲਾਈ ਕੀਤੀ ਹੈ।
      ਭਾਵੇਂ ਭਾਰਤ ਸਰਕਾਰ ਪੂਰਾ ਜ਼ੋਰ ਲਾ ਕੇ ਇਹਨਾਂ ਤੱਥਾਂ ਨੂੰ ਲੁਕਾਉਣ ਦੀ ਕੋਸ਼ਿਸ਼ ਕਰ ਰਹੀ ਹੈ, ਪਰ ਭਾਰਤ ਵਿੱਚੋਂ ਰਾਕਟਾਂ, ਡਰੋਨਾਂ ਅਤੇ ਹੋਰ ਧਮਾਕਾਖੇਜ਼ ਸਮੱਗਰੀ ਦੀ ਇਜ਼ਰਾਈਲ ਨੂੰ ਕੀਤੀ ਗਈ ਬਰਾਮਦ ਦੇ ਕਈ ਸਬੂਤ ਸਾਹਮਣੇ ਆਏ ਹਨ। ਲੰਘੀ ਦੋ ਅਪ੍ਰੈਲ ਨੂੰ ਚੇਨਈ ਤੋਂ ਚੱਲੇ ਬੋਰਕਮ ਨਾਂ ਦੇ ਜਹਾਜ਼ ਖ਼ਿਲਾਫ਼ ਸਪੇਨ ਦੀ ਬੰਦਰਗਾਹ ਉੱਤੇ ਜ਼ੋਰਦਾਰ ਪ੍ਰਦਰਸ਼ਨ ਹੋਏ ਹਨ। ਫ਼ਲਸਤੀਨ ਪੱਖੀ ਪ੍ਰਦਰਸ਼ਨਕਾਰੀਆਂ ਨੇ ਸਰਕਾਰ ਕੋਲ ਇਹ ਮੁੱਦਾ ਉਠਾਇਆ ਸੀ ਕਿ ਇਹ ਜਹਾਜ਼ ਭਾਰਤ ਤੋਂ ਜੰਗੀ ਹਥਿਆਰ ਲੈ ਕੇ ਇਜ਼ਰਾਈਲ ਜਾ ਰਿਹਾ ਹੈ ਅਤੇ ਇਸ ਨੂੰ ਸਪੇਨ ਦੀ ਬੰਦਰਗਾਹ ਉੱਤੇ ਥਾਂ ਨਹੀਂ ਮਿਲਣੀ ਚਾਹੀਦੀ। ਇਸ ਰੌਲੇ ਰੱਪੇ ਕਾਰਨ ਇਸ ਜਹਾਜ਼ ਨੇ ਸਪੇਨ ਦੀ ਬੰਦਰਗਾਹ ’ਤੇ ਰੁਕਣਾ ਮੁਨਾਸਬ ਨਹੀਂ ਸਮਝਿਆ। ਬਾਅਦ ਵਿੱਚ ਕੀਤੀ ਗਈ ਜਾਂਚ ਤੋਂ ਸਾਹਮਣੇ ਆਇਆ ਕਿ ਇਹ ਜਹਾਜ਼ ਭਾਰਤ ਦੀ ਚੇਨਈ ਬੰਦਰਗਾਹ ਤੋਂ ਜੰਗੀ ਹਥਿਆਰ ਲੈ ਕੇ ਇਜ਼ਰਾਈਲ ਦੀ ਅਸ਼ਦੋਦ ਬੰਦਰਗਾਹ ਵੱਲ ਜਾ ਰਿਹਾ ਸੀ ਜੋ ਕਿ ਗਾਜ਼ਾ ਪੱਟੀ ਤੋਂ ਮਹਿਜ਼ 30 ਕਿਲੋਮੀਟਰ ਦੂਰੀ ’ਤੇ ਹੈ। ਇਸ ਵਿੱਚ 20 ਟਨ ਰਾਕਟ ਇੰਜਨ,12.5 ਟਨ ਧਮਾਕਾਖੇਜ ਸਮੱਗਰੀ ਨਾਲ ਭਰੇ ਰਾਕਟ, 1500 ਕਿਲੋ ਧਮਾਕਾਖੇਜ਼ ਸਮੱਗਰੀ ਅਤੇ 740 ਕਿਲੋ ਤੋਪਾਂ ਦਾ ਬਾਲਣ ਅਤੇ ਚਾਰਜ ਮੌਜੂਦ ਸੀ। ਇਸ ਦੇ ਸਾਰੇ ਕਰਮਚਾਰੀਆਂ ਨੂੰ ਸਖਤ ਹਿਦਾਇਤਾਂ ਸਨ ਕਿ ਉਹਨਾਂ ਨੇ ਕਿਸੇ ਵੀ ਹਾਲਤ ਵਿੱਚ ਇਜ਼ਰਾਇਲ ਜਾਂ ਆਈ.ਐਮ.ਆਈ ਸਿਸਟਮ ਦੇ ਨਾਂ ਬਾਰੇ ਖੁਲਾਸਾ ਨਹੀਂ ਕਰਨਾ। ਆਈ.ਐਮ.ਆਈ ਸਿਸਟਮ ਹਥਿਆਰਾਂ ਦੀ ਉਹ ਕੰਪਨੀ ਹੈ ਜਿਸ ਨੂੰ 2018 ਵਿੱਚ ਇਜ਼ਰਾਈਲ ਦੀ ਇੱਕ ਹੋਰ ਸਭ ਤੋਂ ਵੱਡੀ ਹਥਿਆਰ ਨਿਰਮਾਤਾ ਕੰਪਨੀ ਐਲਬਿਟ ਨੇ ਖਰੀਦ ਲਿਆ ਸੀ। ਉਸ ਤੋਂ ਬਾਅਦ 21 ਮਈ ਨੂੰ ਸਪੇਨ ਦੀ ਕਾਰਟਾਜਿਨਾ ਬੰਦਰਗਾਹ ਉੱਤੇ ਇੱਕ ਹੋਰ ਜਹਾਜ਼ ਮੇਰੀਏਨ ਡੈਨਿਕਾ ਨੂੰ ਰੁਕਣ ਦੀ ਇਜਾਜ਼ਤ ਨਾ ਦਿੱਤੀ ਗਈ। ਇਹ ਜਹਾਜ਼ ਚੇਨਈ ਤੋਂ ਇਜ਼ਰਾਇਲ ਦੀ ਹਾਇਫ਼ਾ ਬੰਦਰਗਾਹ ਵੱਲ 27 ਟਨ ਧਮਾਕਾਖੇਜ ਸਮੱਗਰੀ ਲੈ ਕੇ ਜਾ ਰਿਹਾ ਸੀ। ਇਜ਼ਰਾਈਲ ਦੀ ਇਹ ਬੰਦਰਗਾਹ ਗੌਤਮ ਅਡਾਨੀ ਦੀ ਮਾਲਕੀ ਵਾਲੀ ਬੰਦਰਗਾਹ ਹੈ।
        ਜੂਨ ਦੇ ਪਹਿਲੇ ਹਫਤੇ ਦੌਰਾਨ ਇਜ਼ਰਾਈਲ ਨੇ ਗਾਜ਼ਾ ਪੱਟੀ ਦੇ ਨੁਸੇਰਤ ਰਾਹਤ ਕੈਂਪ ’ਤੇ ਹਮਲਾ ਕਰਕੇ 300 ਦੇ ਕਰੀਬ ਲੋਕਾਂ ਨੂੰ ਮੌਤ ਦੇ ਘਾਟ ਉਤਾਰ ਦਿੱਤਾ। ਇਸ ਵਹਿਸ਼ੀ ਕਾਰੇ ਤੋਂ ਬਾਅਦ ਖਿਲਰੇ ਮਲਬੇ ਵਿੱਚੋਂ ਜੋ ਮਿਜ਼ਾਈਲਾਂ ਦੇ ਹਿੱਸੇ ਮਿਲੇ ਉਹਨਾਂ ਵਿੱਚੋਂ ਇੱਕ ਉੱਤੇ ਭਾਰਤੀ ਮੋਹਰ ਵਾਲਾ ਠੱਪਾ ਪ੍ਰਤੱਖ ਦੇਖਿਆ ਜਾ ਸਕਦਾ ਸੀ।
    ਇਸ ਤੋਂ ਪਹਿਲਾਂ ਇਹ ਸਾਹਮਣੇ ਆ ਚੁੱਕਿਆ ਹੈ ਕਿ ਐਲਬਿਟ ਅਤੇ ਗੌਤਮ ਅਡਾਨੀ ਦੀ ਹੈਦਰਾਬਾਦ ਵਿਖੇ ਸਥਾਪਿਤ ਕੀਤੀ ਗਈ ਹਥਿਆਰਾਂ ਦੀ ਸਾਂਝੀ ਕੰਪਨੀ ਅਡਾਨੀ ਐਲਬਿਟ ਅਡਵਾਂਸਡ ਸਿਸਟਮ ਵੱਲੋਂ ਬਣਾਈਆਂ ਗਈਆਂ 20 ਹਰਮਸ ਡਰੋਨਾਂ ਇਜ਼ਰਾਇਲ ਨੂੰ ਭੇਜੀਆਂ ਜਾ ਚੁੱਕੀਆਂ ਹਨ। ਮੀਡੀਆ ਰਿਪੋਰਟਾਂ ਇਹ ਕਹਿੰਦੀਆਂ ਹਨ ਕਿ ਇਹ ਡਰੋਨਾਂ ਦੀ ਖੇਪ ਉੱਚ ਪੱਧਰੀ ਇਜਾਜ਼ਤ ਨਾਲ ਭੇਜੀ ਗਈ ਹੈ। ਇਹ ਡਰੋਨਾਂ ਆਪਣੀ ਮਾਰੂ ਸਮਰੱਥਾ ਕਰਕੇ ਪ੍ਰਸਿੱਧ ਹਨ ਅਤੇ ਫ਼ਲਸਤੀਨੀ ਜੰਗ ਵਿੱਚ ਇਜ਼ਰਾਈਲ ਵੱਲੋਂ ਵੱਡੀ ਪੱਧਰ ਉੱਤੇ ਵਰਤੀਆਂ ਜਾ ਰਹੀਆਂ ਹਨ। ਗੌਤਮ ਅਡਾਨੀ ਅਤੇ ਐਲਬਿਟ ਦੀ ਸਾਂਝ ਵਾਲੀ ਇਹ ਕੰਪਨੀ ਇਜ਼ਰਾਈਲ ਦੀ ਪਹਿਲੀ ਦੇਸ਼ ਤੋਂ ਬਾਹਰ ਹਥਿਆਰਾਂ ਦਾ ਨਿਰਮਾਣ ਕਰਨ ਵਾਲੀ ਕੰਪਨੀ ਹੈ। 2018 ਵਿੱਚ ਸਥਾਪਿਤ ਹੋਈ ਇਹ ਕੰਪਨੀ ਮਨੁੱਖ ਰਹਿਤ ਹਵਾਈ ਸਾਧਨਾਂ( ਅਨਮੈਨਡ ਏਰੀਅਲ ਵਹੀਕਲਸ) ਦਾ ਨਿਰਮਾਣ ਕਰਦੀ ਹੈ। ਐਲਬਿਟ ਦੇ ਡਿਪਟੀ ਸੀ.ਈ.ਓ ਦੀ ਰਿਪੋਰਟ ਮੁਤਾਬਕ 7 ਅਕਤੂਬਰ ਤੋਂ ਬਾਅਦ ਇਸ ਨੂੰ ਮੰਗ ਪੂਰੀ ਕਰਨ ਲਈ 24 ਘੰਟੇ ਕੰਮ ਕਰਨਾ ਪੈ ਰਿਹਾ ਹੈ।
       ਇੱਕ ਹੋਰ ਭਾਰਤੀ ਕੰਪਨੀ ਪ੍ਰੀਮੀਅਰ ਐਕਸਪਲੋਸਿਵ ਲਿਮਿਟਡ ਜੋ ਕਿ ਤਿਲੰਗਾਨਾ ਵਿਖੇ ਸਥਿਤ ਹੈ ਉਸ ਵੱਲੋਂ ਵੀ ਇਜ਼ਰਾਈਲ ਨੂੰ ਜੰਗ ਛਿੜਨ ਤੋਂ ਬਾਅਦ ਦੋ ਵਾਰ ਮਾਰੂ ਹਥਿਆਰਾਂ ਦੀਆਂ ਖੇਪਾਂ ਭੇਜਣ ਦੀ ਰਿਪੋਰਟ ਪੁਸ਼ਟ ਹੋ ਚੁੱਕੀ ਹੈ। ਇਹ ਕੰਪਨੀ ਬਰਾਕ ਮਿਜ਼ਾਈਲਾਂ ਲਈ ਠੋਸ ਬਾਲਣ ਦਾ ਨਿਰਮਾਣ ਕਰਦੀ ਹੈ। ਇਹਨੇ ਪਿਛਲੀਆਂ ਤਿਮਾਹੀਆਂ ਵਿੱਚ ਸਭ ਤੋਂ ਉੱਚੇ ਮੁਨਾਫ਼ੇ ਕਮਾਏ ਹਨ। ਸਿਰਫ ਇਹੀ ਨਹੀਂ ਸਰਕਾਰ ਦੇ ਕੰਟਰੋਲ ਵਾਲੀ ਜਨਤਕ ਖੇਤਰ ਦੀ ਕੰਪਨੀ ਮਿਊਨੀਸ਼ਨ ਇੰਡੀਆ ਲਿਮਿਟਡ ਵੱਲੋਂ ਵੀ ਜਨਵਰੀ 2024 ਵਿੱਚ ਇਜ਼ਰਾਈਲ ਨੂੰ ਅਜਿਹੇ ਸਮਾਨ ਦੀ ਇੱਕ ਖੇਪ ਭੇਜੀ ਜਾ ਚੁੱਕੀ ਹੈ ਅਤੇ ਅਪ੍ਰੈਲ ਮਹੀਨੇ ਵਿੱਚ ਇਸ ਵੱਲੋਂ ਦੂਜੀ ਖੇਪ ਲਈ ਇਜਾਜ਼ਤ ਮੰਗੀ ਗਈ ਹੈ। ਇਹ ਕੰਪਨੀ ਹਥਿਆਰ, ਗੋਲੀ ਸਿੱਕਾ, ਰਾਕਟ, ਹੈਂਡ ਗਰਨੇਡ ਅਤੇ ਹੋਰ ਧਮਾਕਾਖੇਜ਼ ਸਮੱਗਰੀ ਬਣਾਉਂਦੀ ਹੈ। ਇਹ ਵੱਖਰੀ ਗੱਲ ਹੈ ਕਿ ਇਹ ਸਾਰਾ ਸਮਾਨ ਇਸ ਤਰੀਕੇ ਨਾਲ ਭੇਜਿਆ ਗਿਆ ਹੈ ਕਿ ਇਹ ਪ੍ਰਭਾਵ ਦਿੱਤਾ ਜਾ ਸਕੇ ਕਿ ਇਹਨਾਂ ਦੀ ਵਰਤੋਂ ਗੈਰ ਜੰਗੀ ਮੰਤਵਾਂ ਲਈ ਵੀ ਕੀਤੀ ਜਾ ਸਕਦੀ ਹੈ।
     ਭਾਰਤ ਸਰਕਾਰ ਨੇ ਹੁਣ ਤੱਕ ਇਜ਼ਰਾਈਲ ਨੂੰ ਨਾ ਤਾਂ ਹਥਿਆਰ ਭੇਜਣ ਦੀ ਪੁਸ਼ਟੀ ਕੀਤੀ ਹੈ ਅਤੇ ਨਾ ਹੀ ਇਸ ਤੋਂ ਇਨਕਾਰ ਕੀਤਾ ਹੈ। ਪਰ ਕੌਮਾਂਤਰੀ ਮੀਡੀਆ ਰਿਪੋਰਟਾਂ ਦੱਸਦੀਆਂ ਹਨ ਕਿ ਭਾਰਤ ਇਸ ਸਮੇਂ ਦੌਰਾਨ ਇਜ਼ਰਾਈਲ ਨੂੰ ਵੱਡੀ ਪੱਧਰ ਉੱਤੇ ਹਥਿਆਰ ਸਪਲਾਈ ਕਰ ਰਿਹਾ ਹੈ। ਇਜ਼ਰਾਈਲ ਦੇ ਭਾਰਤ ਅੰਦਰ ਸਾਬਕਾ ਰਾਜਦੂਤ ਡੇਨੀਅਲ ਕੈਰਮਨ ਨੇ ਬੀਤੇ ਦਿਨੀਂ ਕਿਹਾ ਹੈ ਕਿ ਹਥਿਆਰਾਂ ਦੀ ਇਸ ਸਪਲਾਈ ਨਾਲ ਭਾਰਤ ਇਜ਼ਰਾਈਲ ਦਾ ਅਹਿਸਾਨ ਮੋੜ ਰਿਹਾ ਹੈ, ਕਿਉਂਕਿ ਇਜ਼ਰਾਈਲ ਨੇ ਭਾਰਤ ਨੂੰ ਕਾਰਗਿਲ ਜੰਗ ਦੌਰਾਨ ਹਥਿਆਰ ਸਪਲਾਈ ਕੀਤੇ ਸਨ। ਜ਼ਿਕਰ ਯੋਗ ਹੈ ਕਿ ਬੀਤੇ ਸਮੇਂ ਦੌਰਾਨ ਭਾਰਤ ਅਤੇ ਇਜ਼ਰਾਈਲ ਵਿੱਚ ਫੌਜੀ ਲੈਣ ਦੇਣ ਕਾਫ਼ੀ ਤਕੜਾ ਹੋਇਆ ਹੈ ਅਤੇ ਭਾਰਤ ਇਜ਼ਰਾਈਲੀ ਹਥਿਆਰਾਂ ਦਾ ਸਭ ਤੋਂ ਵੱਡਾ ਦਰਾਮਦਕਾਰ ਹੈ। ਇਹਨੇ ਅਨੇਕਾਂ ਜਸੂਸੀ ਯੰਤਰ, ਸੂਹੀਆ ਸੌਫਟਵੇਅਰ, ਡਰੋਨਾਂ, ਮਿਜ਼ਾਇਲਾਂ ਅਤੇ ਪੈਲਟ ਗੰਨਾ ਵਰਗੇ ਹਥਿਆਰ ਇਜ਼ਰਾਈਲ ਤੋਂ ਲਏ ਹਨ, ਜਿਹਨਾਂ ਦੀ ਇਹ ਨਾ ਸਿਰਫ ਸਰਹੱਦੀ ਸੁਰੱਖਿਆ ਲਈ ਬਲਕਿ ਆਪਣੇ ਦੇਸ਼ ਦੇ ਨਾਗਰਿਕਾਂ ਖਿਲਾਫ਼ ਵੀ ਖੁੱਲ੍ਹੀ ਵਰਤੋਂ ਕਰ ਰਿਹਾ ਹੈ।

        --0–—